آریانا ټلویزیون د کابل غوره لیګ د راتلونکو درې پړاوونو د تولید او خپرولو حق ترلاسه کړ

آریانا راډیو ټلویزیون له ایوبي سپورټ کمپلیکس سره د کابل غوره لیګ نومی د ۲۰ اوریز کرکټ سیالیو د راتلونکو درې پړاوونو د تولید او خپرولو لپاره تړون لاسلیک کړ.

دا تړون دیکشنبې پر ورځ ( د وږي درویشتمه) د آریانا راډیو ټلویزیون مشر حبیب دراني او د ایوبي سپورټس کمپلیکس مشر عبداللطیف ایوبي لخوا لاسلیک شو. د قرارداد له مخې، آریانا تلویزیون به د کابل غوره لیګ درېیم، څلورم او پېنځم پړاوونه تولید او خپاره کړي.

په دې پړاو کې به شپږ لوبډلې سیالي وکړي: پامیر سټارز، سپین غر واریرز، کابل نایټ رایډرز، کابل زلمي، بند امیر سټارز او اباسین دیفنډرز.

ټاکل شوې، چې د لیګ درېیم پړاو به راتلونکې میاشت په کابل کې پیل شي.

عبداللطیف ایوبي په دې مراسمو کې ویلي: ” کابل غوره لیګ په هېواد کې یو له لویو کورنیو لیګونو څخه دی. ډېری ځوانان په کې ځلیدلي؛ لومړی او دوه‌یم پړاونه ښه ترسره شول.”

هغه زیاته کړې: “سږ کال به دا سیالۍ د تېرو هغو پر پرتله ښې وي. ښه خبر دا دی، چې دا ځل به یوه لوبه د ورځې په اوږدو کې او یوه لوبه به د شپې ترسره شي. مونږ په لوبغالي کې د رڼا یو معیاري سیسټم لګولی دی”.

حبیب دراني ویلي: “زه هیله من یم، چې دا سیالۍ به د تېرو دوه سیالیو پر پرتله په هره برخه کې غوره وي. زه له خپلو هېوادوالو غوښتنه کوم، چې لوبغالي ته راشي او هڅونه وکړي.”

د لوبغاړو غوراوی به د جمعې پر ورځ ترسره شي، چې ورسره به د لوبډلې جوړښت هم وروستی شي او تمه ده، چې هره لوبډله به د تجربه لرونکو افغان لوبغاړو او راڅرګندیدونکي سیمه‌ییزو استعدادونو ترکیب ولري.

لوبډلې به د ۱۲ ورځو په اوږدو کې د درېیم فصل اتلولۍ تر سرلیک لاندې د یو بل پر وړاندې سیالي وکړي.

دا سیالۍ به په ایوبي سپورټ کمپلیکس کې ترسره شي او آریانا راډیو ټلویزیون به دا سیالۍ په ټلویزیون او ډیجیټل پلیټ فارمونو کې خپرې کړي.