اسټرالیا باید ژر تر ژره په افغانستان کې د جګړې قربانیانو ته غرامت ورکړي

د ملګرو ملتونو د کارپوهانو یوې ډلې، چې د افغانستان د بشري حقونو په برخه کې د ملګرو ملتونو ځانګړي راپور ورکوونکي ریچارډ بنټ یې هم غړی دي؛ پر اسټرالیا غږ کړی، چې ژر تر ژره دې د ۳۹ ملکیانو د وژنې او جنګي جنایت له کبله د هغوی کورنیو ته غرامت ورکړي.

 په خبرپاڼه کې راغلي؛ په ۲۰۲۰ ز. کال کې یوې پوځي څېړنې وموندله، چې اسټرالیايي پوځیانو په افغانستان کې ۳۹ ملکي بندیان وژلي دي.

د ملګرو ملتونو د کارپوهانو په راپور کې راغلي: آسټرالیا د بشري حقونو د نړیوال قانون او نړیوال بشردوستانه قانون له مخې اړ ده، چې د اعدام او شکنجې قربانیانو ته تاوان ورکړي.

له بده مرغه، استرالیا په مستقیمه توګه د قربانیانو او د هغوی له کورنیو بښنه نده غوښتې او نه یې د خپلو تحقیقاتو یا نظامي اصلاحاتو خبر ورکړی دی. د غرامت ورکولو  لپاره  اسانه لارې شته او مونږ په دې برخه کې مرسته کوو.

کارپوهانو ويلي، چې له وژنو څخه دولس کاله تېر شوي او د غرامت ورکولو له ژمنې څلور کاله مخ پر تېرېدو دي؛ خو اوس هم عملي ګام پورته شوی ندی.

د کارپوهان وایي د نړیوال قانون له مخې اسټرالیا باید پر غرامت ورکولو سربېره د وژل شویو د کورنیو غړیو ته د روغتیايي او روانې حالت هم ځان خبر کړي.

د افغانستان لپاره د ملګرو ملتونو د بشري حقونو شورا ځانګړي راپورورکوونکي د اسټرالیا پر حکومت غږ کړی، چې په افغانستان کې د استرالیايي ځواکونو له‌خوا د “جنګي جرمونو” قربانیانو ته ژر تر ژره تاوان ورکړي.

د افغانستان لپاره د ملګرو ملتونو د بشري حقونو شورا ځانګړي راپورورکوونکي ریچارډ بنټ ویلي: زه پر اسټرالیا غږ کوم، چې په افغانستان کې د اسټرالیايي ځواکونو له‌خوا د جنګي جنایتونو د ۳۹ قربانیانو کورنیو ته د تاوان ورکولو لپاره سمدستي خپله دنده ترسره کړي.

اسلامي امارت تل ویلي، چې نه یوازې اسټرالیا، بلکې د امریکا په ګډون د ناټو نورو هېوادونو هم جنګي جنایتونه کړي، چې د دغو جنایتونو عاملین دې محاکمه او د قربانیانو کورنیو ته دې تاوان ورکړشي.

د ملګرو ملتونو کارپوهانو پر نورو هغو هېوادونو هم غږ کړی، چې په افغانستان کې خپل فعالیتونه په بشپړه توګه وڅېړي.