د بریټانیا حکومت د امریکا د جنګ وزیر پیټ هګسټ پر څرګندونو نیوکه کړې، چې د افغانستان په جنګ کې یې د ناټو د متحدانو ونډه کمه ښودلې وه. د بریټانیا حکومت ویلي، چې د هګسټ څرګندونې د بریټانیا او نورو متحدانو د سرتېرو سرښندنې له پامه غورځوي.

د بریټانیا حکومت ویلي، چې په افغانستان کې د دې هېواد او د ناټو د ځواکونو ونډه کره او مستنده ده او د جګړې پر مهال د زرګونو بریټانیایي کورنیو او د دغه هېواد د متحدانو کورنیو سرښندنې کړې دي.

د بریټانیا د لومړي وزیر ویاند ویلي:« د دغو سرتېرو او د ناټو د نورو ځواکونو سرښندنې د ګډ امنیت د ټینګښت او زمونږ پر یوه متحد د برید په غبرګون کې شوې وې.»

هغه زیاته کړې، چې د دغو ځواکونو د ونډې کم ښودل ناسم کار دی.

د بریټانیا حکومت یادونه کړې، چې په افغانستان کې یې له ۴۵۰ ډېر سرتېري وژل شوي او ټینګار یې کړی، چې د هغوی خدمتونه او سرښندنې به هېڅکله هېرې نه‌شي.

هګسټ، چې په افغانستان کې یې د مینه‌سوټا ایالت د ملي ګارد روزنې دنده لرلې؛ د شنبې پر ورځ په یوه وینا کې دا څرګندونې کړې دي.

هغه ویلي؛ سره له دې، چې په کابل کې د ناټو پر مشرۍ د ائتلاف په مرکزي دفتر کې د ۵۰ هېوادونو استازي حاضر ول، خو یوازې د لږ شمېر هېوادونو ځواکونو د افغانستان په جنګ کې ونډه لرله.

د افغانستان د جګړې پر مهال نږدې ۲۵۰۰ امریکایي سرتېري وژل شوي وه. د  نورو هېوادونو ۳۰ سرتېري هم په دې جګړه کې وژل شوي، چې ۴۵۷ بریټانیایي سرتېري وه.

د روان کال په جنوري کې د امریکا ولسمشر ډونالډ ټرمپ ویلي وه، چې په افغانستان کې د ناټو ځواکونو د جګړې له لومړۍ کرښې واټن ساتلی و. د بریټانیا هغه مهالني لومړي وزیر کېیر سټارمر دغه څرګندونې« سپکوونکې او ټکان ورکوونکې» بللې وې او د بښنې غوښتنه یې کړې وه.

د اسلامي امارت لوړپوړي غړي انس حقاني تېره ورځ د افغانستان فوټبال فډراسیون په لوبغالي کې له نږدې څخه د لوبې د نندارې پر مهال د آریانا سپورټ د خبریال د پوښتنې په ځواب کې ویلي:« انسان سپورټ او تفریح ته اړتیا لري.»

 هغه زیاته کړې:« فوټبال او والیبال مې د خوښې لوبې دي. لوبه هغه وخت ګټل کیږي، چې لوبغاړي پر لوړه روحیه د لوبو ډګر ته ډاډمن ودانګي او ملت ته د بریا راوړلو په فکر کې وي.»

نوموړي د خپلو خبرو په یوه بله برخه کې ویلي، چې افغانستان په بېلابېلو برخو کې د پرمختګ وړتیا لري او دا ځل به د پخواني شوروي اتحاد او امریکا د حضور ورو ته له ورته ستونزو سره مخ نه‌شي.

هغه ویلي:« افغانستان وړتیا لري، چې په هره برخه کې پرمختګ وکړي او په هر ډګر کې له نورو ملتونو سره سیالي وکړي.»

حقاني زیاته کړې، د ماشومتوب پر مهال جګړې، کډوالۍ او د امکاناتو نشتوالی د دې لامل شوی و، چې دی او د ده د هم‌عمره کسانو نسل له هغو فرصتونو بې‌برخې پاتې شي، چې د نن ورځې ځوانان یې په واک کې لري.

د ټولګټو چارو وزارت ويلي، چې له یوه خصوصي سکټور سره یې په پنجشېر کې د ۴۰ میلیون افغانیو پر بودجه د ۴۵ کیلومټره عمومي سړک د بیارغونې لاسلیک کړی، چې چارې یې د شتل ولسوالۍ له دالان‌سنګ سیمې پیل او د بازارک د بهارک تر دوه‌لارې پورې غځېږي.

د ځايي مسوولانو د څرګندونو له مخې، دغه سړک په تېرو وختونو کې د ټیټ کیفیت او د طبیعي پېښو له کبله زیانمن شوی او بنسټیزې بیارغونې ته اړتیا لري.

دا پروژه د سړک د خرابو برخو رغونه او د درزونو ډکول، د ګابیوني دیوالونو جوړول، د سړک د غاړو پاکول، د پلګوټو جوړول او د ویالو او اوبو د تېرېدا د لارو جوړول رانغاړي.

د دې پروژې بودجه د ټولګټو چارو وزارت له‌خوا ځانګړې شوې ده.