تازه خبرونه
امیر خان متقي د مسکو د ناستې په څنډه کې له لاوروف سره وکتل
امیرخان متقي د افغانستان او د سیمې د هېوادونو ترمنځ د سیاسي او اقتصادي پرمختګونو یادونه کړې او هیله څرګندوي، چې د روسیې او اسلامي امارت ترمنځ د ډیپلوماټیکو اړیکو کچه نوره هم زیاته شي.
د افغانستان بهرنیو چارو وزارت چارسمبالي امیرخان متقي د افغانستان په اړه د مسکو د شپږمې ناستې په څنډه کې د روسیې د بهرنیو چارو له وزیر سرګي لاوروف سره وکتل.
د افغانستان اسلامي امارت بهرنیو چارو وزارت په خبرپاڼه کې، چې شنبې پر ورځ خپره شوې راغلي، چې په دې کتنه کې دواړو لورو د دوه اړخیزو سیاسي، اقتصادي اړیکو او سیمهییزو مسایلو په اړه بحث او خبرې وکړې.
د بهرنیو چارو وزارت چارسمبالي دا فورم د افغان حکومت لپاره د ځانګړي ارزښت لرونکی وباله او غوښتنه یې وکړه، چې دا فارمټ دې د افغانستان او د سیمې د هېوادونو ترمنځ د همکاریو د پراختیا پر میکانیزم بدله شي.
امیرخان متقي د افغانستان او د سیمې د هېوادونو ترمنځ د سیاسي او اقتصادي پرمختګونو یادونه کړې او هیله څرګندوي، چې د روسیې او اسلامي امارت ترمنځ د ډیپلوماټیکو اړیکو کچه نوره هم زیاته شي.
هغه په افغانستان کې امنیت او ثبات ته د نغوتې پر مهال ویلي، چې امنیت په افغانستان کې د پانګونې لپاره زمینه برابره کړې ده.
د بهرنیو چارو وزارت د خبرپاڼې پر بنسټ؛ سرګي لاوروف له افغانستان سره په سیاسي او اقتصادي برخو کې د خپل هېواد د اړیکو پر پراختیا ټینګار وکړ او وایي، چې روسي شرکتونه په افغانستان کې د کرنې، کانونو او ټرانسپورټ په برخو کې پانګونې ته لېواله دي.
سرګي لاوروف د سیمې او نړۍ وروستیو بدلونونو ته په کتو د افغانستان وضعیت ته هم نغوته وکړه او څرګندوي، چې افغانستان د سیمې په اقتصادي پیوستون کې مهم رول لوبولی شي.