د نړیوال بانک په یوه نوي راپور کې راغلي، چې په نړیواله بې ثباتۍ کې د افغانستان د اقتصادي ودې امکانات ناڅرګند پاتې دي.

په داسې حال کې، چې نړیواله اقتصادي ناڅرګندتیا زیاته شوې؛ په جنوبي آسیا کې ورسره د ودې لیدلوری کمزوری شوی او د سیمې په ډېری هېوادونو کې د افغانستان په ګډون وړاندویېنې ټیټې شوې دي.

 په دې راپور کې راغلي، چې که څه هم د افغانستان اقتصاد په تدریجي ډول ښه کېږي؛ خو د راتلونکي لیدلوری یې ناڅرګند پاتې دی؛ ځکه، چې مالي فشارونه مخ پر زیاتېدو دي، سوداګریز کسر زیات شوی، او د خوړو خوندیتوب کم شوی دی. دا عواملو پر کورنیو ډېر فشار راوړي او د ټولګډونه ودې مخه نیسي.

نړیوال بانک په خپل نوي راپور کې وايي، چې د بهرنیو مرستو له کمښت سره – سره د افغانستان اقتصاد په ۲۰۲۴ او ۲۰۲۵ مالي کلونو کې ۲.۵ سلنه وده کړې؛ خو دا کچه د هېواد د نفوس د ودې پر پرتله ټیټه ده.

د اقتصاد وزارت ويلي، چې د هېواد اقتصاد نازک ندی او له بندیزونو سره – سره پرمختګ لري او د بندیزونو د لرې کولو لپاره هڅې اوس هم روانې دي.

د اقتصاد وزارت وزارت مسلکي مرستیال عباللطیف نظري وايي، چې د هېواد اقتصادي وضعیت نازک نه دی، بلکې مخ پر ښه کېدو دی.

نړیوال بانک اعلان کړی، چې افغانستان به په ۲۰۲۵ کال کې د دوه‌یم پرله‌پسې کال اقتصادي وده تجربه کړي؛ ځکه، چې تر ډېره د کرنې سکټور لخوا پرمخ وړل کېږي.

د اقتصادي شنونکو د څرګندونو له مخې؛ د نفوس چټکه وده او د کډوالو راستنېدل د کار پیدا کولو او د عامه خدماتو پر وړاندې کولو لوی فشار راوړي، چې اقتصادي کمزورتیا یې ژوره کړې ده.

ویل کیږي، چې د روان کال په پیل کې ۱۴.۸ میلیون خلک د خوړو له کمښت سره مخ ول او پراخه خوارځواکي، چې اوس ۴.۷ میلیون ښځې او ماشومان اغېزمنوي؛ مخ پر خرابېدو ده. دې بانک دا خبرداری هم ورکړ، چې که بېړنی اقدام ونشي؛ د بشري پانګې پراختیا به نوره هم زیانمنه شي.

د صنعت او سوداګرۍ وزارت چارسمبالی(سرپرست) نورالدین عزیزي د قزاق-افغان سوداګریز فورم د لومړۍ ورځې ناستې او د نندارتون د پرانیستې په پای کې ویلي؛ د افغانستان او قزاقستان ترمنځ د سوداګرۍ حجم ۳۲ سلنه زیات شوی او دواړه خواوې دغه راز په پام کې لري، چې د دواړو هېوادونو ترمنځ د سوداګرۍ حجم درې میلیارډ ډالرو ته ورسیږي.

د صنعت او سوداګرۍ وزارت د رسنیزې خبرپاڼې له مخې؛ عزیزي افغانستان ته د قزاقستان د پلاوي له سفر هرکلی وکړ او د افغانستان د ادارو د ډیجیټل کولو، بشري مرستو او د دې هېواد د نورو همکاریو له پروګرام څخه مننه وکړه.

عزیزي د افغانستان له لارې د مرکزي آسیا او جنوبي آسیا د نښلولو، د سوداګریزو قراردادونو د زیاتولو، په دواړو هېوادونو کې د دوه اړخیزو محصولاتو او تولیداتو د نندارتونونو د جوړولو، په کابل او الماتا کې د سوداګریزو مرکزونو د جوړولو او د توکو د صادراتو او واردولو لپاره د لارې هوارولو په اړه خبرې وکړې.

د قزاقستان د لومړي وزیر مرستیال سیرک ژومنګارین هم ټینګار وکړ، چې افغانستان او قزاقستان په سیمه کې مهم او سټراټیژیک شریکان دي او د دواړو هېوادونو ترمنځ د سوداګرۍ فورم جوړول یې د اقتصادي همکارۍ پیاوړتیا، د نویو سوداګریزو اړیکو رامنځته کولو، د تجربو تبادلې او د ګډو نوښتونو د ودې لپاره مهم وګڼل.

ژومنګارين ويلي: “مونږ باور لرو، چې يو باثباته او سوکاله افغانستان په سيمه کې د سولې او ثبات لپاره يو مهم فکتور دی، چې کولی شي د مرکزي او جنوبي آسيا ترمنځ يو مهم لوژستيکي مرکز شي.”

د یادونې ده، چې د قزاقستان د محصولاتو او تولیداتو نندارتون د صنایعو او سوداګرۍ وزارت په بلنه د ۲۵ قزاقستاني شرکتونو په ګډون سره ترسره شو.

د اقتصاد وزارت چارسمبالي( سرپرست) دین محمد حنیف په جرمني، فرانسې، ایټالیا، بریټانیا، کاناډا او امریکا کې له مېشتو یو شمېر افغان سوداګرو او کارپوهانو سره ولیدل.

په دې ناسته کې د هېواد د اقتصادي او ټولنیز وضعیت په اړه بحث او خبرې شوې دي.

افغان سوداګرو او کارپوهانو له امنیتي وضعیت څخه خپل رضایت څرګند کړ او د اسلامي امارت اقتصادي پروګرامونه یې د اقتصادي وضعیت په ښه کولو کې اړین وګڼل.

دین محمد حنیف په بېلابېلو سکټورونو کې د پانګونې د راجلبولو لپاره د شته فرصتونو او آسانتیاوو پر تشریح کولو له ټولو بهر مېشتو افغان سوداګرو وغوښتل، چې له دې فرصتونو څخه ګټه پورته کړي او د اقتصادي وضعیت د ښه کولو او د کاري فرصتونو د رامنځته کولو لپاره په هېواد کې پانګونه وکړي.