سیمه ییز خبرونه
ادارې فساد دومره پراخ شوى، چې پارلمان هم پكې ښكېل شوى دى
د ولسي جرگې د قضايي جرگه گۍ رئيس وايي، چې په ولايتي ادارو كې د واليانو او رئيسانو په توگه له وړتيا پرته زياتره هغه كسان مقرر شوى، چې له لوړ پوړو چارواكو سره اړيكې لري.
په دولتي ادارو كې د وړتياوو په پام كې نيولو پرته د كسانو په دنده گومارل او ادارې فساد هغه ستونزې دې، چې د دولت او خلكو تر منځ يې واټن را منځته كړى دى.
كه څه هم، چې حكومت له ادارې فساد سره د جدي مبارزې خبر وركوي، خو د ولسي جرگې د قضايي جرگه گۍ رئيس محمد سرور عثماني په ادارو كې د پراخ مالي فساد او د روابطو پر بنسټ په ولايتي ادارو كې د كسانو په دنده گومارلو اندېښمن كړى دى.
د هغه په وېنا زياتره هغه كسان په ولايتي ادارو كې د واليانو او رئيسانو په توگه ټاكل شوي، چې په مركز كې له لوړ پوړو چارواكو سره اړيكې لري.
عثماني په بلخ كې له قضايي بهير څخه د كتنې په ترڅ كې وويل، چې فساد دومره پراخ شوى چې اوس يې پارلمان ته هم مخه كړې ده.
د ادارې فساد مخنيوى او د ښې حكومتدارۍ رامنځته كول هغه شرطونه دى، چې نړيوالې ټولنې د توكيو په نړيوال كنفرانس كې پر افغان دولت كېښودل.
په دغه كنفرانس كې د نړيوالې ټولنې استازو وويل، چې له افغانستان سره به خپلې مرستې د افغان دولت لخوا له ادارې فساد سره په كلكه مبارزه او ښې حكومتدارى مشروطي وساتي.