د افغانستان اسلامي امارت د ریاست‌الوزراء اداري مرستیال عبدالسلام حنفي د افغانستان په چارو کې د ملګرو ملتونو د سرمنشي له نوې ځانګړې استازې رباب فاطمه او مل پلاوي سره لیدلي او د همکاریو پر پراختیا، د راستنو شویو کډوالو پر وضعیت او د هېواد د اقتصادي پراختیا پر بهیر یې خبرې کړې دي.

 رباب فاطمه په دې لیدنه کې د افغانستان خلکو ته د خدمت کولو له فرصت څخه خوښي څرګنده کړې او په هېواد کې یې ترسره شویو پرمختیايي فعالیتونو ته پر نغوته د افغانستان د اقتصادي ودې او آبادۍ لپاره د هڅو پر دوام ټینګار کړی دی.

د ملګرو ملتونو ځانګړې استازې ویلي، چې دا ټولنه د بشري مرستو د همغږۍ ترڅنګ هڅه کوي له افغانستان سره خپلې همکارۍ په بېلابېلو برخو کې پراخې کړي.

د نوموړې د څرګندونو له مخې؛ بزګرانو ته د بدیل معیشت برابرول، د کاري فرصتونو رامنځته کول او راستنو شویو کډوالو ته د مرستو وېشل د دې همکاریو مهمې برخې دي.

هغې د راستنو شویو کډوالو د وضعیت د سمبالښت په برخه کې د اسلامي امارت د مسوولانو له هڅو ستاینه کړې او د هغوی د بېرته راستنېدو بهیر مدیریت یې د افغانستان له سترو ننګونو څخه بللی دی.

دغه راز عبدالسلام حنفي ویلي، چې څه باندې اته میلیون کډوال هېواد ته راستانه شوي او اسلامي امارت به د هغوی د ستونزو د اواري او همکارۍ لپاره له هیڅ راز هڅو ډډه ونه‌کړي.

عبدالسلام حنفي ټینګار کړی، چې اړوند ادارې باید د راستنو شویو کډوالو د حقونو د ملاتړ، د کاري فرصتونو د برابرولو او د هغوی لپاره د سرپناه جوړولو په برخه کې ډېرې هڅې او همغږي وکړي.

له افغانستان سره د بشري همکاریو پراختیا او د میلیونونو راستنو شویو کډوالو وضعیت ته رسېدنه د دې لیدنې له مهمو محورونو څخه کڼل شوي دي.

#آریانانیوز #افغانستان #ملګري‌ملتونه #راستنېدونکي‌کډوال #بشري‌مرستې

د افغانستان او ازبکستان خصوصي سکټور په کابل کې یوې غونډې ته د دواړو هېوادونو د شاوخوا ۸۰ شرکتونو د استازو په حضور کې د ۱۵۱.۱۶ میلیون امریکايي ډالرو پر ارزښت لسګونه سوداګریز هوکړه‌لیکونه لاسلیک کړل.

دغه هوکړه‌لیکونه د دواړو هېوادونو د اقتصادي او سوداګریزو برخو په بېلابېلو برخو کې لاسلیک شوي دي.

د افغانستان سوداګرۍ او پانګونې خونې مرستیال مجیب‌الرحمن شېرزاد د کابل او تاشکند ترمنځ د اقتصادي همکاریو پراختیا د دواړو هېوادونو لپاره مهمه بللې او د سوداګریزو راکړو ورکړو پر زیاتوالي یې ټینګار کړی دی.

دغه راز د ازبکستان د صادروونکو ټولنې مشر یارقین ملکوف ویلي، چې د دواړو هېوادونو ترمنځ د سوداګرۍ کچه، چې پخوا ۸۰ میلیون ډالره وه؛ اوس له یو میلیارډ او ۸۰۰ میلیون ډالرو اوښتې ده.

همدارنګه نوموړي په افغانستان کې پانګونې او د ګډو شرکتونو جوړولو ته د ازبکستاني سوداګرو لېوالتیا څرګنده کړې ده.

د دغو هوکړه‌لیکونو لاسلیک په داسې حال کې کېږي، چې د کرنې او مالدارۍ وزارت د مرستیال پر مشرۍ د افغانستان یو پلاوی هم ازبکستان ته تللی او د هغه هېواد له چارواکو سره د کرنې او همکاریو پر پراختیا خبرې کړې دي.

د افغانستان ملي دفاع وزارت د وسله‌والو ځواکونو لوی درستیز فصیح‌الدین فطرت د دفاعي ځواکونو د فراغت په مراسمو کې د وینا پر مهال ويلي، وسله‌وال ځواکونه د هېواد د خپلواکۍ، ځمکني بشپړتیا او د خلکو د امنیت ساتنې لپاره بشپړ چمتووالی لري.

فطرت زیاته کړی، چې افغانستان د مجاهدینو د مبارزې او سرښندنو په پایله کې خپلواکي ترلاسه کړې او د دې خپلواکۍ د ساتنې لپاره مجهز، مسلکي او خپلواک پوځ ته اړتیا لري.

د نوموړي د څرګندونو له مخې؛ د پرمختللیو وسلو په کارولو کې روزنه او عصري پوځي تجهیزاتو ته لاسرسی د وسله‌والو ځواکونو له مهمو اړتیاوو څخه ګڼل کیږي.

هغه ویلي؛ د پیاوړي پوځ د جوړولو موخه پر نورو هېوادونو تېری نه، بلکې د احتمالي تېري او زور زیاتي پر وړاندې د افغانستان دفاع ده.

د وسله‌والو ځواکونو لوی درستیز د پوځ او اقتصاد په برخو کې پر خپلواکۍ ټینګار کړی او څرګندوي، اسلامي امارت له ټولو هېوادونو سره د ښو اړیکو غوښتونکی دی؛ خو هیچا ته به اجازه ورنه‌کړي، چې د افغانستان اقتصاد او چارې تر خپلې څارنې لاندې راولي.

فطرت د پاکستان له‌خوا د سرحدي لارو د تړل کېدا په اړه ویلي، چې دغه هېواد د صادراتو پر مهال لارې تړي او د وارداتو پر مهال یې پرانیزي؛ خو اسلامي امارت د دې ډول پرېکړو پر وړاندې اقدام کړی دی.

نوموړي ویلي، چې افغانستان په تېرو پنځه کلونو کې له امنیت او آرامۍ برخمن پاتې دی او په بېلابېلو برخو کې یې پرمختګ کړی دی؛ خو ځینې هېوادونه دا وضعیت نه‌شي زغملی او د افغانستان د کمزوري کولو هڅې کوي.

د وسله‌والو ځواکونو لوی درستیز فصیح‌الدین فطرت وايي، د اسلامي امارت دروازې د مخالفانو پر مخ پرانیستې دي او هغوی کولای شي هېواد ته راستانه شي؛« آرام او له عزته ډک» ژوند غوره کړي.

نوموړي خبرداری ورکړی، که دغه کسان یو ځل بیا د بهرنیانو پر لارښوونه د پاڅون هڅې وکړي؛ له مجهزو وسله‌والو ځواکونو سره به مخ شي.

فطرت د پاکستان د چترال د غرونو د هغو ویډیوګانو په اړه هم غبرګون ښودلی، چې د بدخشان د سیمو پر نوم خپرې شوې دي.

هغه ویلي، د بدخشان په غرونو کې هیڅوک شتون نه‌لري؛ امنیتي او استخباراتي ځواکونه د هېواد په ټولو سیمو کې فعال دي.

نوموړي مخالفې جبهې نمایشي بللي او څرګندوي، چې غړي یې د بهرنیانو پر لارښوونه په پاکستان کې میشت دي او په افغانستان کې د ناامنۍ رامنځته کولو وړتیا نه‌لري.

هغه ډاډ ورکړی، چې وسله‌وال ځواکونه به هیچا ته اجازه ورنه‌کړي، چې د خلکو امنیت ګډوډ کړي او د هغوی د آزاد ژوند مخه ونیسي.