د امریکا ولسمشر جوبایډن د یکشنبې پر ورځ ( د چنګاښ یودېرشمه) د امریکا په ولسمشریزو ټاکنو کې د ډیموکراټ ګوند له نوماندۍ تېر شو او د دې ګوند له نوماندې کامالا هریس له نوماندۍ یې ملاتړ وکړ.

هغه په یوه خبرپاڼه کې څرګنده کړې: دا زما د ګوند او زما د هېواد پر ګټه ده، چې استعفا وکړم او یوازې د خپلې ولسمشرۍ د پاتې وخت پر ترسره کولو راوڅرخېږم.

د امریکا دې شپږڅلوېښتم ولسمشر، چې د ۲۰۲۴ ز. کال د نومبر د ټاکنو له ګټلو سره یې د بلې دورې لپاره د پاتې کېدو پلان درلود او ځان یې د جمهوري غوښتونکیو د نوماند ډونالډ ټرمپ ته د ماتې ورکولو وړ کس ګڼلی؛ په دې وروستیو اونیو کې د خپل ګوند له نیوکو سره مخ شو.

پر ۸۱ کلن جو بایډن نیوکې له لومړۍ مناظرې وروسته راپورته شوې؛ ځینې ډیموکراټانو له ولسمشر څخه وغوښتل، چې د تېرې میاشتې په مناظره کې د کمزوري دریځ او د پخواني ولسمشر ډونالډ ټرمپ د ماتې د چانس په اړه د اندېښنې له کبله له سیالۍ څخه ووځي.

د امریکا د استازو مجلس د امنیتي چارو د کمیټې د دیموکراتانو مشر اډم شیف او د هالیووډ ستورې جورج کلوني، چې د جوبایډن یو له سترو ملاتړو څخه دي هم د بایډن د استعفا غوښتنه وکړه.

له دې مخکې بایډن ویلي وه، چې هغه به په سیالۍ کې پاتې شي که الله پاک وغواړي خپل ټاکنیز کمپاین به پای ته ورسوي.هغه خپلې ناروغۍ ته په نغوته کې ویلي؛ که ډاکټران ترې وغواړي، چې ټاکنیزه مبارزه پای ته ورسوي؛ نو په راتلونکیو ولسمشریزو ټاکنو کې به پخپلې نوماندۍ له سره غور وکړي.

د امریکا د ولسمشرۍ په ټاکنو کې د ډیموکراټ ګوند د نوماندۍ لپاره د جوبایډن د ځایناستي میکانیزم به د دغه ګوند له‌خوا تعقیب شي او یو ځایناستی به معرفي شي.

جو بایډن د ختیځ پر وخت یکشنبه د امریکا د بېخبناوو بیا رغول، د ډېر عمرو لپاره د درملو لګښت کمول، د ډېرو خلکو لپاره د روغتیایي بیمې پراخول، د پخوانیو سرتېرو لپاره روغتیایي پاملرنې چمتو کول، سترې محکمې ته د لومړۍ تورتوکمې امریکایۍ ټاکل او د اقلیم د بدلون په اړه د خورا مهم قانون تصویب یې د خپل حکومت ځینې لاسته راوړنې دي او اعلان یې وکړ، چې امریکا هیڅکله د مشرتابه لپاره له دې ښه‌والي سره چمتو نه ده.

هغه زیاته کړې، چې د امریکا د خلکو له همکارۍ پرته د ده د ادارې هیڅ لاسته راوړنه ممکنه نه‌وه.

جو بایډن د کرونا ناروغۍ پر وړاندې د خپل حکومت بریالیتوب او همدارنګه د امریکا اقتصادي ناورین ته په نغوته کې، چې پر ​​وینا یې له لوی فشار وروسته ترټولو بد ناورین دی ویلي، چې د خپلې ولسمشرۍ پرمهال یې په امریکا کې له ډیموکراسۍ ملاتړ کړی او په ټوله نړۍ کې یې د دې هېواد اتحادونه پیاوړي شوي دي.

بایډن د ولسمشر په توګه د امریکا خدمت کول د خپل ژوند تر ټولو ستر ویاړ وباله او وایي، چې که څه هم دی د ولسمشرۍ په ټاکنو کې د بیا ګډون په لټه کې دی؛ خو دا د ډیموکراټ ګوند او د امریکا د خلکو په ګټه ده، چې له نوماندۍ ووځي او تر پاتې وخته د ولسمشرۍ پر دندو راوڅرخي. هغه ویلي، چې دی به په دې اونۍ کې د امریکا د خلکو سره په دې اړه نورې خبرې هم وکړي.

له نوماندۍ څخه له وتلو څو دقیقې وروسته جو بایډن د خپل او کامالا هریس د انځور پر خپرولو د ډیموکراټ ګوند له نوماندۍ خپل ملاتړ اعلان کړ.

بایډن د خپل ګوند له غړیو وغوښتل، چې له هغه سره یوځای شي او پدې توګه د ډونالډ ټرمپ د ماتې لپاره زمینه برابره کړي.

جو بایډن به د ۲۰۲۵ز. کال د جنورۍ ترشلمې د امریکا ولسمشر وي او له هغه وروسته به نوی ولسمشر خپلې چارې پیلوي.

د امریکا ولسمشریزې ټاکنې په هرو څلور کلونو کې کېږي، چې یوازې جمهوري غوښتونکي او ډیموکراټ ګوندي غړي په کې واک ته رسېږي.

اړوند خبرونه:

بایډن د کرونا ویروس له کبله قرنطین شو

په تل ابیب کې د حوثيانو له برید یوه ورځ وروسته اسرائیلي جنګي الوتکو د یمن حدیده بندر ته څېرمه د حوثيانو پر مرکزونو بریدونه وکړل، چې لږ تر لږه درې کسان یې ووژل او ۸۷ نور ټپیان شول.

المسیره ټلویزیوني کانال د یمن د روغتیا وزارت د څرګندونو له مخې ویلي؛ په دغو هوایي بریدونو د تېلو تاسیسات او د برښنا یوه دستګاه پر نښه شوي او اور پرې لګېدلی دی.

د حديده بندر اوسېدونکیو رويټرز ته ويلي، چې د بمبارډ پر مهال په ټول ښار کې د چاودنو غږونه اورېدل شوي او المسيره ټلويزيون ويلي؛ ملکي دفاعي ځواکونه او اور‌وژونکي هڅه کوي، چې د بندر د تېلو په ټانکونو کې د اورلګېدنې مخه ونیسي.

د اسرائیلو د پوځ ویاند ویلي، دغه بندر حوثيانو له ایران څخه د وسلو د رالېږدولو لپاره کاروه.

اسرائیل له برید مخکې خپلو متحدینو ته خبر ورکړی و. د اسرائیلو پوځ اعلان وکړ، چې برید اف – ۱۵ جنګي الوتکو ترسره کړی او هرڅوک په خوندي توګه بېرته راستانه شوي دي.

د حوثيانو عالي سیاسي شورا ویلي، چې دې بریدونو ته به اغېزمن ځواب ورکړي.

د حوثیانو د پوځ ویاند یحیی سريع زیاته کړې: حوثيان به د اسرائیلي دښمنو پر مهمو اهدافو له بر ډډه ونکړي.

پر یمن برید، چې د اسرائیلي چارواکو پر وینا د حوثيانو له‌خوا پر اسرائیلو له ۲۰۰ څخه د ډېرو بریدونو وروسته تر سره شوی او دا اندېښنې یې راپارولي، چې د غزې جګړه به سیمه‌ییزه کړي.

د اسرائیلو دفاع وزیر یوآو ګالانټ په یوه خبرپاڼه کې څرګنده کړې: اوس‌مهال په حدیده کې اور لګیدلی اور په ټول منځني ختیځ کې لیدل کیږي او ارزښت یې څرګند دی.

هغه زیاته کړه: حوثيانو پر مونږ له ۲۰۰ ډېر بریدونه کړي دي. لومړی ځل، چې دوی یو اسرائیلي وګړی زیانمن کړ؛ مونږ پرې برید وکړ.

د جمعې پر ورځ د ایران د جوړې شوې بې پیلوټه الوتکې پر مټ له یمن څخه د تل ابیب پر مرکز برید وشو، چې حوثيانو یې د برید ادعا وکړه.

په دې برید کې یو کس ووژل شو او څلور نور ټپیان دي.

سپینې ماڼۍ ویلي، چې د امریکا ولسمشر جو بایډن پر کرونا ویروس اخته شوی او غواړي، چې د ډیلور ایالت په خپل ځانګړي استوګنځي کې ځان قرنطین کړي.

بایډن د چارشنبې پر ورځ ( د چنګاښ اووه‌ویشتمه ) د کرونا ویروس ازموینه وکړه او پایله یې په داسې حال کې مثبته شوه، چې نوموړي لاس وګاس ته د ټاکنیز کمپاین لپاره سفر کړی و.

د رویټرز د څرګندونو له مخې؛ د سپینې ماڼۍ ویاندې کارین ژان پیر د ازموینې پایله له هغې وروسته اعلان کړه، چې بایډن پر کرونا ویروس د اخته کیدو له کبله خپله وینا لغو کړه.

هغې زیاته کړې، چې د امریکا ولسمشر واکسین شو او په ډیلور کې به ځان قرنطین کړي.

بایډن په داسې حال کې، چې الوتکې ته پورته کېدو او له لاس وګاس څخه ډیلور ته تلو؛ خبریالانو ته وویل، چې ښه دی؛ خو ورو – ورو له اندرپایې پورته شو، کټاره یې ونیوله او د الوتکې ور ته څو ګامه پاتې ول، چې ودرېد.

بایډن د ۲۰۲۲ کال په جون کې پر کرونا اخته شوی و؛ د جون پر یو‌ویشتمه یې د ازموینې پایله مثبته شوه او د جون پر اووه‌ویشتمه روغ شو. د جون پر دېرشمه بیا کرونا شو؛ خو د اګست پر اوومه بېرته بشپړ روغ شو.

د رویټرز د څرګندونو له مخې؛ دا ناروغي د بایډن لپاره په داسې یو حساس وخت کې راځي، چې هغه د جمهوري غوښتونکي ډونالډ ټرمپ پروړاندې په ایالتونو کې ټاکنیزه سیالي له لاسه ورکړې ده.

ټرمپ د شنبې پر ورځ په داسې حال کې له یوه مرګونې بریده ژوندی پاتې شو، چې په روانه اوونۍ کې د جمهوري غوښتونکیو د کنوانسیون مشري کوي.

د رویټرز د ټولپوښتنې له مخې، چې د سې‌شنبې پر ورځ پای ته رسیدلې شاوخوا ۴۰ سلنه ډیموکراټانو ویلي، چې بایډن باید له ټاکنیزو هڅو تېر شي. په سلو کې ۶۵ خپلواک رای ورکوونکي هم له دوی سره همغږي دي.

په دې ټولپوښتنه کې شاوخوا ۵۸ سلنه ډیموکراټ رای ورکوونکیو ویلي؛ دوی باور لري، چې بایډن ډېر زوړ دی او د حکومت مشري نشي کولی، چې ۷۰ سلنه خپلواک رای ورکوونکي هم ورسره همغږي دي.