د قرغزستان بهرنیو چارو وزیر د منځنۍ آسیا له هېوادونو وغوښتل، چې د افغانستان په اړه همکاري او همغږي زیاته کړي.

د منځنۍ آسیا د هېوادونو د بهرنیو چارو وزیرانو په کلنۍ غونډه کې د قرغزیستان د بهرنیو چارو وزیر جنبیک کولوبایف ویلي، چې په افغانستان کې سوله او ثبات د سیمې د امنیت او سوکالۍ لپاره اړین دي.

د قرغزستان د بهرنیو چارو وزارت د خبرپاڼې پر بنسټ، کولوبایف د دې ناستې پر مهال په افغانستان کې د یوناما له فعالیتونو ملاتړ څرګند کړ.

په دې غونډه کې، چې د دوشنبې او سې شنبې پر ورځو د قرغزستان په پلازمېنه بشکیک کې جوړه شوې وه؛ د اسلامي امارت هیڅ چارواکي ګډون نه درلود، خو د یوناما مشرې روزا اوتونبایوا په کې ګډون وکړ او په افغانستان کې یې د یوناما د فعالیتونو په اړه معلومات وړاندې کړل.

د اسلامي امارت ویاند ذبیح الله وايي، چې له نړۍ او په ځانګړي توګه له چین سره د افغانستان د اقتصادي اړیکو د پراختیا لپاره د بدخشان د واخان د ورېښمو لارې د جوړولو کار پیل شوی او چارې یې چټکې روانې دي.

ذبیح الله مجاهد زیاته کړې؛ د اسلامي امارت مشرتابه د هېواد د اقتصادي اړیکو د پراختیا په لاره کې مهم ګامونه اخیستي او هڅه کوي، چې بېلابېلې ترانزیتي لارې پیدا کړي.

د مجاهد د څرګندونو له مخې؛ د دغه سړک له جوړېدو سره به د افغانستان سوداګريزې اړيکې نورې هم پراخې شي.

ذبیح الله مجاهد وایي؛ د چین پولې ته د واخان سړک مساحت پر غالب ګومان ۶۰ کیلومتره دی. همدا اوس هلته د ملي دفاع او ټولګټو چارو وزارت ماشینونه شته او ترې کار اخیستل کېږي.

نوموړي ویلي؛ د واخان دلاري جوړول د افغانستان اسلامي امارت په ستراتیزیکو پروژو کې شامله ده او په واخان مسیر کار هم روان دی له دې پرته د اسلامي امارت رهبرۍ د چابهار پر مسیر هم کار پیل کړی. مونږ هڅه کوو، چې د سیمې او ګاونډ پر کچه د خپلو اقتصادي اړیکو د پراختیا لپاره اقدامت نور هم پراخ کړو.

دغه راز د سوداګرۍ خونې مسوولینو په یوه خبره ناسته کې د اسلامي امارت له مشرتابه غوښتي؛ د واخان لار ژر تر ژره د اقتصادي راکړې ورکړې لپاره برابره کړي، چې د پاکستان اقتصادي انحصار څخه وژغورل شي.

د سوداګرۍ او پانګوني خونې غړی عبید الله څرګنده کړې؛ چین د افغانستان له مهمو اقتصادي شریکانو څخه دی او له کابل څخه تر صفري ټکي ۱۰۰۰ کیلومتره واټن لرو. له اسلامي امارته هیله کوو، چې مونږ ته دورېښمو تاریخي مسیر بېرته پرانزي.

د سوداګرۍ او پانګوني خونې غړی شیرین آقا سخي ویلي؛ د اسلامي امارت له رهبرۍ هیله لرو، چې مونږ د بدخشان له لارې چین سره ونښلوي، چې افغان سوداګر د ګاونډ هېوادونو له مکرر ظلمه  خلاص شو. مونږ چین ته هم صادارت او هم واردات لرو.

په ورته وخت کې بیا اقتصادي شنونکي د افغانستان سوداګرۍ او ترانزیت لپاره د واخان لار تر ټولو مهمه او اړینه بولي.

د اقتصادي چارو کار پوهانو ويلي که له دې مسیر څخه افغانستان له چین  سره ترانزیت پیل کړي؛ نو له دې سره به پر افغانستان او چین سربېره د سیمې د نورو هېوادونو ترمنځ اقتصادي اړیکې پیاوړې او غښتلې شي.

د یادونې ده، چې د واخان مسیر تاریخي ارزښت لري او له دې لارې د افغانستان او چین ترمنځ اقتصادي اړیکې پالل شوې دي.

د بهرنیو چارو وزارت سیاسي مرستیال شېرمحمد عباس ستانکزي ويلي، د افغانستان د ممبي او حیدر‌آباد کونسلګرۍ په کابل کې د بهرنیو چارو له وزارت سره اړیکې لري؛ په نوي دیلي کې به د افغانستان سفارت ډېر ژر بېرته فعال شي.

شېر محمد عباس ستانکزي له ملي تلویزیون سره په مرکه کې، چې د سې شنبې پر شپه خپره شوې ویلي: په ممبي او حیدرآباد کې زمونږ قونسلګرۍ فعالې دي؛ د بهرنیو چارو له وزارت سره اړیکې لري او کونسلي خدمتونه هره ورځ وړاندې کیږي. اوس‌مهال په ممبي او حیدرآباد کې زمونږ قونسل شته؛ ما له هغوی سره خبرې وکړې او په دیلي کې هم د دوی سفارت بېرته پرانیستل شوی دی.

شېر محمد عباس ستانکزي ویلي، چې په هند کې د افغانستان سفارت به په راتلونکیو دوه یا درې ورځو کې خپل فعالیتونه او خدمات بیا پیل کړي.

ستانکزي له ملي تلویزیون سره په مرکه کې څرګنده کړې، چې د ده پر اند اسلامي امارت؛ ځکه پر رسمیت پېژندل شوی، چې اوس هم له هغو هېوادونو سره دیپلوماتیکې اړیکې لري، چې پخوا یې درلودې.

هغه وایي، چې په افغانستان کې شاوخوا شل سفارتونه هڅې تر سره کوي.

دا په داسې حال کې ده، چې پېنځه ورځې مخکې په هند کې د افغانستان سفارت اعلان وکړ، چې په نوي دیلي کې یې د هند د حکومت پر وړاندې د پرتو ستونزو له کبله خپل فعالیتونه د تل لپاره ځنډولي دي.