د افغانستان فوټسال غوره لیګ د څلورم پړاو د دوه‌یمې نیمایي په پنځوسمه لوبه کې صداقت اف‌سي پنجشیر ته ۷ پر صفر ماتې ورکړه.

په نننۍ یو‌پنځوسمه لوبه کې ظاهر‌اسد اف‌سي دیار سنايي ته د ۳ پر ۱ ماتې ورکړه.

سبا (جمعه د چنګاښ شلمه) په دوه‌پنخوسمه لوبه کې آریا فورج او اتحاد اف‌سي سیالي کوي.

په دري‌پنځوسمه لوبه کې نورزاد اف‌سي به له جوانان میهن سره مخ شي.

په ټول هېواد کې د فوټسال مینه‌وال کولی شي د دې لیګ د څلورم پړاو د دوه‌یمې نیمایي پیل پر ژوندۍ او ځانګړې بڼه په آریانا ټلویزیون کې وګوري.

د افغانستان کرکټ بورډ د خبرپاڼې له مخې؛ لوبڅار بسم الله جان شینواری تېره شپه د ورپېښې ناروغۍ له کبله وفات شوی دی.

د افغانستان کرکټ بورډ د هغه مړینه لویه او نه جبرانېدونکې ضایعه بولي او د شینواري کورنۍ، خپلوانو او خواخوږو ته یې تسلیت وړاندې کوي.

د کرکټ بورډ لخوا په خپره شوې خبرپاڼه کې راغلي، چې بسم الله جان شینواري د لوبځار په توګه د خپلو بریاليو هڅو پر مهال په ۳۴ نړیوالو یو ورځنیو (ODI) ۲۶ نړیوالو شل اوریزو (T20) ۳۱ فرسټ کلاس، ۵۱ لیست A لوبو او ۹۶ کورنیو شل اوریزو لوبو کې د لوبڅارۍ دنده ترسره کړې ده.

د کرکټ بورډ چارواکو د دې سترې ضایعې په اړه د ژورې خواشینۍ څرګندولو تر څنګ د کرکټ په وده او پراختیا کې د شینواري له ارزښتناک رول او مسلکي خدماتو ستاینه کړې ده.

اروا ښاد شینواری د افغانستان یو له تجربه لرونکو لوبڅارانو څخه و، چې په خپل پېر کې یې د ملي او نړیوالو سیالیو لوبڅاري کړې ده.

ټاکل شوې، چې ارواښاد شینواری نن له غرمې مخکې د ننګرهار ولایت په سپين غر ولسوالۍ کې خاورو ته وسپارل شي.