ازبکستان سږکال افغانانو ته پېنځه زره ویزې صادرې کړې دي

د افغانستان او ازبکستان چارواکو په کابل کې د بېلابېلو لیدنو پر مهال د اقتصادي، ټرانزیټي او کرنیزو همکاریو پر پراختیا، د ویزو د ورکړې پر آسانتیا او د ګډو پروژو پر پلي کېدا ټینګار کړی دی.

د ازبکستان د لومړي وزیر مرستیال جمشید خواجه‌یوف د امارتي شرکتونو د لوی رییس او د ملي پراختیا امارتي شرکت د اجرائیه رییس احمدجان بلال سره په لیدنه کې ویلي، چې هېواد یې سږکال د افغانستان اتباعو ته پېنځه زره ویزې صادرې کړې دي او د ویزو د ورکړې د بهیر د آسانتیا لپاره هڅې روانې دي.

نوموړي زیاته کړې، د ازبکستان لوړپوړي پلاوي د دوه اړخیزو اړیکو د پراختیا لپاره کابل ته سفر کړی دی.

دې پلاوي د افغان ټرانس پروژې د امکان‌سنجۍ د څېړنو له بشپړېدا هم خبر ورکړ او څرګندوي، د افغانستان د تازه مېوو د صادراتو د همغږۍ لپاره به د ازبکستان یو تخنیکي ټیم په کابل کې پاتې شي.

خواجه‌یوف ویلي؛ ازبکستان ژمنه کړې، چې د افغانستان له کروندګرو څخه به سل زره ټنه پنبه واخلي او د کیمیاوي سرو، اصلاح شویو تخمونو او د بنسټیزو او پراختیايي پروژو په برخه کې به هم همکاري وکړي.

احمدجان بلال د دواړو هېوادونو د اړیکو د پراختیا یادونه وکړه او وایي، چې د افغانستان او ازبکستان ترمنځ د سوداګرۍ کچه په تېر یو کال کې نږدې دوه میلیارډ ډالرو ته رسېدلې ده. هغه د سوداګریزو او سیاحتي ویزو د آسانتیا، منځنۍ آسیا ته د افغانستان د تازه مېوو د صادراتو د پراختیا، د افغان ټرانس پروژې د چټکې پلي کېدا او د نساجۍ صنعت د پیاوړتیا غوښتنه وکړه.

دغه راز د ټرانسپورټ او هوايي چلند وزیر محمد فاضل مظلوم د ازبکستان د ټرانسپورټ له وزیر الهام مخکاموف سره د ټرانسپورټي او ټرانزیټي همکاریو د پراختیا په اړه خبرې کړې دي. د ازبکستان د ټرانسپورټ وزیر ژمنه کړې، چې د افغانستان ټرانزیټي وسایطو ته به زیاتې آسانتیاوې برابرې شي.

همداراز د کرنې، اوبو لګولو او مالدارۍ وزیر عطاءالله عمري د ازبکستان د لومړي وزیر له مرستیال سره په لیدنه کې د دغه هېواد پانګه‌وال بللي، چې د افغانستان د کرنې او مالدارۍ په برخو کې پانګونه وکړي.

د ازبکستان د لومړي وزیر مرستیال ویلي، هېواد یې د افغانستان کرنیزو محصولاتو، په ځانګړي توګه پنبې، کچالو او نورو تولیداتو ته اړتیا لري او چمتو دی، چې د تولید او پروسس په برخه کې له افغانستان سره ګډ کار وکړي.

دواړو لوریو په پای کې هوکړه کړې، چې د کرنې په برخه کې د شویو هوکړو د تعقیب او عملي کولو لپاره به یوه ګډ تخنیکي ډله جوړه شي.