Connect with us

سیمه ییز خبرونه

د کندوز ولایت د امرباالمعروف ریاست د ښځو د لومړنۍ ناستې کوربتوب وکړ

Published

 on

(Last Updated On: وږی ۸, ۱۴۰۱)

د لومړي ځل لپاره د کندوز ولايت یو شمېر ښځو د دې ولایت د امرباالمعروف او نهی عنالمنکر ریاست له مسوولینو سره غونډه وکړه.

په دې غونډه کې کندوزیو میرمنو د امرباالمعروف ریاست له مسوولینو وغوښتل، چې له ښځو سره نرم او مناسب چلند وکړي؛ ښځو او نجونو ته د کار او زد کړې زمینه برابره کړي.

په کندوز ولایت کې د امرباالمعروف مشر ويلي، محتسبین د ښځو د توهین او سپکاوي حق نلري او اسلامي امارت د ښځو د زدکړو او کار له حق څخه  ملاتړ کوي.

د کندوز ولایت د ښځو چارو پخوانۍ مشره  ناهید آصفي وايي، چې له دوی سره باید مناسب چلند وشي او د کار او زد کړو حق ورکړ شي.

دلته داسې میرمنې هم شته، چې د اسلامي امارت له دې تګلارې خوښې دي او وايي، چې د دوی یو شمېر ستونزې اوارې شوي او تمه لري، چې تر شپږم ټولګي پورته به د نجونو لپاره ښوونځي پرانستل شي.

د کندوز ولايت د امرباالمعروف مشر مفتي  محمد الله آخوندزاده د ښځو د زدکړې او کار حق نه ردوي او وايي، چې ښځې او نجونې کولى شي کار او زدکړه وکړي.

مفتي محمدالله آخوندزاده له خپلو مامورینو غوښتي، چې له هیچا سره په ځانګړې توګه له ښځو سره ناوړه چلند ونکړي.

هغه وايي، که له ښځو سره څوک ناسم چلند وکړي؛ مخامخ دې دوی ته شکایت وکړي.

دا په داسې حال کې ده، چې په دې یوه کال کې بېلا بېلو کورنیو او نړیوالو بنسټونو اسلامي امارت د ښځو له حقونو څخه پر سرغړونې تورن کړی؛ خو اسلامي امارت دا تورونه بیځایه ګڼي او وايي، چې د اسلامي شریعت له مخې د ټولنې د هر وګړي حقونه یې خوندي کړي دي.

سیمه ییز خبرونه

د سمنګان ولایت په یوه دیني مدرسه کې چاودنې ۱۵ کسان وژلي

Published

on

(Last Updated On: ليندۍ ۹, ۱۴۰۱)

د سمنګان ولایت د اطلاعاتو او فرهنګ رییس امدادالله مهاجر ويلي، د سمنګان ولایت مرکز ایبک ته څېرمه په «الجهادي» نومې دیني مدرسه کې چاودنه شوې ده.

د امداد الله مهاجر د څرګندونو له مخې، چاودنه هغه مهال رامنځته شوه، چې د دې مدرسې زدکوونکي د لمانځه په حال کې ول.

د نوموړي د څرګندونو له مخې، په دې پېښه کې ۱۵ طالب العلمانو خپل خوږ ژوند له لاسه ورکړی دی.

امداد الله مهاجر زیاته کړې؛ د چاودنې د ټپیانو کره شمېر تر اوسه پوره معلوم ندی.

هغه وايي، چې ټول قربانيان د دغې ديني مدرسې زدکوونکي وه او هیڅ دولتي چارواکي هلته شتون نه درلود.

د کورنیو چارو وزارت هم دغه پېښه تائید کړې ده.

د کورنیو چارو وزارت ویاند عبدالنافع ټکور وايي، په دې پېښه کې لس کسان وژل شوي او یو شمېر نور ټپیان دي.

تر اوسه کومې ډلې د دې پېښې مسوولیت ندی منلی.

Continue Reading

سیمه ییز خبرونه

په لغمان روغتون کې د یوې مور څلور ماشومان زیږیدلي

Published

on

(Last Updated On: لړم ۲۹, ۱۴۰۱)

په لغمان کې یوې ښځې د جمعې پر ورځ د لغمان په مرکزي روغتون کې څلور ماشومان زیږولي دي.

د داکتر پاینده محمد سهاک د څرګندونو له مخې، مور او د هغې څلور ماشومان؛  درې هلکان او یوه نجلۍ، ټول ښه او له روغتیا برخمن دي.

باختر آژانس د شنبې پر ورځ د دغو ماشومانو د پلار له خولې ليکلي؛ خوښ دى، چې الله پاک ورته څلور اولادونه ورکړي دي.

د دغو ماشومانو مور او پلار د لغمان ولایت په الینګار ولسوالۍ کې اوسیږي.

Continue Reading

سیمه ییز خبرونه

د ننګرهار وروستي سکهـ ګُلچرن په هېواد کې د پاتې کېدو ډاډ څرګند کړ

Published

on

(Last Updated On: لړم ۱۸, ۱۴۰۱)

د افغانستان په ختیځ ننګرهار ولایت کې وروستی سکهـ ګلچران سینګهـ وايي، افغان سکهـان د امنیتي دلایلو له کبله له هېواده وتلي؛ خو زه یوازنی هغه یم، چې په خپل هېواد کې اوسېږم.

افغان سیکان له کلونو راپدیخوا د هېواد نورو ولایتونو ته ورته په جلال آباد ښار، د خوږیاڼو او سره رود ولسواليو په ګډون یو شمېر نورو ولسوالیو کې هم مېشت ول او د عادي افغانانو په څېر يې ژوند، زدکړې او بېلابېل کارونه ترسره کول.
ګلچرن وايي، د اسلامي امارت له لورې د هر راز همکارۍ، امنیت او خوندیتوب ډاډ ورکړ شوی دی.

د جلال آباد د زاړه ښار د سیکانو د بابا نانک د دربار  او وچ ډنډ د غاړې ترڅنګ پخوا لس زره ډېرو سیکهانو د يوناني طبابت او پېروپلور کار و بار درلود؛ خو اوس ترې يوازنی هټیوال ګلچرن پاتې دی او نور ټول يې د تېرو دوه لسیزو ناخوالو هېواد پرېښودو ته اړ کړل.

د ننګرهار اوسېدونکي هم وايي، چې افغان سیکان ډېر ښه خوی لري، کاروباري خلک دي او اسلامي امارت يې باید د امنیت ساتنه وکړي او له هېواده د وتلیو هغو ته دې د بېرته راتګ بلنه ورکړي.

ګلچرن وايي، په کابل او ننګرهار کې د ګډوډيو او ناامنیو او پر دوی د وروستیو سختو بریدونو له ویرې دلته مېشتو کابو لس زره کورنیو د خوندیتوب لپاره هېواد پرېښی؛ هند، انګلستان، کانادا او یوشمېر نورو هېوادونو ته کډوال شوي دي.

ګلچرن ويلي؛ له افغان خاورې د خپلو سیکهـ وروڼو وتو سخت دردمن کړی او په بېلتون يې اوښکي تویې کړي دي. افغانستان د ټولو افغانانو شریک کور دی او بايد د آبادۍ او پرمختګ لپاره یې ټول په شریکه الله پاک ته دعا وکړي.

ننګرهارمیشتی میا نورالدین میاخېل وايي؛ سیکهـ هېوادوال بې غرضه خلک دي او حکومت دې دوی ته د هر راز همکارۍ ډاډ ورکړي او له هېواده وتلو سیکهانو ته د بېرته راستنېدو ډاډ ورکړي.

د جلال آباد ښار د سیکهانو په هټیو کې اوس د سیکهـ هېوادوالو پخواني همکاران، چې له دوی سره د یوناني طبابت او عطارۍ په برخه کې یې کار کاوه، فعالیت کوي.

هټیوال یوسف وايي، هر يو يې اړیکې ورسره لري او که حالات ښه شي، بېرته به خپل هېواد ته راستانه شي.

دا په داسې حال کې ده، چې اسلامي امارت بهرته د وتلیو افغانانو د بېرته راستنولو او راستنېدو لپاره يو کمیسیون جوړ کړی، چې له همدې لارې یې يو شمېر خلک هېواد ته رابللي او تل يې ټينګار کړی، چې دا کمیسیون به تر هغې فعال وي، چې يو افغان هم له هېواده بهر وي.

Continue Reading

Trending

Copyright © 2022 Ariana News. All rights reserved!