د زیمبابوې لوبډله د غوره توپ‌وهنې پر مټ د افغانستان پر وړاندې په لومړۍ ټسټ لوبه کې د مساوي پایلې پر ترلاسه کولو بریالۍ شوه. کریګ اروین او ویسلي ماډهویر د لوبې په وروستۍ ورځ ناسوځېدلې سلیزې وکړې.

زیمبابوې د لوبې پنځمه او وروستۍ ورځ د درې لوبغاړو پر سوځېدا د ۱۶۴ منډو پر لرلو پیل کړه او د دوه‌یمې پاڼۍ په پای کې یې د پنځه لوبغاړو پر سوځېدا ۵۲۳ منډې وکړې.

دې لوبډلې په لومړۍ پاڼۍ کې هم ۵۰۴ منډې کړې وې. دا د ټسټ کرکټ په تاریخ کې لومړی ځل دی، چې یوه لوبډله په دواړو پاڼیو کې له ۵۰۰ ډېرې منډې کوي.

کریګ اروین په ۲۰۶ منډو ناسوځېدلی پاتې شو او ویسلي ماډهویر هم ۱۰۰ منډې وکړې او ونه‌سوځېد. دغو دوه لوبغاړو د ورځې په اوږدو کې د افغانستان د توپ اچوونکو پر وړاندې ټینګه لوبه وکړه.

۴۱ کلن او ۸۲ ورځنی کریګ اروین د ټسټ کرکټ په تاریخ کې درېیم زوړ لوبغاړی شو، چې دوه‌سوه منډې کوي.

افغانستان په خپله لومړۍ پاڼۍ کې ۵۱۴ منډې کړې وې. افغان لوبډلې د کوربه لوبډلې تر فشار لاندې راوستلو لپاره د زیمبابوې د لوبغاړو ژر سوځولو ته اړتیا لرله؛ خو د زیمبابوې توپ‌وهونکو په داسې لوبغالي کې، چې د توپ اچوونکو لپاره یې چندان مرسته نه لرله، په حوصله او دقت لوبه وکړه.

برایان بنیټ له پنځوس ډېرې منډې وکړې؛ خو محمد سلیم وسوځاوه.

د زیمبابوې نوي لوبغاړي انټم نقوي هم ۶۱ منډې وکړې. نقوي او اروین د ۱۴۰ منډو ملګرتیا وکړه؛ خو عبدالمالک د دوی ملګرتیا ماته کړه.

دغه راز ویسلي ماډهویر له اروین سره یوځای شو او دواړو د شپږمې ویکټې لپاره د ۲۰۸ منډو ناسوځېدلې ملګرتیا وکړه، چې د زیمبابوې د ټسټ کرکټ په تاریخ کې د دې ویکټې لپاره تر ټولو لوړه ملګرتیا ده. ماډهویر په همدې ملګرتیا کې خپله لومړنۍ ټسټ سلیزه هم ثبت کړه.

له دې پایلې سره دواړه لوبډلې د دوه‌یمې او وروستۍ ټسټ لوبې په درشل کې مساوي دي.

ټاکل شوې، چې دا لوبه د لړم پر ړوه‌ویشتمه / د نومبر پر دیارلسمه په شارجه کې پیل شي.

د افغانستان له ۱۹ کلنو ټیټ عمره کرکټ ملي لوبډلې د آسیا جام سیالیو په لړ کې سریلانکا ته د ۱۰۶ منډو پر توپیر ماتې ورکړه او په دې سیالیو کې یې خپله درېیمه پرله‌پسې بریا ثبت کړه.

سریلانکا پچه وګټله او لومړی یې د توپ اچونې پرېکړه وکړه.

افغانستان په ۴۹.۵آورونو کې د ټولو لوبغاړو پر سوځېدا ۲۷۵ منډې جوړې کړې.

سبحان زاخېل د توپ‌وهنې په برخه کې وځلېد او پر ۱۱۱ توپونو یې ۱۰۷ منډې وکړې.

عبدالله نادرجان هم پر ۶۴ توپونو ۵۵ منډې جوړې کړې او د افغانستان په بریا کې یې مهمه ونډه ولرله.

سریلانکا ټاکل شوي هدف ته د رسېدا لپاره په ۳۴.۱آورونو کې د ټولو لوبغاړو پر سوځېدا ۱۶۹ منډې وکړې او د ۱۰۶ منډو پر توپیر یې ماتې وخوړه.

نورعلي نیازي د افغانستان لپاره تر ټولو ښه توپ اچونه وکړه او څلور لوبغاړي یې وسوځول. نوموړي په تېره لوبه کې هم د مالیزیا پر وړاندې ښه لوبه کړې وه او شپږ لوبغاړي یې سوځولي وه.

دا په سیالیو کې د افغانستان درېیمه پرله‌پسې بریا ده. د هېواد له ۱۹ کلنو ټیټ عمره لوبډلې له دې مخکې بنګله‌دېش او مالیزیا ته هم ماتې ورکړې وې.

د یکشنبې پر ورځ د افغانستان ۱۷ کلنو فوټبال ملي لوبډلې د ۲۰۲۷آسیایي ملتونو جام ته د لار موندنې سیالۍ د کوربه میانمار پر وړاندې د ۴ پر ۱ له بریا سره پیل کړې.

محمد فهیم حماس د درې ګولونو پر وهلو د دې لوبې غوره لوبغاړی و او طیب قادري هم یو ګول وواهه، چې له دې سره افغانستان په A ګروپ کې خپلې لومړۍ درې نمرې ترلاسه کړې.

طیب قادري په نهمه دقیقه کې د افغانستان لومړی ګول وواهه او شپږ دقیقې وروسته محمد فهیم حماس د افغانستان د ګولونو شمېر دوه ته ورساوه.

حماس په درویشتمه دقیقه کې یو ځل بیا د میانمار دروازه پرانیسته او لومړۍ نیمايي د افغانستان د ۳ پر صفر له بریا پای ته ورسېده.

د افغانستان ملي لوبډلې په دوه‌یمه نیمايي کې هم خپله برلاسي وساتله او حماس د دې نیمايي له پیل څلور دقیقې وروسته خپل درېیم ګول وواهه او هټریک یې بشپړ کړ.

د میانمار لوبډلې په شپږپنځوسمه دقیقه کې د پنالټۍ له لارې یو ګول وواهه؛ خو افغانستان په پای کې دا لوبه ۴ پر ۱ وګټله.

افغانستان په دې سیالیو کې له انډونیزیا، میانمار، فیلیپین او کمبودیا سره په یوه ګروپ کې دی او په خپله راتلونکې لوبه کې به د چارشنبې پر ورځ له کمبودیا سره مخ شي.