د اسرائیلو پوځ د سې‌شنبې پر ورځ( د غبرګولي پر اووه‌ویشتمه ) ادعا وکړه، چې دوی د ایران د خاتم الانبیاء مرکزي مرکز نوی ټاکل شوی قومندان علي شادماني په تهران کې پر نښه کړ.

د اسرائیل پوځ د څرګندونو له مخې، شادماني د ایران رهبر علي خامنه‌یی ته یو له نږدې کسانو څخه و.

هغه څلور ورځې مخکې د خامنه‌یی پر سپارښتنه د غلام علي رشید د ځای ناستي په توګه ټاکل شوی و.

د ایران پوځ د ځمکنیو ځواکونو قومندان کیومرث حیدري ویلي؛ پر اسرائیل د ډرون درانده بریدونه له “نويو او پرمختللو وسلو” سره پیل شوي، چې په راتلونکو ساعتونو کې به پراخ شي.

دغه راز اسرائیلي رسنیو د اسرائیلو د کورني جبهې مرکز د څرګندونو له مخې راپور ورکړی، چې د ډرون له شکمن نفوذ وروسته د ګولان په لوړو کې د خطر زنګونه اورېدل شوي.

رویټرز خبري سرچینې د دوه امریکایي چارواکو د څرګندونو له مخې راپور ورکړی، چې د امریکا ولسمشر ډونالډ ټرمپ د ایران د رهبر علي خامنه‌یی د وژلو له پلان سره مخالفت کړی او هغه یې ویټو کړی دی.

له دې سرچینو څخه د یوې د څرګندونو له مخې؛ د امریکا د حکومت یو لوړ پوړی چارواکی د اسرائیلو دا ذرحه پر ایران له پراخو بریدونو وروسته او د تهران د اټومي پروګرام د بندولو په هڅه کې وړاندیز کړې وه؛ خو لوړ پوړو امریکایي چارواکو دا طرحه رد کړې او وایي: ” تر هغې، چې ایران یو امریکایي نه‌وي وژلی؛ مونږ ان د هغه هېواد د سیاسي مشرتابه د پر نښه کولو په اړه خبرې نه‌کوو.”

سرچینو دا هم تائید کړې، چې له وروستیو بریدونو وروسته د اسرائیلو او امریکایي چارواکو ترمنځ پراخې اړیکې ټینګې شوي او اسرائیل ادعا کړې، چې د ایران د رهبر د وژلو فرصت لري؛ خو ټرمپ یې مخالفت وکړ.

رویټرز لیکلي؛ دا روښانه نده، چې آیا دا مخالفت مستقیماً ټرمپ کړی که د هغه د لوړ پوړو سلاکارانو له لارې رسېدلی دی.

د دې راپور په غبرګون کې د اسرائیلو لومړي وزیر بنیامین نتنیاهو فاکس نیوز ته ویلي: “د هغو خبرو اترو په اړه ډېر ناسم راپورونه شته، چې هیڅکله نه‌دي شوي. زه به په دې بحثونو کې برخه وانخلم.”

دا راپور په داسې حال کې خپریږي، چې د امریکا او ایران ترمنځ ټاکل شوې وه، چې په عمان کې اټومي خبرې اترې ترسره شي؛ خو د تاوتریخوالي او وروستیو اسرائیلي بریدونو له کبله لغوه شوې دي.

دا په داسې حال کې ده، چې پر ایران د اسرائیلو له بریدونو مخکې ټرمپ ویلي وه، چې هغه د اسرائیلي بریدونو له ټولو جزیاتو خبر دی.

د سعودي ولیعهد محمد بن سلمان د ایران له ولسمشر مسعود پزشکیان سره په ټیلیفوني اړیکه کې پر ایران د اسرائیلو بریدونه وغندل او د قربانیانو له کورنیو سره یې خواخوږي څرګنده کړه.

د سعودي ولیعهد د ایران له خلکو څخه د خپل هېواد د ملاتړ تر څنګ ټینګار وکړ، چې: “سعودي عربستان د خپلو ایراني وروڼو تر څنګ ولاړ دی او د هغوی د ملاتړ لپاره به هیڅ هڅه ونه سپموي.”

هغه زیاته کړې؛ “اسلامي نړۍ د ایران په ملاتړ کې متحد ده.”

محمد بن سلمان زیاته کړې؛ ریاض له ټولو ډیپلوماټیکو چینلونو څخه کار اخلي او پر اسرائیلو فشار راوړي، چې خپل تېري ودروي.

نوموړي خبرداری ورکړ، چې د اسرائیلو کړنې د تاوتریخوالي د زیاتولو او د امریکا د مداخلې لپاره لار اواروي.

نوموړی وایي: “د ایران اسلامي جمهوریت لخوا یو هوښیار او محاسبه شوی ځواب کولی شي د هغوی د بدې ګټې اخیستنې مخه ونیسي.”

په دې ټیلیفوني اړیکه کې د ایران ولسمشر د اسرائیلو رژیم هم تورن کړ، چې هڅه کوي په سیمه کې د سولې او ثبات د تامین لپاره د ایران ټولې هڅې ګډوډې کړي.

هغه د حاجیانو د خدمت په برخه کې د سعودي عربستان له همکارۍ څخه مننه وکړه او د اسلامي هېوادونو ترمنځ یې د یووالي غوښتنه وکړه، چې د ” اسرائیلي رژیم د جرمونو، په ځانګړي توګه په غزه کې” مقابله وکړي.

پزشکیان ټینګار وکړ، چې سعودي عربستان، د خپل مذهبي نفوذ او سیمه‌ییز موقعیت په پام کې نیولو سره کولی شي د اسلامي هېوادونو د پیوستون په پیاوړتیا او په ټوله سیمه کې د مسلمانانو د حقونو په ملاتړ کې مهم رول ولوبوي.

دا په داسې حال کې ده، چې د ځینو راپورونو له مخې؛ اسرائیلو له امریکا څخه غوښتنه کړې، چې د ایران پر وړاندې په جګړه کې برخه واخلي.