د  ملګرو ملتنو او نورو مرستندویو بنسټونو مرستې افغانانو ته اړینې دي

د رییس الوزرا اداري مرستیال عبدالسلام حنفي وايي، په افغانستان کې د ملګرو ملتونو ټولنې فعالیتونه او بشري مرستې د افغانستان د خلکو لپاره اړینې دي.

عبدالسلام حنفي په افغانستان کې د ملګرو ملتونو د سرمنشي د ځانګړي استازي له مرستیال رامز الاکبروف سره په کتنه کې په هېواد کې د ملګرو ملتونو او مرستندویه موسسو فعالیتونه حیاتي وبلل او د مرستو د دوام غوښتنه يې وکړه.

د رییس الوزرا اداري مرستيال عبدالسلام حنفي په افغانستان کې د ملګرو ملتونو د سرمنشي د ځانګړي استازي له مرستيال سره په کتنه کې ویلي، چې په افغانستان کې د  دې ټولنې او نورو مرستندویو بنسټونو مرستې د افغانستان د خلکو لپاره مهمې دي.

هغه د افغانستان خلکو ته د مرستو رسولو د بهیر پر دوام ټینګار وکړ.

دغه راز د بهرنیو چارو وزیر امیرخان متقی  د جاپان له سفیر سره وکتل او دواړو لوریو پر سیاسي مسایلو، بشري همکاریو او د افغانستان او سیمې پر روانو حالاتو خبرې وکړې.

په دې کتنه کې د مثبتو ګامونو د پورته کولو په خاطر د افغانستان او نړۍ ترمنځ پر نور ښه تعامل ټینګار وشو.

په افغانستان کې د ملګرو ملتونو د سرمنشي ځانګړي استازي مرستیال رامز الاکبروف په افغانستان کې د ملګرو ملتونو سازمان او اړوندو ادارو له فعالیتونو او بشري مرستو څخه د اسلامي امارت د ملاتړ قدرداني وکړه.

د اسلامي امارت چارواکي وايي، چې د افغانستان خلکو ته باید بشري مرستې په هر ډول شرایطو کې باید ورکړ شي او بشري مسایل باید له سیاسي مسایلو سره ونه تړل شي.