د کندهار ولایت د پېښو پروړاندې د مبارزې او چمتووالي ریاست د KRO بنسټ پر مالي ملاتړ د کندهار ولایت د سپین بولډک ولسوالۍ د کنډک مانده او کښته شاوليکوټ ولسوالۍ د سوزنیانو او چوغک مانده په اړوند سیمو کې درې د مخکني خبرداري سیسټمونه نصب او رسماً ګټې اخیستنې ته وسپارل.

د یاد بنسټ د خپرې شوې خبرپاڼې له مخې؛ یاد سیسټم له بېلابېلو تخنیکي برخو  جوړ او په لاندې څو برخو کې فعالیت ترسره کوي:

۱: کله، چې سیلابي مانده راشي او خلک ویده یا له خطر څخه ناخبره وي؛ سیسټم زنګ وهي او کلیوال له احتمالي خطر څخه خبروي.

۲: دغه سیسټم د نصب شوې ساحې د اوبو اندازه او د اوبو سرعت معلوموي، چې د خطر د کچې په ارزونه کې یې  اړین رول لري.

همدارنګه د یاد سیسټم د غوره کارونې لپاره ۵ رضاکاران روزل شوي، چې د سیسټم د زنګ وهلو پر مهال د خبرتیا لپاره نور کلیوال هم خبر کړي.

یادې سرچینې زیاته کړې؛ سربېره پر دې د سیستم د دوامداره فعالیت د یقیني کولو لپاره د اړینو تخنیکي اجزاوو اضافي پرزې هم برابرې شوي، چې د کومې احتمالي تخنیکي ستونزې په صورت کې ژر تر ژره بدیلې او وکارول شي.

ویل کیږي، چې د دې سیسټم پر نصب نرینه، ښځې، سپین ږیري او ماشومان د سیلابونو له احتمالي خطرونو څخه خوندي کېږي او د ټولنې د خوندیتوب کچه هم ورسره لوړېږي.

نن( یکشنبه د وري دېرشمه ) په اړګ د افغانستان د رسنیو د معلوماتي سرچینې په توګه د «پرمختګ» نومې اوبپاڼې د مخکتنې مراسم د «ارګ‌پاڼې» د سلمې ګڼې له خپرېدا سره هم‌مهاله د لوړپوړو چارواکو له‌خوا ترسره شول.

په دې مراسمو کې د ریاست‌الوزرا د دفتر رئیس ډاکټر واسع، د عامه پوهاوي پر اهمیت ټینګار وکړ او څرګندوي، چې په نننۍ نړۍ کې معلومات د ټولنو د مدیریت او څارنې لپاره اړین رول لري او اسلامي امارت هم دې موضوع ته ځانګړې پاملرنه کوي.

هغه زیاته کړې؛ اسلامي امارت له رسنیو ملاتړ کوي او ژمن دی، چې خلکو ته د معلوماتو د لاسرسي زمینه برابروي.

د نوموړي د څرګندونو له مخې؛ حکومت د معلوماتو شریکولو ته پرته له سانسوره ژمن دی او هڅه کوي د رسنیو د فعالیت لپاره مناسب شرایط برابر کړي.

دغه راز د اسلامي امارت ویاند ذبیح‌الله ویلي، چې معلوماتو ته لاسرسی کولی شي د خلکو او نظام پر ژوند مثبت اغېز ولري.

هغه ټینګار کړی، چې اسلامي امارت په بېلابېلو برخو کې لاسته راوړنې او پرمختګونه لري او د رسنیو د آسانه لاسرسي لپاره یو معلوماتي بانک جوړ شوی، چې دقیق او مستند معلومات ورته برابر شي.

مجاهد زیاته کړې؛ د دې معلوماتي بانک موخه د پرمختګونو په اړه دقیق معلومات وړاندې کول او د «دښمن» د تبلیغاتو مخنیوی دی.

هغه زیاته کړې، چې په «پرمختګ» اوبپاڼه کې وړاندې کېدونکي معلومات به مسوولانه اداره کېږي او د رسنیو لپاره به د باور وړ سرچینه وي.

نوموړي ویلي: «ویاندویان مسوولیت لري، چې معلومات ژر تر ژره له دې بانک سره شریک کړي، چې خلکو ته ورسيږي.»

دغه راز مجاهد ټینګار کړی، چې رسنۍ باید له دې اوبپاڼې څخه د یوې باوري سرچینې په توګه ګټه واخلي او وایي: «رسنۍ د افغانستان د ملي ګټو پر بنسټ کار کوي او د هېواد په ګټه فعالیت کوي.»

هغه ویلي: «مشران د رسنیو له وروستیو فعالیتونو خبر او خوښ دی.»

دغه راز مجاهد ډاډ ورکړ، چې هېواد کې پاتې رسنۍ ملي ریښي لري او فعالیتونه یې د اعتبار وړ دي.

د افغانستان د آزادو ژورنالیستانو ټولنې رییس حجت‌الله مجددي په دې مراسمو کې ویلي، چې رسنیو د «پاکستان د یرغل» پر مهال خپله مسلکي دنده بشپړه ترسره کړې او دا موضوع ټولو ته څرګنده ده.

هغه زیاته کړې، چې شته امکانات د رسنیو لپاره بسنه نه‌کوي او اسلامي امارت باید د بیان د آزادۍ د پیاوړتیا لپاره نورې آسانتیاوې برابرې کړي.

همدارنګه مجددی د څلور نیول شویو خبریالانو د بښنې غوښتنه وکړه او دا اقدام یې د رسنیزې ټولنې پر وړاندې د ښه نیت نښه وبلله.

مجددي ویلي؛ د اسلامي امارت له راتګ وروسته رسنۍ منظمې او قانونمندې شوې دي او دا کار د بیان د آزادۍ پر وضعیت مثبته اغېز لري.

د اقتصاد وزارت مسلکي مرستیال عبداللطیف نظري ویلي، چې رسنیز جنګ ځانګړی ارزښت لري.

نظري وایي: «په نننۍ نړۍ کې رسنۍ ډېر ارزښت لري. مونږ ډېر پرمختګونه لرو او رسنۍ دا پرمختګونه خلکو او نړۍ ته رسوي.»

د افغانستان د اطلاعاتو او کلتور وزارت د فرهنګ مرستیال عتیق الله عزیزي ویلي؛ معلومات د ولس حق دی او باید دا حق یې مسوولان اداکړي.

عزیزي وایي: دا زمونږ مسوولیت دی، چې ولس له هرڅه خبر شي؛ کامیابه رسنۍ هغه دي، چې له حکومت سره یې اړیکې پرې نه‌شي او چارواکي باید له رسنیو سره مرکې وکړې، چې خلک له اطلاعاتو خبر شي.

د عتیق‌الله عزیزي د څرګندونو له مخې ویاندویان باید پېښې پټې نه‌کړي؛ د خپلو مصالحو په رڼا کې یې تعبیر کړي او هیڅکله چوپه خوله پاتې نه‌شي.

عتیق الله عزیزي دا هم ویلي، چې رسنیو په هېواد کې ستره مبارزه ترسره کړې ده. هغه رسنۍ، چې پاتې دي ملي دي او دا وطن خپل ګڼي او حکومت باید رسنیو ته پاملرنه وکړي.

عزیزي دا ټینګار هم کړی، چې تخطۍ تېروتنه وي که ستره ونه‌اوسې باید وبښل شي او جدي ونه‌ګڼل شي.

د افغانستان د چارو ادارې عمومي رییس نورالحق انور ویلي؛ اسلامي امارت ډېرې لاسته راوړنې لري، چې د ولس د خوشحالۍ سبب ګرځېدلي؛ خو د لاسته راوړنو پر وړاندې د شته خنډونو پر وړاندې باید رسنیزه مبارزه وشې.

نورالحق انور زیاته کړې؛ د دښمن پر وړاندې مبارزه واجب ده او رسنۍ د دې محاذ په لومړي صف کې دي. همدا رسنۍ دي، چې له ولس څخه په دفاع کې غښتلی رول لوبوي.

ویل کیږي، چې ریاست الوزرا مقام رسنیزو هڅو ته؛ ځکه زمینه برابروي، چې  خلکو ته اطلاعات بشپړ او په‌خپل وخت ورسیږي.

د افغانستان لپاره د ازبکستان د ولسمشر ځانګړي استازي عصمت الله ارګاشوف د ناروې له نوي ټاکل شوې سفیرې هلنه سنډ انډرسن سره وکتل او د افغانستان په اړه یې د دوه اړخیزو همکاریو د وضعیت په اړه خبرې وکړې.

د ازبکستان بهرنیو چارو وزارت د څرګندونو له مخې؛ دواړو خواوو د افغانستان د ستونزو د حل په بهیر کې د منظمو خبرو اترو د دوام پر اړتیا ټینګار وکړ.

د غونډې په لړ کې د ناروې سفیرې د افغانستان په اړه د ازبکستان د منسجم سیمه‌ییز دریځ جوړونې له هڅو ستاینه وکړه.

دغه راز په دې ناسته کې د افغانستان د ملي اقتصاد د بیارغونې او د سیمه‌ییزې نښلېدا په پروژو کې د دې هېواد د یوځای کېدا پر امکاناتو نظرونه تبادله شول.

دواړو خواوو په افغانستان کې د ثبات او پرمختګ د ملاتړ لپاره د همکاریو او سیمه‌ییزو تعاملاتو پر پیاوړتیا ټینګار وکړ.