د آزموینو عمومي ادارې نن (دوشنبه د چنګاښ پېنځلسمه) د حکومت د اطلاعاتو او رسنیو په مرکز کې په یوې غونډه کې د ۱۴۰۵لمریز لېږدیز کال د عمومي کانکور، د دیني مدرسو، د شپنیو پوهنځیو، د څوارلسمو ټولګیو، له هېواده بهر فارغانو او د کوچیانو د کانکور آزموینو پایلې اعلان کړې.

د عمومي کانکور د پایلو له مخې، د پروان ولایت راشد د پهلوان زوی د ۳۶۰ نمرو په ترلاسه کولو لومړی مقام خپل کړ.

د کونړ ولایت انعام‌الله د شېرزمان زوی، د ۳۵۸.۰۹۳۷ نمرو پر ترلاسه کولو دوه‌یم مقام خپل کړ.

د پکتیا ولایت عبدالهادي د عبدالرحمن زوی د ۳۵۶.۹۶۷۹۱ نمرو پر ترلاسه کولو درېیم مقام خپل کړ.

د میدان وردګ ولایت محمد ایمن، د محمد بشیر زوی، د ۳۵۶.۹۶۷۹۰ نمرو په ترلاسه کولو څلورم مقام خپل کړ.

د میدان وردګ ولایت بسم‌الله جان د محمد عمر زوی د ۳۵۶.۸۵۷۹ نمرو پر ترلاسه کولو پېنځم مقام خپل کړ.

د دیني مدرسو د فارغانو له ډلې د غور ولایت عبدالمجید د ۳۲۷.۱۹ نمرو پر ترلاسه کولو لومړی مقام، د بدخشان ولایت خالد د ۳۲۰ نمرو پر ترلاسه کولو دوه‌یم مقام او د لغمان ولایت حامد د ۳۱۹ نمرو پر ترلاسه کولو درېیم مقام خپل کړ.

د آزموینو عمومي اداره وایي، د ۱۴۰۵لمریز لېږدیز کال عمومي کانکور په څلور پړاوونو کې واخیستل شو، چې نږدې ۱۲۰ زره داوطلبانو په کې ګډون کړی و.

د لوړو زده‌کړو وزارت د جذب د پلان له مخې، ۷۴ زره او ۵۰۰ کسان به د هېواد دولتي پوهنتونونو او د لوړو زده‌کړو بنسټونو ته د زده‌کړو د دوام لپاره ور وپېژندل شي.

د آزموینو عمومي ادارې زیاته کړې، د کانکور بهیر داسې تنظیم شوی و، چې د هېواد پر کچه ټولو شرایطو پوره کوونکو داوطلبانو ته د ګډون برابر فرصت برابر شي. د همدې مهالوېش له مخې، په لومړي پړاو کې د ۱۵ ولایتونو، په دوه‌یم پړاو کې د ۱۸ ولایتونو، په درېیم پړاو کې د کابل ولایت د دولسمو ټولګیو فارغانو او په څلورم پړاو کې د مخکنیو پړاوونو ناحاضرو داوطلبانو، له هېواده بهر فارغانو، د کوچیانو، د کابل د دیني مدرسو او د څوارلسمو ټولګیو د فارغانو آزموینې واخیستل شوې.

د دې ادارې د مسوولانو د څرګندونو، د کانکور ټول څلور پړاوونه په منظم ډول، له روڼتیا او اغېزناک مدیریت سره او له کومې ستونزې پرته ترسره شول. د دوی په خبره، دغه بهیر د اړینو معیارونو له مخې په منظم، روڼ او د باور وړ ډول مدیریت شو، چې د آزموینو پر بهیر یې د داوطلبانو باور نور هم پیاوړی کړ.

د آزموینو ملي اداره وایي؛ د ۱۴۰۵لمریز کال عمومي کانکور د هېواد له مهمو آزموینو څخه و، چې د روڼتیا، عادلانه ارزونې او اغېزناک مدیریت پر بنسټ په بریالیتوب ترسره شو. د پایلو له اعلان سره به لسګونه زره ځوانان د هېواد د لوړو زده‌کړو بنسټونو ته بریالي شي او په بېلابېلو علمي څانګو کې به د زده‌کړو فرصت ترلاسه کړي.

په دې غونډه کې د اسلامي امارت د بېلابېلو ادارو مسوولانو هم خبرې وکړې؛ د آزموینو عمومي ادارې له هڅو یې ستاینه وکړه، بریالیو داوطلبانو ته یې مبارکي وویله او له هغوی یې وغوښتل، چې له دې فرصت څخه د خپلو وړتیاوو د لوړولو او د هېواد او خلکو د خدمت لپاره اغېزناکه ګټه واخلي.

نړیوال بانک په خپل تازه راپور کې ویلي، چې د خوړو او کرنې د نظامونو اصلاح او بدلون کولی شي په افغانستان کې د خوړو خوندیتوب د پام وړ ښه کړي، کاري فرصتونه رامنځته کړي او د هېواد اقتصادي مقاومت پیاوړی کړي.

په راپور کې راغلي، چې افغانستان، پاکستان، منځنی ختیځ او شمالي افریقا له اقلیمي بدلون، د اوبو له کمښت، جګړو او د خوارځواکۍ له زیاتېدا سره مخ دي. اوس‌مهال په دې سیمه کې له هرو شپږ کسانو یو یې خوړو ته خوندي لاسرسی نه‌لري او ۴۲ سلنه خلک روغتیایي خوړو د برابرولو وس نه‌لري.

د راپور له مخې، تر ۲۰۵۰ زېږدیز کال پورې به د خوړو غوښتنه ۶۷ سلنه لوړه شي.

راپور ګواښ کړی، چې د اقلیمي بدلون، د اوبو کمښت او جګړو له کبله د خوړو ناامني مخ پر زیاتېدا ده او دغو عواملو د کرنې پر سکټور سخت فشارونه وارد کړي دي.

نړیوال بانک ټینګار کړی، چې د خوړو خوندیتوب یوازې د کرنیز تولید پر زیاتولو نه ډاډمنیږي، بلکې د خوړو د ټول نظام له تولید څخه تر لګښت پورې هر اړخیزې اصلاحات غواړي. په دغو اصلاحاتو کې د اکمالاتي ځنځیر پیاوړتیا، د خوړو د ضایعاتو کمول، د زېرمه کولو او لېږد رالېږد ښه کول او د اقلیمي بدلون پر وړاندې د مقاومې کرنې لپاره پانګونه شامله ده.

د راپور له مخې، د خوړو او کرنې نظامونه اوس هم د سیمې په اقتصاد کې مهم رول لري او د کرنې، ټرانسپورټ، پروسس او خوراکي خدمتونو په برخو کې یې میلیونونه کاري فرصتونه رامنځته کړي دي.

نړیوال بانک د راپور له مخې، د کرنې او د خوړو د نظام اصلاحات کولی شي د بېوزلۍ په کمولو، د تغذیې په ښه کولو او په ځانګړي ډول د ځوانانو او د کلیوالو سیمو د اوسېدونکو لپاره د کاري فرصتونو په رامنځته کولو کې مهم رول ولوبوي.

د کندهار والي ملا محمد شیرین آخوند، په افغانستان کې د ترکیې له شارژدافیر سره په لیدنه کې له ترکیې وغوښتل، چې په ځانګړي ډول په کندهار کې د روغتیا، کرنې او پراختیايي پروژو په برخو کې خپلې مرستې پراخې کړي.

د کندهار ولایت مقام د خبرپاڼې له مخې؛ په کابل کې د ترکیې سفارت شارژدافیر صادق آی‌ یلدیز او مل پلاوي یې د شنبې پر ورځ کندهار ته د رسمي سفر پر مهال له والي سره وکتل.

ملا محمد شیرین آخوند له افغانستان سره د ترکیې له اوږدمهالو همکاریو مننه وکړه او څرګندوي، چې ترکیه د ګډو دیني، فرهنګي او تاریخي اړیکو له کبله د افغانستان نږدې دوست هېواد دی. هغه د دواړو هېوادونو ترمنځ د اړیکو د پیاوړتیا او د همکاریو د پراخېدا هیله هم څرګنده کړه.

والي له ترکیې وغوښتل، چې په ولسوالیو او لرې پرتو سیمو کې د روغتیايي مرکزونو په جوړولو، د درملو او طبي تجهیزاتو په برابرولو، د میرویس سیمه‌ییز روغتون او د عینو مېنې د ۳۵۰ بستریز روغتون په تجهیز، د افغان ډاکټرانو او روغتیايي کارکوونکو په روزنه، د کرنې او مالدارۍ په برخه کې د ترکي تجربو په شریکولو، د افغان ناروغانو او سوداګرو لپاره د ویزو د ورکړې په چټکتیا، او همدارنګه د بېرته راستانه شویو کډوالو په مېنو کې د ښوونځیو، دیني مدرسو، روغتیايي مرکزونو او د پاکو اوبو د شبکو په جوړولو کې خپلې مرستې زیاتې کړي.

هغه ویلي، یادې برخې د کندهار له مهمو او بیړنیو اړتیاوو څخه دي.

په خبرپاڼه کې راغلي، چې صادق آی‌ یلډیز د افغانستان د امنیتي وضعیت، د بیارغونې بهیر او نورو پرمختګونو د ستاینې تر څنګ زیاته کړې، چې ترکیې تل هڅه کړې د افغانستان د خلکو ترڅنګ ودرېږي او په اړینو برخو کې ورسره همکاري وکړي. هغه د افغانستان د دوامدار پرمختګ هیله هم څرګنده کړې ده.