Connect with us

تازه خبرونه

افغانستان او ازبکستان د انرژۍ په برخه کې د سټراتیژیکو همکاریو او د سرخان ـ پلخمري د ۵۰۰ کیلوولټه پروژې پر پلي کېدا ټینګار وکړ

د برښنا شرکت د خبرپاڼې له مخې، په ازبکستان کې د افغانستان سفیر عبدالغفار بحر هم د دواړو هېوادونو ترمنځ د دوه‌اړخیزو اړیکو، متقابلو همکاریو او د انرژۍ په برخه کې د همکاریو پر پراختیا ټینګار کړی دی.

خپور شوی

د

د افغانستان برښنا شرکت ویلي، د دغه شرکت د اجرائیوي رییس عبدالحق همکار پر مشرۍ پلاوي د ازبکستان د انرژۍ وزارت له لومړي مرستیال امید محمدامینوف او د دغه هېواد د تخنیکي او انجنیرۍ ادارو له مسوولانو سره د انرژۍ په برخه کې د سټراټیژیکو همکاریو د پراختیا په اړه خبرې کړې دي.

د برښنا شرکت د خبرپاڼې له مخې، په ازبکستان کې د افغانستان سفیر عبدالغفار بحر هم د دواړو هېوادونو ترمنځ د دوه‌اړخیزو اړیکو، متقابلو همکاریو او د انرژۍ په برخه کې د همکاریو پر پراختیا ټینګار کړی دی.

په دې ناسته کې دواړو لوریو د برښنا د تولید، لېږد او وېش شبکو د پراختیا، د تخنیکي وړتیاوو لوړولو، د انجنیرۍ او طرحې په برخو کې د همکاریو، د ځیرکو برښنايي میترونو کارولو، د انرژۍ د اوږدمهاله پلان جوړونې او د افغانستان د برښنا سکټور د عصري کولو په اړه خبرې کړې دي.

د خبرپاڼې له مخې، ازبکستان د افغانستان د انرژۍ سکټور د پراختیا په برخه کې د بشپړې همکارۍ چمتووالی ښودلی او ټینګار یې کړی، چې باثباته او باوري برښنا د افغانستان د اقتصادي ودې، د کانونو پراختیا او صنعتي کېدا لپاره له بنسټیزو اړتیاوو څخه ده.

د ازبکستان چارواکو ویلي؛ همکارۍ به یوازې د برښنا تر صادرولو محدودې نه‌وي، بلکې د تولید، لېږد، وېش او تخنیکي وړتیاوو لوړولو برخې به هم رانغاړي.

د برښنا شرکت اجرائیوي رییس عبدالحق همکار د ازبکستان له وړاندیزونو هرکلی کړی او څرګندوي:« مونږ د افغانستان د انرژۍ سکټور د پراختیا لپاره د ازبکستان وړاندیزونه مهم او ارزښتناک ګڼو. اوس اړتیا ده، چې د دواړو هېوادونو د همکاریو لپاره روښانه او عملي نقشه جوړه او د پلي کېدا پړاو ته وردننه شوو.»

هغه زیاته کړې؛ افغانستان برښنا د تولید په برخه کې پراخو تخنیکي څېړنو ته اړتیا لري او غواړي؛ د هېواد په بېلابېلو سیمو کې د کوچنیو او منځنیو کچو اوبو، لمریزې، ګازي او سکرو پر بنسټ د برښنا تولید پروژو لپاره هر اړخیزې د امکان‌سنجۍ څېړنې ترسره شي، چې د افغانستان لپاره د ملي انرژۍ نقشه جوړه شي.

د نوموړي د څرګندونو له مخې، د افغانستان موخه یوازې د برښنا واردول نه‌دي، بلکې دا هېواد غواړي د برښنا د تولید، لېږد او وېش وړتیاوې پیاوړې کړي.

هغه ویلي، د انجنیرۍ، طرحې، تولید، ګټې اخیستنې او د برښنا د بنسټیزو ودانیو د ساتنې په برخو کې تخنیکي همکارۍ د افغانستان له بنسټیزو اړتیاوو څخه دي.

د برښنا شرکت اجرائیوي رییس همداراز ټینګار کړی، چې د ګډ پلان، پیاوړې تخنیکي همغږۍ او عملي پرېکړو له لارې به د افغانستان د انرژۍ سکټور راتلونکی روښانه او د دواړو هېوادونو اقتصادي اړیکې به هم پیاوړې شي.

په دې ناسته کې دواړو لوریو د سرخان ـ پلخمري د ۵۰۰ کیلوولټه برښنا لېږد پروژې د پرمختګ په اړه هم خبرې کړي او د دې پروژې د ژر او پر وخت پلي کېدا پر اړتیا یې ټینګار کړی دی. دواړو خواوو ژمنه کړې، چې شته ستونزې به د تخنیکي همغږۍ او ګډو همکاریو له لارې اوارې کړي.

د ازبکستان د انرژۍ وزارت لومړي مرستیال هم ویلي، چې د افغانستان د انرژۍ سکټور د پراختیا لپاره به ۱۵ کلن جامع پلان جوړ شي او د تخنیکي څېړنو او د امکان‌سنجۍ له بشپړېدا وروسته به د لومړیتوب لرونکو پروژو تخنیکي جزئیات او لګښتي اټکلونه له برښنا شرکت سره شریک شي.

ویل کیږي؛ دواړو لوریو د ګډو تخنیکي کاري ډلو پر جوړولو، د تجربو او ټکنالوژۍ پر تبادلې، د وړتیاوو پر لوړولو او د افغانستان د انرژۍ سکټور د عصري کولو لپاره د عملي همکاریو پر دوام ټینګار وکړ.

تازه خبرونه

سوداګر دې قانوني پانګونه وکړي – د بدخشان والي مرستیال

حقجو په فیض‌آباد ښار کې د افغان ملي بانک د پرانیستلو د مراسمو پر مهال له سوداګرو وغوښتل، چې د شتمنېدا لپاره خپلې پانګې د نشه‌يي توکو قاچاق ته ځانګړې نه‌کړي او په دې کار سره ځوانان پر نشه‌يي توکو اخته نه‌کړي.

Published

on

د بدخشان ولایت د والي مرستیال جمال‌الدین حقجو له سوداګرو غوښتي، چې خپلې پانګې په قانوني او تولیدي برخو کې ولګوي او د هېواد په اقتصادي وده کې ونډه واخلي.

حقجو په فیض‌آباد ښار کې د افغان ملي بانک د پرانیستلو د مراسمو پر مهال له سوداګرو وغوښتل، چې د شتمنېدا لپاره خپلې پانګې د نشه‌يي توکو قاچاق ته ځانګړې نه‌کړي او په دې کار سره ځوانان پر نشه‌يي توکو اخته نه‌کړي.

حقجو وویل، اوس مهال په ټول افغانستان کې زرګونه کسان په نشه‌يي توکو روږدي دي او له سوداګرو یې وغوښتل، چې د نشه‌يي توکو په قاچاق کې پانګونه ونه‌کړي.

دغه راز په دې مراسمو کې نورو سیمه‌ییزو چارواکو له ولس وغوښتل، چې د حکومت پر وړاندې د درېدا پر ځای دې د هېواد د اقتصادي ودې لپاره کار وکړي.

دوی ویلي؛ د اقتصادي فعالیتونو پراختیا کولی شي د بېوزلۍ او نورو هغو ستونزو په کمولو کې مرسته وکړي، چې زرګونه کورنۍ ورسره مخ دي.

چارواکو له بانکونو او سوداګرو هم وغوښتل، چې خپل فعالیتونه د اسلامي اصولو له مخې ترسره کړي.

د افغان ملي بانک نوې پرانیستل شوې څانګه به د بدخشان اوسېدونکو ته بانکي خدمتونه وړاندې کړي.

د بانک ملي بانک چارواکي وايي؛ هغه دولتي کارکوونکي، چې معاشونه یې د دې بانک له لارې ترلاسه کیږي؛ د بانک د تګلارې له مخې به د پور له خدمتونو هم برخمن شي.

د بدخشان اوسېدونکو د دې څانګې پرانیستل بانکي خدمتونو ته د لاسرسي د آسانتیا لپاره مهم وبلل او له بانکونو یې وغوښتل، چې د دغه ولایت په لرې پرتو ولسوالیو کې هم خپلې څانګې پرانیزي.

چارواکو له سوداګرو او دولتي ادارو وغوښتل، چې د پانګونې او د بانک له خدمتونو څخه د ګټې اخیستنې له لارې د دغه بانک ملاتړ وکړي.

Continue Reading

تازه خبرونه

په ایران کې د ټرافیکي پېښې له کبله اووه افغان کډوال مړه شوي

د بشري حقونو د «حال‌وش» بنسټ د راپور له مخې؛ دغه ټرافیکي پېښه د جمعې پر ورځ( د ۱۴۰۵ لمریز لېږدیز کال د سنبلې پر اووه‌ویشتمه) د سیستان او بلوچستان په سرباز نومې سیمه کې رامنځته شوې ده.

Published

on

د ایران په سیستان او بلوچستان ولایت کې د افغان کډوالو لېږدوونکي موټر او د تېلو لېږدوونکي موټر د ټکر له کبله اووه کسان مړه شوي دي.

د بشري حقونو د «حال‌وش» بنسټ د راپور له مخې؛ دغه ټرافیکي پېښه د جمعې پر ورځ( د ۱۴۰۵ لمریز لېږدیز کال د سنبلې پر اووه‌ویشتمه) د سیستان او بلوچستان په سرباز نومې سیمه کې رامنځته شوې ده.

د سیستان او بلوچستان د ټرافیک پولیسو قومندان سیاوش محبي ویلي، چې افغان وګړي ناقانونه ایران ته راننوتلي وه.

هغه زیاته کړې، چې په دې پېښه کې نهه نور ټپیان شوي دي.

محبي د پېښې لامل د کډوالو لېږدوونکي موټر د چلوونکي بې‌احتیاطي بللې ده.

 
Continue Reading

تازه خبرونه

د اسلامي همکاریو ټولنه د افغانستان په اړه د تماس ډلې ناسته تر سره کوي

د اسلامي همکاریو ټولنې ویلي، په دې غونډه کې به د افغانستان پر روان وضعیت، د دغه هېواد له خلکو سره د ملاتړ او د افغانستان په اړه د ګډو هڅو پر څرنګوالي خبرې وشي.

Published

on

د اسلامي همکاریو ټولنې اعلان کړی، چې د افغانستان په اړه د دې ټولنې د تماس ډلې غونډه به د ملګرو ملتونو د یواتیاومې عمومي غونډې په څنډه کې ترسره شي.

د اسلامي همکاریو ټولنې ویلي، په دې غونډه کې به د افغانستان پر روان وضعیت، د دغه هېواد له خلکو سره د ملاتړ او د افغانستان په اړه د ګډو هڅو پر څرنګوالي خبرې وشي.

د غونډې موخه د افغانستان په اړه د اسلامي همکاریو ټولنې د غړیو هېوادونو ترمنځ د نظرونو همغږي او د دغه هېواد د وضعیت په تړاو د ګډ دریځ پیاوړتیا بلل شوې ده.

د ملګرو ملتونو د یواتیاومې عمومي غونډې په څنډه کې به د اسلامي همکاریو ټولنې د غړیو هېوادونو د بهرنیو چارو وزیرانو کلنۍ غونډه هم ترسره شي.

د بهرنیو چارو وزیرانو په دې کلنۍ غونډه کې به د اسلامي نړۍ پر مهمو موضوعاتو سربېره د افغانستان وضعیت او له دغه هېواد سره د اړیکو او همکاریو د پراختیا په اړه هم خبرې وشي.

د اسلامي همکاریو ټولن د افغانستان د وضعیت په اړه د تماس ډله کې د غړیو هېوادونو استازي شامل دي او دغه ډله د افغانستان اړوند د بحثونو او د نظرونو د همغږۍ لپاره جوړ شوې ده.

Continue Reading
Advertisement

Trending

Copyright © 2026 Ariana News. All rights reserved!