Connect with us

تازه خبرونه

له پاکستان سره د سرحدي تاوتریخوالو د مخنیوي لپاره ګډه کمیته جوړه شوې – مجاهد

Published

 on

(Last Updated On: ليندۍ ۲, ۱۴۰۱)

د افغانستان اسلامي امارت وياند ذبيح الله مجاهد ويلي، له پاکستان سره د سرحدي شخړو د مخنيوي لپاره یوه ګډه جرګه ګۍ یا کمیته کار کوي.

ذبیح الله مجاهد د سې شنبې پر ورځ د ( لیندۍ لومړۍ ) ویلي، چې اسلامي امارت له ګاونډ هېوادونو سره د سرحدي شخړو مخالف دی.

نوموړي زیاته کړې: د افغانستان اسلامي امارت ژمن دی، چې له هیڅ ګاونډ هېواد سره ښکېل نشي. د افغانستان خلک په دې وروستیو کې سولې ته رسېدلي دي. مونږ نه غواړو د خلکو سوله ګډوډه کړو. په عین حال کې مونږ غواړو د خپلو سرحدونو او خاورې ساتنه وکړو.

د راپورونو له مخې؛ په پکتیا کې سرحدي شخړه درې ورځې مخکې د کُرم اجنسۍ د سیمه ییزو اوسیدونکیو لخوا پیل شوې وه او بیا د اسلامي امارت د ځواکونو او د پاکستان د پوځ تر منځ نښته شوې ده.

د کُرم اجنسۍ سیمه ییز اوسېدونکي ادعا کوي، چې د دیورند فرضي کرښې په اوږدو کې د اغزن تار له لګولو وروسته د دوی سلګونه هکتاره ځمکه افغان لوري ته پاتې ده.

د افغانستان اسلامي امارت ځواکونو دوی ته ویلي، چې دا ځمکه د کرم اجنسۍ د خلکو په واک کې نده.

د دغې ستونزې د وارۍ لپاره د دواړو لوریو پلاويو سره کتلي؛ خو تر اوسه کومې هوکړې ته رسېدلي ندي.

یو شمېر رسنیو خبر ورکړی، چې د ملي دفاع وزارت مرستیال ملا فضل مظلوم له دغې نښتې وروسته ډنډ پټان ته سفر کړی؛ خو تر اوسه دا نده په ډاګه شوې، چې آیا نوموړی د دواړو لوریو په غونډه کې ګډون کړی او که نه.

د نوې جګړې له پیل راپدیخوا د “خرلاس” دروازه، چې د افغانستان او پاکستان تر منځ د سوداګرۍ عمده لار بلل کېږي؛ تړل شوې ده.

دا نښته په ډنډ پټان کې په داسې حال کې رامنځته شوې، چې د سپین بولدک – چمن پر لویه لار یوه بله شخړه د دې لارې د تړل کېدو لامل شوې وه؛ خو بیا د دوشنبې پر ورځ له دوه اړخیزو خبرو وروسته تړل شوې لار بېرته پرانیستل شوه.

تازه خبرونه

هالندي ځواکونه په افغانستان کې له یوه بریده ژوندي پاتې کسانو ته تاوان ورکوي

Published

on

(Last Updated On: سلواغه ۱۵, ۱۴۰۱)

د هالند حکومت اعلان کړی، چې په افغانستان کې د هالندي ځواکونو لخوا د ۲۰ ملکي وګړیو د وژل کېدو په اړه به د محکمې د پرېکړې پر وړاندې استیناف غوښتنه ونکړي.

د اسوشیېتد پرس خبري آژانس د راپور له مخې؛ د هاګ ښار یوې سیمه ییزې محکمې د تېر کال په نومبر میاشت کې د هالند له حکومته وغوښتل، چې د روزګان ولایت په چوره ولسوالۍ کې د ۲۰۰۷ ز. کال له هوایي بریده ژوندي پاتې شویو کسانو ته تاوان ورکړي.

د هالند دفاع وزارت هغه مهال ادعا وکړه وه، چې د هوايي برید له کبله په نښه شوې ودانۍ کې د اسلامي امارت ځواکونه ول؛ خو محکمې په ډاګه کړې؛ د هالند پوځ دومره معلومات نلرل، چې دغه ځای پر نښه کړي.

د هالند دفاع وزیر کایسا اولونګرین د جمعې په ورځ د خپل هېواد د پارلمان غړیو ته په یوه لیک کې څرګنده کړې، چې له پېښې ۱۵ کاله تېر شوي او اوس د وضاحت لپاره ډېر اسناد نشته.

هغه وایي، چې دوی به د محکمې د پرېکړې په اړه استیناف غوښتنه ونکړي او د رامنځته شویو زیانونو تاوان به ورکړي.

Continue Reading

تازه خبرونه

اسلامي امارت دې د رسمیت پېژندلو لپاره خپلې ژمنې پوره کړي

Published

on

(Last Updated On: سلواغه ۱۵, ۱۴۰۱)

د امریکا د ملي امنیت شورا د ستراتیژیکو اړیکو همغږي کوونکي ویلي، که طالبان( اسلامي امارت) د نړیوالې ټولنې لخوا پر رسمیت پېژندل غواړي؛ نو باید خپل مسوولیتونه ترسره کړي.

د امریکا د ملي امنیت شورا د ستراتیژیکو اړیکو همغږي کوونکي ویلي، چې اسلامي امارت له خپلو ژمنو څخه پر سرغړونه ځانونه نور هم منزوي کوي او د طالبانو دا کړنې به خپلې پایلې هم ولري.

جان کربي له امریکا غږ سره په مرکه کې څرګنده کړې: دوی (اسلامي امارت) غواړي، چې له نړیوالې ټولنې سره یو ځای شي او دوی په دې اړه ژمنې هم کړي. دوی په دوحه کې ژمنه وکړه او د کابل له نیولو وروسته یې په ځانګړې توګه ژمنه وکړه، چې په مسوولانه ډول به حکومت کوي او په افغانستان کې د ښځو او نجونو پرمختګ ته درناوی کوي؛ خو  مونږ ګورو، چې اوس دوی له دې ژمنو څخه سرغړونه کوي.

هغه زیاته کړې: له همدې کبله که طالبان (اسلامي امارت) وغواړي، چې مشروع وګڼل شي، که غواړي د نړیوالې ټولنې لخوا پر رسمیت وپیژندل شي، که غواړئ، چې په خپل هېواد کې د مالي مرستې او پانګونې غوښتونکي وي؛ نو باید خپلې ژمنې پوره او عمل پرې وکړئ.

د دې پوښتنې په ځواب کې، چې آیا امریکا په افغانستان کې د داعش پر وړاندې د اسلامي امارت پر مبارزه قانع دی؛ کربي ویلي، چې اسلامي امارت یې باید ځواب ورکړي.

هغه دا هم په ډاګه کړې: دوی (اسلامي امارت) په افغانستان کې د داعش تر دوامداره ګواښ لاندې دی. دوی څنګه او کله د داعش پر ضد عملیات کوي او یا یې څنګه تعقیبوي. دوی (اسلامي امارت) باید په دې اړه خبرې وکړي.

دا په داسې حال کې ده، چې اسلامي امارت تل د داعش د ځپلو او د هغو د هڅو د مخنیوي غږ پورته کړی او وایي د؛

 که نړيواله ټولنه غواړي، چې وضعيت ښه شي، اندېښنو او ستونزو ته د پای ټکی کېښودل شي، نړۍ باید  له اسلامي امارت سره اړيکې ټينګې  کړي او پر رسميت یې وپېژني.

Continue Reading

تازه خبرونه

مسکو راتلونکې اوونۍ د افغانستان په اړه د سیمې د هېوادونو د امنیتي غونډې کوربتوب کوي

Published

on

(Last Updated On: سلواغه ۱۵, ۱۴۰۱)

د افغانستان لپاره د روسیې ځانګړي استازي د جمعې پر ورځ تاس خبري آژانس ته څرګنده کړې، چې راتلونکې اوونۍ به په مسکو کې د افغانستان په اړه د سیمې د هېوادونو د امنیتي چارواکو په ګډون د یوې ناستې کوبتوب وکړي.

کابلوف ویلي، چې د افغانستان په اړه امنیتي ناستې ته د منځنۍ آسیا هېوادونو په ګډون د پاکستان، هند او چین د امنیت شورا سلاکاران رابلل شوي دي.

د افغانستان په اړه د لوړپوړیو امنیتي چارواکو ترمنځ د څو اړخیزو سلامشورو د څلورم پړاو کوربتوب تېر په مې میاشت کې تاجکستان کړی و.

روسیه په داسې حال کې د سیمې د هېوادونو د راتلونکې امنیتي غونډې ناستې کوربتوب ته چمتووالی نیسي، چې دغه هېواد تل په افغانستان کې د داعش پر شتون اندېښنه ښودلې ده.

کابلوف شاوخوا دوه اوونۍ وړاندې ویلي وه، چې په افغانستان کې د داعش حضور نه یوازې د منځنۍ آسیا د هېوادونو او د افغانستان د نورو ګاونډ هېوادونو د ثبات لپاره، بلکې د روسیې د امنیت پر ضد هم دی.

اسلامي امارت څو ځله ډاډ ورکړی، چې د افغانستان خاوره به د نورو هېوادونو د امنیت پر ضد نه کارول کېږي.

Continue Reading

Trending

Copyright © 2022 Ariana News. All rights reserved!