تازه خبرونه
اسلامي امارت ومنله، چې د ايران د اوبو حق بايد پرېښودل شي – ايران
د ایران چاپېریال ساتنې ادارې مشر علي سلاجقه د یوه دولتي پلاوي د غونډې په څنډه کې خبریالانو ته څرګنده کړې، چې ایران ته د افغانستان د اقتصادي پلاوي د سفر پر وخت د لومړي ځل لپاره اسلامي امارت د ایران د اوبو د حق خوشې کېدل ومنل.
علي سلاجقه وايي: له شاوخوا ۱۸۰ ورځو راپدیخوا د زابل خلک د دوړو له کبله له ستونزو سره مخ دي؛ نو له همدې کبله مو د طالبانو ( اسلامي امارت ) له پلاوي غوښتنه وکړه؛ دا مهال د سیندونو د لندبل لپاره دې اوبه راخوشې او د دوړو مخه ونیول شي. ( د اسلامي امارت پلاوي) ومنله، چې د بندونو د اوبو د سرچینو په اړه به لازمې څېړنې ترسره کړي.
د ایران چاپېریال ساتنې ادارې مشر په افغانستان کې د دوړو د سیمو پر نښه کولو ته په نغوته کې ویلي: له نېکه مرغه دوی ژمنه وکړه، چې دا موضوع به په تهران کې د افغانستان چاپېریال ساتنې له مسوولینو سره ګډه وڅېړل شي.
د افغانستان اسلامي امارت تر دې دمه په دې اړه څه نهدي ویلي.