د ریاست الوزراء د اقتصادي مرستیال ملا عبدالغني برادر له‌خوا په کندهار ولایت کې د دوه میلیون ډالرو پر ارزښت د کرنیزو محصولاتو د آزموینې او ارزونې لومړنی لابراتوار پرانسیستل شو.

د دې لابراتوار د پرانیستې په مراسمو کې ملا برادر وویل، چې د اوږدې مودې راپدېخوا مو د خاورې او اوبو په اړه د لابراتواري خدماتو د نشتوالي له کبله کرنیز سکټور زیانمن او حاصلات کم پاتې شوي دي.

نوموړي د دې لابراتوار فعالیت د هېواد د کرنیزو محصولاتو د کیفیت او ارزښت ښه کولو لپاره یو اړین ګام ګڼلی دی.

دا لابراتوار د کرنیزو محصولاتو د کیفیت ارزولو، د نباتي ناروغیو د تشخیص او د کورنیو محصولاتو د معیاري کولو لپاره د پراخو آسانتیاوو د رامنځته کولو لپاره جوړ شو.

د دې لابراتوار چارواکو ویلي، چې دا مرکز د نړیوالو معیارونو پر بنسټ جوړ شوی او له ټولو زاویو څخه د کرنیزو محصولاتو د آزموینې او ارزونې وړتیا لري.

د لابراتوار مشر ضیاء الحق وزیرزي وایي: “دا لابراتوار په افغانستان کې دننه ټول افغان صادرات له هغو معیارونو سره برابروي، چې نړۍ ورته اړتیا لري.”

که څه هم د افغانستان کرنیز محصولات ښه کیفیت لري؛ خو بیا هم نورو معایناتو ته اړتیا شته او محصولات مو باید له نړیوالو معیارونو سره برابر وي.

د اسلامي امارت بهرنیو چارو وزیر امیر خان متقي په افغانستان کې د سکټوري وزارتونو او د ملګرو ملتونو اړوند ادارو ترمنځ د همغږۍ په پېنځمه غونډه کې د افغانستان له خلکو سره د نړیوالې ټولنې او ملګرو ملتونو پر دوه ګونو اړیکو سخته نیوکه وکړه.

امیر خان متقي په خپله وینا کې ټینګار کړی، چې اسلامي امارت باید د کډوالو د راستنېدا د بهیر مدیریت، د روږدو کسانو درملنې، له بېوزلۍ او بې کارۍ سره مبارزې، د اقلیمي بدلون اغېزو مخنیوي او بزګرانو ته د مخدره توکو د بدیل کښت په اړینو برخو کې عملي ګامونه پورته کړي.

د بهرنیو چارو وزیر د څرګندونو له مخې؛ سره له دې، چې مالي محدودیتونه روان دي اسلامي امارت توانیدلی، چې د دې ننګونو یوه لویه برخه حل کړي؛ خو نړیوالې مرستې د دې بهیر د اغېزمن پرمختګ لپاره کافي ندي.

د نړیوالې ټولنې پر دوه ګونو کړنو د نیوکې تر څنګ هغه ویلي، چې له سیاسي مسلو سره د بشري مسلو تړل د افغانانو پر ژوند منفي اغېز لري.

متقي په افغانستان کې د ملګرو ملتونو پر دفترونو د نیوکې پر مهال زیاته کړې: سره له دې، چې هېواد یې نړیوالې همغږۍ او همکارۍ ته اړتیا لري؛ خو د دغو ادارو په رسمي غونډو کې د افغانستان استازي ګډون نلري.

د بهرنیو چارو وزیر خبرداری ورکړ، چې د سیاسي ملاحظاتو له کبله افغانان له اړینو مرستو او همغږۍ بې برخې دي.

هغه ټینګار کړی؛ په ټول افغانستان کې د بشري مرستو د وېش لپاره زمینه برابره ده او دا مرستې باید په داسې ډول اداره شي، چې د خلکو پر ژوند مثبت او تلپاتې اغېز ولري.

امیر خان متقي پر پاکستان د نیوکې پر مهال وویل: دوی په داسې حال کې، چې افغانان له خپلو کورونو وباسي؛ خو هېواد ته یې د راستنېدا لارې هم بندوي.

د افغانستان او ایران ترمنځ د اقتصادي همکارۍ د پراختیا په لړ کې د هېواد د سوداګرۍ او پانګونې خونې د مدیره پلاوي غړی کمال الدین توحید د افغانستان او ایران د ګډې خونې د نوي مشر په توګه معرفي شو.

د صنایعو او سوداګرۍ وزارت د څرګندونو له مخې؛ دا پرېکړه په داسې وخت کې رامنځته شوې، چې افغانستان د سیمې او نړۍ له هېوادونو سره د اقتصادي اړیکو پیاوړتیا او پراختیا ته ډېره اړتیا لري.

د شته ننګونو د حل او د سوداګریزو فرصتونو د پراخولو لپاره نوموړی د خصوصي سکټور له‌خواد ریاست الوزراء اقتصادي مرستیالۍ ته وړاندیز او وروپېژندل شو.

له یوې هر اړخیزې بیاکتنې وروسته د اسلامي امارت اقتصادي مرستیالۍ نوموړی، چې د افغانستان او ایران د سوداګریزو اړیکو په برخه کې فعال او اغېزمن سوداګر پیژندل کیږي؛ د دواړو هېوادونو د ګډې خونې د نوي مشر په توګه منظور او ومنل شو.

تمه ده، چې د نوي مشرتابه د کار له پیل سره به د دوه اړخیزې سوداګرۍ د پیاوړتیا، د سوداګرو د ستونزو د حل او د دواړو هېوادونو ترمنځ پانګونې ته غوره فرصتونه برابر شي.