د افغانستان اسلامي امارت د عامې روغتیا وزیر د یوه لوړ پوړي پلاوي په مشرۍ قطر ته سفر وکړ.

د اسلامي امارت د عامې روغتیا وزارت مطبوعاتي دفتر په یوه خبرپاڼه کې راغلي: د دغه وزارت سرپرست وزیر داکتر قلندر عباد د یوه لوړ پوړي پلاوي پر مشرۍ قطر ته ولاړ.

عامې روغتیا وزارت څرګنده کړې؛ دغه پلاوی به قطر ته په خپل شپږ ورځني سفر کې له دې هېواد سره د روغتیايي خدماتو د همغږۍ، د افغان داکترانو د وړتیا لوړونې او د افغانستان له روغتیايي برخې سره د مرستې په اړه خبرې وکړي.

د اسلامي امارت د عامې روغتیا وزیر او ورسره پلاوی به په قطر کې له یو شمېر پرمختللیو روغتیايي مرکزونو څخه هم لیدنه وکړي.

داکتر قلندر عباد له دې مخکې ویلي وه، چې په تېرو دولس کلونو او امریکايي اشغال کې د افغانستان د روغتیا په برخه کې هیڅ کار ندی شوی.

دا په داسې حال کې ده، چې د عامې روغتیا وزارت هڅه کوي، چې د افغان داکترانو د پوهې او مسلکي تخصص کچه لوړه او افغانستان نور د درملنې لپاره بهر ته د تګ اړتیا ونه‌لري.

د افغانستان د اسلامي امارت د عامې روغتیا وزارت د ملګرو ملتونو سازمان د اړوندو څانګو په همکارۍ نن دوشنبه د کب دوه‌ویشتمه / د مارچ دیارلسمه په ټول هېواد کې د ګوزڼ یا پولیو ضد واکسین کمپاین پیل کړ.

د افغانستان عامې روغتیا وزارت ويلي، له دغه کمپاین څخه هدف له پېنځه کلونو کم عمره ۹ اعشاریه ۴  میلیون ماشومانو ته د ګوزڼ ضد واکسین ورکول دي.

دغه وزارت څرګنده کړې، د کمپاين په دې پړاو کې به له شپږ مياشتو څخه تر پېنځه کلونو ماشومانو ته ويتامين A  هو ورکړ شي، چې د ناروغيو پر وړاندې یې د بدن د معافيت کچه ​​لوړه شي.

د افغانستان اسلامي امارت د عامې روغتیا وزیر داکتر قلندر عباد وایي: د عامې روغتیا وزارت رهبري هوډ لري، چې ژر تر ژره له افغانستان څخه ګوزڼ ویروس په بشپړه توګه له منځه یوسي. په دې برخه کې وروستي پرمختګونه هیله بښونکي دي. افغانستان اوس د بل هر وخت پر پرتله د ګوزڼ له منځه وړلو ته نږدې شوی او د ټولنې پر فعاله ونډه او  ګډو هڅو به دا ناروغي له منځه ولاړه شي.

د معلوماتو له مخې، په روان کال کې د ګوزڼ کومه پېښه نده ثبت شوې. تېر کال دوه پېښې وې، چې یوه یې په پکتیکا او بله یې په کونړ ولایت کې وه.

پوليو يوه ويروسي ناروغي ده، چې درملنه يې نه‌کېږي او يوازې پر واکسيناسيون يې مخنيوی او له منځه وړل شوني دي. هغه ماشومان، چې پدې ناروغۍ اخته شي د تل لپاره فلج وي او یا مړه کیږي.

د ملګرو ملتونو د څرګندونو له مخې په هرو دوه دقیقو کې یوه ښځه د امیندوارۍ او ماشوم زیږون پر مهال مري.

د ملګرو ملتونو د روغتیا نړیوالې ټولنې څرګنده کړې؛ که څه هم د میندو د مړینې کچه په تېرو ۲۰ کلونو کې درې برخې راټیټه شوې؛ خو اوس هم په هرو دوه دقیقو کې یوه ښځه د امیندوارۍ یا زیږون د اختلالاتو له کبله مري.

دغه راز ویل شوي، چې د میندو د مړینې کچه د ۲۰۰۰ او ۲۰۱۵ کلونو ترمنځ د پام وړ کمه شوې؛ خو د ۲۰۱۶ او ۲۰۲۰ کلونو ترمنځ په پراخه کچه ودرېده او حتا په ځینو سیمو کې بېرته ګرزېدلې ده.

د روغتیا نړیوال سازمان او د ملګرو ملتونو د نورو سازمانونو د راپور له مخې، په ۲۰ کلنه موده کې د میندو د مړینې په کچه کې ۳۴.۳ سلنه کموالی راغلی، چې په ۲۰۰۰ کال کې په هرو ۱۰۰ زره زیږونونو کې د ۳۳۹ میندو د مړینې کچه ۲۲۳ ته ورسېده. په هرصورت، دا احصائیه ښیي، چې په ۲۰۲۰ کې هره ورځ نږدې ۸۰۰ میرمنې یا په هرو ۲ دقیقو کې یوه ښځه مري.

د روغتیا نړیوال سازمان عمومي منشي تدروس ادهانوم ګبریوس ویلي: په داسې حال کې، چې امیندواري باید د ټولو میرمنو لپاره د امید او مثبت تجربه وي، دا اوس هم د نړۍ د میلیونونو خلکو لپاره خورا خطرناکه تجربه ده.

د فرانسې ۲۴ د هغه دڅرګندونو له مخې څرګنده کړې؛ نوې احصائې پدې ټینګار کوي، چې هره ښځه او نجلۍ روغتیایي خدماتو ته لاسرسی لري او دا، چې دوی کولی شي د امیندوارۍ له حق څخه په بشپړه توګه کار واخلي.

دغه راپور، چې له ۲۰۰۰ څخه تر ۲۰۲۰ کال پورې په ملي، سیمه ییزه او نړیواله کچه د میندو د مړینې کچه څاري؛ موندلې، چې د ملګرو ملتونو له ۸ سیمو څخه په دوه – اروپا او شمالي امریکا او لاتینه امریکا او کارابین کې د میندو د مړینې کچه له ۲۰۱۶ څخه تر ۲۰۲۰ پورې لوړه شوې ده؛ خو په نورو ځایونو کې پر ټپه ولاړ ده.