په غزه کې د اوبو وېش پر مهال د ۲۰ ماشومانو مرګ او ژوبله تخنیکي تېروتنه وه

ځایي چارواکو ویلي، چې د یکشنبې پر ورځ( د چنګاښ دوه‌ویشتمه) په غزه کې د اوبو وېش پر مرکز د اسرائیلو د راکټي برید له کبله لږ تر لږه اته فلسطینیان، چې ډېری یې ماشومان دي؛ ووژل شول او ۱۲ نور ټپیان دي.

د اسرائیلو پوځ ویلي، چې موخه یې د اسلامي جهاد ډلې غړي وه؛ خو توغندی د “تخنیکي تېروتنې” له کبله لسګونه مټره لرې ولګېد.

ځایي چارواکو ویلي؛ د اسرائیلو دې توغندي د کډوالو په نصیرات کمپ کې د اوبو وېش پر مرکز ولګېد، چې له کبله یې شپږ ماشومان ووژل شول.

د اسرائیلي پوځ د خبرپانې له مخې؛ “پوځ بې ګناه ملکي وګړو ته د هر راز زیان په اړه خواشیني دی” او زیاته شوې، چې دا پېښه تر څېړنې لاندې ده.

د اوبو کمښت په وروستیو اوونیو کې د غزې یوه ستره ننګونه ګرځېدلې ده. د تېلو او سونګ‌توکو کمښت د اوبو او فاضله توکو د پاکولو فابریکې بندې کړي، چې اوسیدونکي یې د اوبو د وېش له مرکزونو سره تړلي دي.

فلسطیني رسنیو راپور ورکړ، چې په یوه بل برید کې د یکشنبې پر سهار د غزې پر یوه بازار د اسرائیلو د هوايي برید له کبله د روغتون د یو سلاکار په ګډون ۱۲ کسان ووژل شول.

د غزې روغتیا وزارت د یکشنبې پر ورځ ویلي، چې د ۲۰۲۳ کال د اوکتوبر له میاشتې د اسرائیلو او حماس ترمنځ په جګړه کې له ۵۸ زره څخه ډېر کسان وژل شوي، چې په تېرو ۲۴ ساعتونو کې ۱۳۹ نور هم ورزیات شوي دي.

ویل کیږي، چې په دوحه کې د امریکا د ۶۰ ورځیني وړاندیز شوي اوربند په اړه غیر مستقیمې خبرې اترې روانې دپ؛ خو په تېره اوونۍ کې د احتمالي وړاندویېنې په اړه خوشبیني پر پراخه کچه کمه شوې او دواړه خواوې یو بل د انعطاف منونکي نه‌بولي.