Connect with us

نړۍ

د اوکراین په جګړه کې له ۲۶۰۰۰ ډېر روسي پوځیان وژل شوي

Published

 on

(Last Updated On: غویی ۲۲, ۱۴۰۱)

د اوکراین پوځي چارواکو څرګنده کړې، د روسیې په مشرۍ د پوځي عملیاتو له پیل راپدیخوا له ۲۶۳۵۰ ډېر روسي پوځیان وژل شوي دي.

د یادې سرچینې د څرګندونو له مخې؛ د روسیې د عملیاتو له پیل راپدیخوا ( د فبرورۍ له ۲۴ څخه د می تر ۱۱ ) پورې ۲۶۳۵۰ روسي پوځیان وژل شوي او ۱۹۹ جنګي الوتکې، ۱۶۰ چورلکې او ۱۱۸۷ روسي ټانکونه ویجاړ شوي دي.

په خبرپاڼه کې راغلي؛ دغه راز د روسیې د پوځ ۲۸۵۶ زغره وال ګاډي، ۱۹۹۷ پوځي وسایط، ۱۲ سپکې کروز بېړۍ او کښتۍ، ۳۹۰ بې پیلوټه الوتکې، ۵۲۸ توپخانې، ۱۸۵ راکټ لانچرونه او ۹۴ هوايي دفاعي سیستمونه هم له منځه وړل شوي دي.

له دې مخکې د روسیې دفاع وزارت د مارچ پر ۲۵ د یوې اعلامیې له خپرولو سره تائید کړې وه، چې د اوکراین په جګړه کې ۱۳۵۱ روسي پوځیان وژل شوي دي.

ملګري ملتونه اټکل کوي، چې له اوکراین سره د روسیې د جګړې له پیل راپدیخوا لږ تر لږه ۳۴۵۹ ملکیان وژل شوي او ۳۷۱۳ نور ټپیان دي او اټکل کېږي، چې د وژل شویو اصلي شمېر به تر دې هم ډېر وي.

د یادونې ده، چې تر دې دمه د اوکراین د پوځي تجهیزاتو د ویجاړۍ په اړه څه ویل شوي ندي.

نړۍ

د امریکا یوې جنګي الوتکې د چین شکمن څارګر بالون ویشتلی

Published

on

(Last Updated On: سلواغه ۱۶, ۱۴۰۱)

رویترز راپور ورکړی، چې د امریکا یوې جنګي الوتکې د شنبې پر ورځ د سلواغې ۱۵ د سویلي کارولینا په سواحلو کې یو شکمن چینایي څارګر بالون راوغورځاوه.

امریکا د چین دغه کار پخپل هوایي حریم تېری یاد کړی او ولسمشر جو بایدن د چارشنبه پر ورځ د بالون د رانسکورولو سپارښتنه وکړه.

د پنټاګون د پرېکړې له مخې؛ شکمن څارګر بالون ته به تر هغه وخته په تمه وي، چې د استوګنو له سیمې ووځي او خلاصو اوبو کې ورسیږي او ملکي وګړي ځمکې ته د زرګونه مترو د کثافاتو له راغورزېدو وژغورل شي.

دغه بالون د شمالي امریکا په هوایي حریم کې څو ورځې تېرې کړي او د بیجنګ او واشنګټن تر منځ یې ناندرې راپورته کړي دي.

بایدن ویلي: دوی په دې اړه خپل هوایي برید دا بریالی ترسره کړ.

د امریکا یو لوړ پوړي پوځي چارواکي ویلي؛ په دې ماموریت کې څو جنګي او تېل وړونکو الوتکو برخه اخیستې وه؛ خو یوازې یوه – F-22 جنګي الوتکه، چې د ویرجینیا د لینګلي د هوايي ځواک له اډې پورته شوه د ماسپښین پر ۲:۳۹ یې ډزې وکړې او بالون یې رانسکور کړ.

د رویترز د څرګندونو له مخې؛ چین پر یوه هوایي څېړنیز بالون پوځي برید په کلکه غندلی او پر وینا یې، دا بالون د هوا او نورو ساینسي موخو لپاره کارول کیده او د امریکا فضایي حریم ته ناببره ننوتی او د امریکایي چارواکو اړوند ادعاوې ردوي.

امریکایي چارواکو ویلي؛ بالون د اتلانتیک بحر د امریکا له ساحل څخه شاوخوا شپږ سمندري میله لرې په نسبتاً کمو اوبو کې ویشتل شوی، چې د تجهیزاتو د بېرته ترلاسه کولو په هڅو کې به له چینایانو سره مرسته وکړي.

ویل کیږي، چې د ویشتل شوي بالون ویجاړ تجهیزات ۱۴ متره لاندې ډوب شوي دي.

د چین د بهرنیو چارو وزارت په یوه اعلامیه کې څرګنده کړې؛ چین په ښکاره له امریکا غوښتي، چې دا مسله په ارامه، مسلکي او محدوده توګه وڅېړي. امريکا د زور پر کارولو ټينګار کړې او په ښکاره یې دا ډول غبرګون وښود.

د چین د بهرنیو چارو وزارت د امریکایي سیاستوال او مطبوعات تورن کړي، چې د بیجنګ د بې اعتباره کولو لپاره له وضعیته ګټه اخلي.

د یادې سرچینې د څرګندونو له مخې؛ چین تل په جدي توګه پر نړیوالو قوانینو عمل کړی او د نورو هېوادونو د خومختارۍ او ځمکنۍ بشپړتیا درناوی یې کړی دی.

شنونکیبو ویلي؛ له چین سره د امریکا اړیکې احتمال لري، چې د ۲۰۲۴ ږ. کال د ولسمشریزې سیالۍ یوه پراخه موضوع وي.

د پنتاګون د ارزونې له مخې؛ دا بالون چینايي څارګر بالون دی.

د جمعې پر ورځ  هم وویل شول، چې یو بل چینایی بالون د لاتینې امریکا په فضا کې چورلېدلی دی.

امريکايي چارواکو ويلي: په تېرو څو کلونو کې، چينايي بالونونه پخوا د ختيځې آسيا، جنوبي آسيا او اروپا په ګډون د پېنځه قارو په هيوادونو کې ليدل شوي دي.

د چین شکمن څارګر بالون د امریکا بهرنیو چارو وزیر انتوني بلنکن دې ته وهڅاوه، چې په روانه اوونۍ کې چین ته خپل سفر وځنډوي.

د امریکایي چارواکو د څرګندونو له مخې؛ چینایي بالون د لومړي ځل لپاره د روان ۲۰۲۳ ز. کال د جنورۍ د میاشتې پر ۲۸ د امریکا هوایي قلمرو ته د الاسکا له ایالته داخل شوی، وروسته کانادا ته ولاړ او بېرته څو ورځې وروسته د امریکا هوایي قلمرو ته راغلی و.

Continue Reading

نړۍ

په لاتينه امريکا کې د چين د څارنې یو بل شکمن بالون ولیدل شو- امريکا

Published

on

(Last Updated On: سلواغه ۱۵, ۱۴۰۱)

پنتاګون د جمعې پر ورځ څرګنده کړې؛ د امریکا په آسمان کې د چین له څارګر بالون له لیدلو یوه ورځ وروسته په لاتینه امریکا کې دوه‌یم چینایي څارګر بالون ولیدل شو.

په امریکا کې د تېرې ورځې د څارګر بالون د لیدو له کبله بیجینګ ته د امریکا د بهرنیو چارو وزیر انتوني بلنکن خپل بې ساری سفر لغو کړی و.

د فرانسې ځبري سرچینې څرګنده کړې؛ پنتاګون ویلي؛ لومړی بالون اوس د مرکزي امریکا ختیځ لوري ته روان دی، چې د خلکو د ژغورنې له کبله نه نسکوریږي.

د جمعې پر ورځ، د پنټاګون ویاند پت رایدر څرګنده کړې: مونږ داسې راپورونه لرو، چې یو بالون لاتینې امریکا ته روان دی.

هغه زیاته کړې: اوس مونږ ارزونه کوو، چې دا یو بل چینایي څارګر بالون دی؛ خو د ځای په اړه یې بشپړ څه نه دي ویلي.

بلنکن له یوه لوړ پوړي چینايي چارواکي وانګ یی سره په تیلیفوني اړیکه کې ویلي؛ د امریکا په فضايي حریم کې د دې څارګر بالون شتون د امریکا له ملي حاکمیت او نړیوال قانون څخه ښکاره سرغړونه ده او دا یو نامسوولانه عمل دی.

بلنکن وانګ ته څرګنده کړې؛ امریکا له چین سره دیپلوماتیکو اړیکو ته ژمن دی او زه اراده لرم، چې د فرصت په وخت کې له بیجینګ څخه لیدنه وکړم.

هغه زیاته کړه: لومړی ګام زمونږ له فضا څخه د څارنې توکي لرې کول دي. دا هغه څه دي، چې مونږ پرې تمرکز کوو.

د سينهوا آژانس د خبر له مخې؛ وانګ بلنکن ته وويل: چين يو مسوول هېواد دی او تل يې نړيوال قوانين په کلکه مراعت کړي دي.

هغه وايي، چې چین هیڅ بې بنسټه اټکل او شور ماشور نه مني او له دواړو خواو یې وغوښتل، چې له ناسمو قضاوتونو څخه ډډه وکړي او اختلافات اداره کړي.

Continue Reading

نړۍ

په ۲۰۲۵ ز. کال کې د امریکا او چین د جګړې شونتیا ډېره ده ـ امریکایي جنرال

Published

on

(Last Updated On: سلواغه ۱۱, ۱۴۰۱)

د ۱۱۰ زره سرتېرو د یو امریکایي جنرال د یوه یادښت له مخې امریکا به په راتلونکیو دوه کلونو کې له چین سره جګړې ته ورودانګي.

دغه امریکايي څلور ستوریز جنرال، چې د هوايي څانګې مسوول دی او د الوتکو د تېلو څارنه کوي؛ په خپل یوه یادښت کې تر خپلې قومندې لاندې ۱۱۰ زره پوځیانو ته خبرداری ورکوي، چې امریکا به په راتلونکیو دوه کلونو کې له چین سره جګړې ته ولاړه شي.

دا یادښت لومړی په ټولنیزو رسنیو کې خپور او بیا د پنتاګون لخوا تائید شو، چې بنسټیزه موخه یې د جګړې مخنیوی او د اړتیا په صورت کې د چین ماتول دي.

  د دغه امریکايي جنرال د استدلال پر بنسټ، امریکا او تایوان په ۲۰۲۴ ز. کال کې د ولسمشرۍ ټاکنې ترسره کوي، چې په کې د واشنګتن د چارواکو د وېشلو شونتیا هم لیدل کیږي او په پایله کې به یې چین ته دا فرصت رامنځته شي، چې پوځي هڅې وکړي او تایوان له خپلې خاورې سره بېرته ونښلوي.

چينايي چارواکو تل د امريکا او تايوان د اړيکو نږدیوالی په ځانګړي توګه د دواړو خواوو ترمنځ پراخې پوځي همکارۍ پاروونکې او د دوی د ملي امنيت پر ضد ګڼلي.

تايوان ۲۴ میليون وګړي لري او د بیجنګ د څرګندونو له مخې د چين يوه برخه ده، چې له ۱۹۴۹ ز. کال راپدیخوا له خپلې اصلي ځمکې څخه بېل شوی دی.

د چين او امريکا ترمنځ اړيکې په تېرو کلونو کې د بېلا بېلو مسايلو لکه تايوان، جنوبي چين سمندرګي، شمالي کوريا او اقتصادي مسايلو له کبله ترينګلې پاتې دي؛ خو تایوان ته د امريکا د ولسي جرګې د ریيسې نانسي پلوسي له سفر وروسته د دواړو هېودونو ترمنځ لفظي او ديپلوماتيکه ترينګلتيا په بې ساري توګه زياته شوې ده.

Continue Reading

Trending

Copyright © 2022 Ariana News. All rights reserved!