Connect with us

سوداگري

افغانستان، ازبکستان، چین او قرغزستان د ګډ اقتصادي دهلیز جوړولو هوکړه وکړه

خپور شوی

د

(Last Updated On: وږی ۲۰, ۱۴۰۱)

د افغانستان، ازبکستان، چین او قرغزستان استازیو د جمعې پر ورځ د وږي ۱۸ په تاشکند کې د سوداګرۍ د پراختیا لپاره د پټلۍ ګاډي د نوي اقتصادي دهلیز د جوړولو تړون لاسلیک کړ.

چارواکو ویلي؛ د دغه دهلیز له لارې به سوداګریز توکي له چین څخه قرغزستان، له قرغزستان څخه ازبکستان ته او د ازبکستان د پټلۍ له لارې د افغانستان بلخ ته رارسېږي.

مسوولین وايي، چې د افغانستان تولیدات او ترانزیت به له یاد اقتصادي دهلیز څخه تر چین پورې په لنډو ورځو کې رسېږي.

د دغې درې میاشتنۍ تجربوي هوکړې له مخې به له چین څخه بار وړونکی ریل اړوند مالونه قرغزستان او بیا د ازبکستان له لارې افغانستان ته رارسوي.

د افغانستان د اوسپنیزې پټلۍ ادارې د یکشنبې پر ورځ تائید کړه، چې ریل یا پټلۍ ګاډی به په بلخ ولایت کې دریږي.

د افغانستان صادراتي توکي به هم له همدې لارې چین ته ځي.

د افغانستان د اوسپنیزې پټلۍ ادارې ویلي، چې دغه دهلیز به د لېږد رالېږد څو وجهي سیستم هم ولري؛ خو ډېر تمرکز به یې د ریل او پټلۍ ګاډي له لارې د توکو پر لیږد وي.

په تیرو وختونو کې، مالونه اکثرا په لاریو کې د ځمکې له لارې چین ته لیږدول شوي، چې نږدې دوه میاشتې وخت یې نیولی؛ خو د نوې هوکړې له مخې به د پټلۍ ګاډي دهلیز مالونه په دوه اوونۍ کې لېږدوي.

چارواکي وايي، د توکو د لېږد د وخت له کمېدو سره به د توکو بیې راټيټې او افغانانو ته به هم د کار زمینه برابره شي.

د افغانستان د اوسپنیزې پټلۍ ادارې زیاته کړې؛ د پټلۍ ګاډي له لارې به د وارداتو او صادراتو د لیږد رالېږد تعرفه هم د پام وړ کمې ولري.

که څه هم افغانستان د پټلۍ ګاډي شبکه نلري؛ خو د ترکمنستان، ازبکستان او ایران په ګډون د یو شمېر هېوادونو د پټلۍ ګاډو له شبکې سره نښلېدلی دی.

سوداگري

یوه شرکت د جګدلک د یاقوت پر کان‌کېندنه ۲۷ اعشاریه ۵ میلیون ډالر پانګونه کوي

Published

on

(Last Updated On: کب ۴, ۱۴۰۲)

د کانونو او پټرولیم وزارت څرګنده کړې، چې آریانا هایلنډ شرکت به د کابل ولایت د جګدلک پر یاقوت کان ۲۷ اعشاریه ۵ میلیون ډالره پانګونه وکړي.

د دغه وزارت د جمعې دورځې په خبرپاڼه کې راغلي؛ د یاد کان د بلې داوطلبۍ غونډه د آریانا هایلنډ او میرزا سلطاني شرکتونو په ګډون جوړه شوه، چې په پایله کې آریانا هایلنډ شرکت د افغانستان اسلامي امارت ته د ۴۴ سلنې ونډې پر منلو داوطلبي وګټله.

د خبرپاڼې د څرګندونو له مخې، دغه راز د آریانا هایلنډ شرکت په ټولنیزو خدماتو کې هم پېنځه میلیون امریکایي ډالرو لګوي.

د يادونې ده، چې د جګدلک یاقوت کان د کابل ولایت د سل کيلومټرۍ سروبي ولسوالۍ په سویل لویديځ کې موقعيت لري او مساحت يې هم ۹ اعشاریه ۶ کيلومټره مربع دى.

Continue Reading

سوداگري

د افغان – ټرانس پروژې د تخنیکي – اقتصادي څېړنو د پیل هوکړه لیک لاسلیک شو

Published

on

(Last Updated On: کب ۱, ۱۴۰۲)

د افغانستان اوسپنېپټلۍ ادارې د افغان – ټرانس اوسپنې‌پټلۍ پروژې د تخنیکي – اقتصادي څېړنو د پیل هوکړه لیک لاسلیک کړ.

یادې ادارې څرګنده کړې؛ ازبکستان ته د دې ادارې چارسمبالي بخت‌الرحمن شرافت او ورسره مل پلاوي په خپل سفر کې د افغانستان، ازبکستان او عربي متحده اماراتو د چارواکو تر منځ د افغان – ټرانس اوسپنې‌پټلۍ پروژې د تخنيکي او اقتصادي مطالعاتو د پيل اړین هوکړه ليک لاسليک کړ.

دغه هوکړه ليک د افغانستان استازي بخت‌الرحمن شرافت، د ازبکستان استازي او د هغه هېواد د ټرانسپورټ وزير ميرزا مئين اوغلي او د عربي متحده اماراتو استازي او د (ADL Ulanish) شرکت مشر الانش لاسليک کړ.

دغه شرکت د افغان – ټرانس اوسپنېېپټلۍ تخنیکي، ټولنیزې او اقتصادي څېړنې په‌خپل مالي لګښت تر سره کړي، چې وروسته به د دغو څېړنو پایلې د افغانستان، ازبکستان او پاکستان له مالي بنسټونو، هېوادونو او سوداګرو سره د پانګونې د جلبولو لپاره شریکې شي.

په دې مراسمو کې همدا راز پرېکړه وشوه، چې د افغانستان، ازبکستان او عربي متحده اماراتو پلاوى به د چارشنبې پر ورځ (د کب دوه‌يمه) په تاشکند کې له قطري او پاکستاني چارواکو سره د دې پروژې په اړه انلاين غونډه تر سره کړي.

د افغان ـ ټرانس اوسپنې‌پټلۍ پروژه د افغانستان له خاورې تېریږي؛ منځنۍ او جنوبي اسیا نښلوي( دا پروژه له مزارشریف څخه پیلېږي او ۶۴۷ کیلومټره د سمنګان، بغلان، بامیان، میدان وردګ، لوګر او پکتیا ولایت د ډنډ پټان ولسوالۍ له لارې له پاکستان سره نښلیږي).

دا پروژه له ډېرو کلونو راپدیخوا تر بحث لاندې وه؛ د اسلامي امارت له بیا واکمنېدو وروسته یې لومړنۍ سروې د افغانستان، ازبکستان او پاکستان د اوسپنې‌پټلۍ د تخنیکي ډلو له لوري بریالۍ ترسره او د غځېدا لار یې د اسلامي امارت کابینې پر یو کلن عملي پلان تصویب شوه، چې د پلي کېدا لپاره یې د افغانستان اوسپنې‌پټلۍ ادارې او اسلامي امارت ژمنتیا پوره روښانه ده.

د افغانستان اوسپنې‌پټلۍ اداره یو ځل بیا له هېوادونو، مالي بنسټونو او سوداګرو څخه وغوښتل، چې د افغانستان د اوسپنې‌پټلۍ په پروژو کې پانګونه وکړي او دا اداره خپله دنده ګڼي، چې پانګوالو ته د پانګونې لپاره لازمې اسانتیاوې برابرې کړي.

Continue Reading

سوداگري

د کانونو او پټرولیم وزارت چارسمبالي له روسي پانګوال سره وکتل

Published

on

(Last Updated On: سلواغه ۳۰, ۱۴۰۲)

د کانونو او پټرولیم وزارت چارسمبالي شهابالدین دلاور د یکشنبې پر ورځ (د سلواغې نهه‌ویشتمه) له روسي پانګوال سره وکتل.

د کانونو او پټرولیم وزارت د خبرپاڼې له مخې؛ په دې کتنه کې د روسیې پانګوال د خپل شرکت د کاري تجربې او فعالیتونو په اړه د معلوماتو د وړاندې کولو ترڅنګ ویلي: زمونږ شرکت په ایران، عراق، سوریه او تاجکستان کې د ۱۲۰ کلونو کاري تجربو او پرمختللیو او عصري وسایلو پر درلودلو په افغانستان کې همکارۍ او کار پیلولو ته چمتو دی.

د کانونو او پترولیم وزارت ویاند همایون افغان ویلي؛ په افغانستان کې د المان او روسيې دوه سترې کمپنۍ غواړي، چې د تېلو د پروسس او د انرژۍ د تولید په برخه کې پانګونه وکړې.

په دې کتنه کې نوموړي له کثافاتو څخه د ۱۵۰ میګاواټه برښنا د تولید په اړه هم خبرې وکړې او څرګندوي؛ زمونږ شرکت چمتو دی، چې د کثافاتو د ستونزې د حل او له هغو څخه د برښنا په تولید کې همکاري وکړي.

دغه روسي شرکت د تېلو او ګاز په سکتور کې د خپلو اسانتیاوو او تجهیزاتو او له ګاز څخه د برښنا د تولید په اړه هم معلومات وړاندې او په اړوند سکتور کې یې د پانګونې په اړه د ملاتړ غوښتنه.

د دغه وزارت په خبرپاڼه کې راغلي، چې؛ د دغه وزارت چارسمبالي د هېواد د تېلو او ګاز په سکتورونو او له کثافاتو څخه د برښنا د تولید په برخه کې د دوی طرحې او نظریات وستایل او په‌دې اړه وایي؛ افغانستان له امنیت څخه برخمن دی او د بهرنیو سوداګرو د پانګونې لپاره مناسب چاپېریال برابر شوی دی.

ویل کیږي، چې په دې کتنه کې شهاب الدین دلاور سوداګرو ته د پانګونې ډاډ ورکړ او څرګندوي؛ بهرني او کورني پانګوال کولی شي له کومې اندېښنې پرته د افغانستان په بېلابېلو برخو کې پانګونه وکړي.

Continue Reading

Trending

Copyright © 2022 Ariana News. All rights reserved!