د اطلاعاتو او فرهنګ وزارت د ملي آرشیف رییس عبیدالله حنیف او د بهرنیو اړیکو او فرهنګي آتشو رییس محمد شفیق احمدزي د اسلامي خطي نسخو په اړه د اسلامي نړۍ د ښوونې، علومو او فرهنګ بنسټ (آیسسکو) په انلاین علمي غونډه کې ګډون وکړ.

دغه غونډه د آیسسکو د هنري لیکنې او خطي نسخو مرکز له‌خوا د « په نړۍ کې اسلامي نسخې » تر سرلیک لاندې جوړه شوې وه، چې د مالي هېواد د خطي نسخو وضعیت او د دې فرهنګي میراث د ساتنې او خوندي کولو د لارو چارو پر ارزونه راڅرخېدلې ده.

د آیسسکو مسوولانو په دې غونډه کې ټینګار وکړ، چې مالي هېواد د سلګونو زره خطي نسخو پر لرلو په لویدیځه افریقا کې د اسلامي تمدن او فکر له مهمو خزانو ګڼل کېږي او د دغو تاریخي آثارو ساتنه ځانګړی ارزښت لري.

د پوهنې وزارت څرګنده کړې، چې د ولسوالیو د پوهنې آمریتونو او ښوونیزو حوزو اړوند ۱۰۶۰ تش اداري بستونه یې آزادې سیالۍ ته وړاندې کړي دي.

د دغه وزارت چارواکو ویلي، چې د ګومارنې بهیر به پر بشپړ روڼتیا ترسره شي او کسان به یوازې د وړتیا، پوهې او کاري ځواک پر بنسټ وټاکل شي. په دې بهیر کې به هیڅ راز قومي او سمتي معیار ته پاملرنه ونه‌شي.

د کار او ټولنیزو چارو وزارت مرستیال محمد زاهد احمدزي ویلي، چې بېرته راستنېدونکي کډوال د ګومارنې په لومړیتوب کې دي او د بېلابېلو ادارو پر همکارۍ د کاري فرصتونو د برابرولو هڅې روانې دي.

د پوهنې وزارت مسوولانو زیاته کړې، چې دغه بستونه د نوي تشکیلاتي جوړښت پر بنسټ او د هېواد په ۴۷۳ ولسوالیو کې د اداري کدرونو د پیاوړتیا لپاره رامنځته شوي دي.