د افغانستان لپاره د امریکا سفارت چارسمبالې کرن ډيکر ويلي، چې په دوحه کې د افغانستان په اړه د څلورمې غونډې ته چمتووالی روان دی.

د دوحې له درېیمې غونډې درې اوونۍ وروسته د افغانستان لپاره د امریکا سفارت چارسمبالې ويلي: د دوحې څلورمه غونډه په لاره ده؛ خو د دې مهمې غونډې له جوړېدو مخکې ډېرو خبرو ته اړتیا ده.

 کرن ډیکر وايي، د دوحې له راتلونکې غونډې مخکې ډېرو خبرو ته اړتیا ده.

هغه وایي: د افغانستان لپاره د ملګرو ملتونو ځانګړې استازې ویلي، چې له اسلامي امارت سره د اړیکو ټینګول د لویدیځو هېوادونو غوښتنه ده.

کرن ډیکر د افغانستان په اړه د دوحې د درېیمې غونډې په اړه په یوه مجازي غونډه کې ویلي، چې په دې سرمشریزه کې د هېوادونو اکثرو ځانګړو استازو په خپلو څرګندونو کې د ملګرو ملتونو د خپلواکې ارزونې او د افغانستان لپاره د ملګرو ملتونو د ځانګړي استازي له ټاکلو ملاتړ وکړ.

میرمن ډیکر زیاتوي؛ په افغانستان کې ستونزې ډېرې پېچلې دي او ملګري ملتونه غواړي، چې د حل لپاره یې خپل ځانګړی استازی وټاکي.

هغې ویلي، چې د افغانستان لپاره د ملګرو ملتونو د ځانګړي استازي د ټاکلو موضوع اوس هم د میز پر سر ده.

کرن ډیکر وایي: استازو ملګرو ملتونو ته څرګنده کړې، چې د افغانستان بهیر ډېر پېچلې دی او بايد يو څوک يې مسووليت پر غاړه ولري؛ نو د دې ټولو د تنظيم لپاره د مرکزي څېرې د ټاکلو خبره اوس هم پر مېز پرته ده.

نوموړې دا هم ویلي، چې د دوحې په درېیمه غونډه کې د هېوادونو ځانګړو استازو د افغان ښځو له حقونو ملاتړ وکړ او لنډمهالي حکومت ته یې خبرداری ورکړ، چې د نیمايي نفوس له څنډې ته کولو سره به دا هېواد پرمختګ ونکړي.

کرن ډیکر ټینګار کوي، چې نړۍ د افغانستان د اوسني حکومت په اړه د چارواکو د کړونو له مخې قضاوت کوي.

هغې زیاته کړې، چې په عمل کې داسې څه ندي شوي، چې بندیزونه لرې شي او یا له نړیوالې ټولنې سره سرپرست حکومت مدغم شي.

هغه وایي: مونږ د طالبانو غوښتنو ته تسلیم شوي نه یوو؛ طالبان داسې غوښتنې لري، چې ورته رسیدلي ندي.

دوی غواړي، چې کنګل شوې پیسې ازادې شي، بندیزونه لرې شي، په ملګرو ملتونو کې د افغانستان څوکۍ طالبانو ته ورکړ شي؛ خو دا ډول کارونه شوي ندي.

د رییس الوزرا سیاسي مرستیال د یوناما له مشرې روزا اوتنبایوا سره د دوحې د درېیمې ناستې د لاسته راوړنو او له نړیوالې ټولنې سره د اسلامي امارت د اړیکو په اړه خبرې وکړې.

ارګ په یوه بیان کې ویلي، روزا اتنبایوا د اسلامي امارت او نړیوالې ټولنې ترمنځ په لوړه کچه خبرې اترې د رغنده اړیکو د ټینګښت لپاره مهمې وبللې.

ویل کیوي، چې د دوحې د وروستۍ ناستې د پرېکړو پر بنسټ د افغانستان د خصوصي او بانکي سکټورونو د ملاتړ او له نشه‌يي توکو سره د مبارزې لپاره د دوه کمیټو پر جوړولو کار روان دی او یو شمېر پرمختللیو هېوادونو هم په دې برخه کې لېوالتیا ښودلې ده.

نن چارشنبه د زمري درېیمه په لوګر ولایت کې د مس عینک پروژې د سړک جوړولو کار د اسلامي امارت او چینایي لوړ پوړیو چارواکو په شتون کې پیل شو.

د ریاست الوزراء اقتصادي مرستيال ملا عبدالغني برادر په دې مناسبت جوړو شويو مراسمو کې د مس عينک پروژه يوه له اړینو او حياتي پروژو څخه وبلله او زیاتوي، چې د دې پروژې د عملي کار پيل له اوږده وخت را په دیخوا ځڼدېدلی و او اوس دا اړینه ده، چې کار یې پیل شي.

د اقتصادي مرستیال د دفتر د خبرپاڼې له مخې؛ ملا برادر د پروژې د قراردادي شرکت مسوولینو ته ډاډ ورکړ، چې په افغانستان کې د پروسس پر مهال د زهرجنو موادو د له منځه وړلو لپاره کافي مواد شته او دا ستونزه په بشپړه توګه حل شوې او د کار د پیل لپاره هیڅ ډول خنډ شتون نلري.

هغه زياته کړې، د افغانستان بانک ته يې امر کړى، چې د پروژې د پيسو په لېږد کې له قراردادي شرکت سره همکاري وکړي.

نوموړي دغه راز قراردادي شرکت ته د پروژې د بشپړ امنیت ډاډ هم ورکړ.

په دې مراسمو کې د کانونو او پټرولیم وزارت چارسمبالي هدایت الله بدري، د اطلاعاتو او کلتور وزارت چارسمبالي خیرالله خیرحوا، د چین د اطلاعاتو او کلتور وزارت مرستیال، په افغانستان کې د چین سفیر، د مس عینک د قراردادي شرکت رییس او تخنیکي ډلې “ام سي سي” او د خصوصي سکټور استازو شتون ګډون کړی و.

اړوند خبرونه: 

د کانونو وزارت د هرات حوزې د تېلو استخراج  لپاره د شرکتونو د اسنادو ارزول پیل کړل

د افغانستان لپاره د پاکستان ځانګړي استازي اصف دراني ویلي، تحریک طالبان پاکستان د اسلام‌آباد سره کرښه ده او اسلامي امارت باید د دې ډلې پر وړاندې اغېزمن ګامونه پورته کړي.

اصف دراني د سیمه‌ییزو مطالعاتو په انسټیټیوټ کې د پاکستان- افغانستان اړیکې: ننګونې او فرصتونه تر سرلیک لاندې غونډې ته په وینا کې ویلي: له افغانستان څخه د ترهګرۍ سرچینه نه یوازې د پاکستان، بلکې د نورو ګاونډ هېوادونو لکه چین، ایران، ازبکستان او تاجکستان لپاره هم د اندېښنې وړده.

هغه له اسلامي امارت وغوښتل، چې د تروريستي ډلو پر وړاندې کوټلي ګامونه پورته کړي.

دغه راز درانی ویلي: مونږ باید له افغان حکومت سره له زغم پر ډکه اراده معامله وکړو. پاکستان په افغانستان کې سوله او ثبات غواړي.

دا څرګندونې یوه ورځ وروسته له هغې را پړرته کېږي، چې د پاکستان پوځ د خیبر پښتونخوا ایالت په دیر سیمه کې درې وسلوال، چې غوښتل یې له افغانستان څخه پاکستان ته ننوځي؛ وژلي دي.

د افغانستان لپاره د پاکستان ځانګړي استازي دا هم ویلي، چې هېواد یې په افغانستان کې داسې ټولنیز، اقتصادي او سیاسي شرایط غواړي، چې له درې میلیون زیاتو افغان کډوالو ته د ستنېدو زمینه برابره کړي.

نوموړي له نړيوالې ټولنې په ځانګړي توګه د ملګرو ملتونو د کډوالو چارو له عالي کمیشنرۍ څخه وغوښتل، چې خپل هېواد ته د افغان کډوالو د باعزته راستنېدو لپاره ستراتيژي جوړه کړي.

اصف دراني ویلي، د کوکنارو د له منځه وړلو لپاره د افغان حکومت هڅې په دوحه کې د ملګرو ملتونو په وروستۍ غونډه کې تائید شوې.

هغه دغه راز د پاکستان او افغانستان ترمنځ د سوداګریزو خنډونو د لرې کولو، منځنۍ آسیا ته د پاکستاني مالونو د لېږد او د سیمه‌ییزو ارتباطي پروژو لکه د ټاپي د ګازو نللیکې پروژه او د کاسا ۱۰۰۰ برښنا د لېږد لین د غځولو غوښتنه وکړه.

په افغانستان کې د پاکستان پخواني سفیر ابرار حسین هم د دواړو هېوادونو په اړیکو کې د پولو پر مدیریت ټینګار کړی دی.

هغه د افغانستان او پاکستان ترمنځ د خلکو د اړیکو او په لوړه کچه د ډیپلوماټیکو اړیکو ستاینه وکړه.

حسیني د سیمې له هېوادونو هم وغوښتي، چې له ترهګرۍ سره د مبارزې په برخه کې له اسلامي امارت سره مرسته وکړي.

پاکستاني چارواکو په وار وار ادعا کړې، چې پر حکومتي ځواکونو د بريدونو ريښې په افغانستان کې دي؛ خو اسلامي امارت دغه ادعاوې رد کړي او څرګندوي، چې دوی دې خپلې ستونزې ته په خپله خاوره کې د حل لار وګوري.