Connect with us

تازه خبرونه

اسلامي امارت یو مسوول حکومت دی – عبدالسلام حنفي

خپور شوی

د

Last Updated on: تله ۲۹, ۱۴۰۰

د افغانستان د لومړي وزیر مرستیال مولوي عبدالسلام حنفي د چارشنبې پر ورځ د تلې پر ۲۸ د مسکو په نړیواله ناسته کې نړۍ ته ډاډ ورکړ، چې له هېواده به یې دوی ته هیڅ راز ګواښ پېښ نشي.

مولوی حنفی ویلي، چې اسلامي امارت یو مسوول حکومت دی.

نوموړي په دې اړه زیاته کړې؛ د سیمې او نړۍ په ځانګړي توګه ګاوند هېوادونو ته داډ ورکوو، چې د افغانستان امنیتي حالت د ډاډمن دی او په کې د نړۍ نږدې او لرې هېوادونو ته هیڅ راز ګواښ نشته.

هغه په ډاګه کړې: زه غواړم تاسې ته یادونه وکړم، چې د افغانستان خلک په نړۍ کې کوم هېواد یا ملت ته د زیان رسولو اراده نلري او د یوه متمدن ملت په توګه د خپل مذهب، فرهنګ او لوړو انساني ارزښتونو لرونکي دي. مونږ غواړو په سوله ییز چاپېریال کې ژوند وکړو. مونږ له ګاونډ هېوادونو، سیمې او نړۍ سره داسې اړیکې غواړو، چې د ملي حاکمیت او متقابل درناوي اصول په کې بنسټیز وي.

هغه زیاته کړې، چې افغانان اوس د یوه مسوول حکومت لرونکي او د ملي ګټې په لټه کې دي.

مولوي عبدالسلام حنفي زیاته کړې: په سیاسي نظام کې د اصلاحاتو بهیر وخت ته اړتیا لري، خو زمونږ په مشرتابه کې عزم او اراده شته، چې خلکو ته معیاري او چټک خدمات وړاندې کړي.

نوموړي څرګنده کړې؛ د طالبانو مشرتابه هڅه کړې، چې په نوي حکومت کې د افغانستان د ټولو قومونو او پرګنو استازي یقیني کړي.

مولوي حنفي زیاته کړې؛ اسلامي امارت هڅه کوي، چې ټول توکمیز ګروپونه په حکومت کې شامل کړي.

هغه وایي: مونږ باید په یاد ولرو، چې وروستی پرمختګ یو انقلابي و؛ خو مونږ خپلو خلکو ته ډاډ ورکوو، چې د هېواد په سیاسي جوړښت کې د اصلاحاتو بهیر روان دی. دا باید هیر نکړو، چې په سیاسي سیسټمونو کې د اصلاحاتو پروسه وخت نیسي او مونږ ډاډه یو، چې نوی حکومت به خلکو ته معیاري او ګړندي خدمات وړاندې کړي.

هغه ویلي؛ د غني د رژيم ټول سیاسي او ټولنیز جوړښت له فساده ډک و او د هغه د رژیم تر وروستیو شېبو له اداري فساد سره د مبارزې په برخه کې پرمختګ رامنځته نشو.

هغه ویلي؛ له تېرو سیاسي مشرانو څخه طالبانو ته داسې حکومت پر میراث پاتې شو، چې د ګاونډ هېوادونو  پوروړی دی.

نوموړي له امریکا غوښتي، چې د دغه هېواد په بانکونو کې د افغانستان شتمني آزاده کړي او خلک باید د سیاسي نظرونو د توپیر بیه ورنکړي.

د نوموړي د څرګندونو له مخې؛ طالبان نړیوالې ټولنې ته ډاډ ورکوي، چې خپل ټول ملي او نړیوال مسوولیتونه په ښه توګه    پېژني او د نړۍ له هېوادونو سره د ملي ګټو پر بنسټ ټینګې اړیکې غواړي او خپلو ملي ګټو ته ژمن او د خپل هېواد سیاسي آزادي خوندي کوي.

د افغانستان د لومړي وزیر مرستیال زیاته کړې؛ نوي اسلامي حکومت په لنډه موده کې ثابته کړه، چې د فساد پر وړاندې مبارزه کې ټینګه اراده لري.

حنفي وایي، چې په تېرو ۴۰ کلونو کې دا  لومړي ځل دی، چې حکومت پر ټول افغانستان واکمني کوي.

هغه وایي: له څلویښت کلونو جګړو او ویجاړیو وروسته اوسني حکومت د لومړي ځل لپاره د هېواد په ټولو برخو کې د نظام حاکمیت ډاډمن کړی دی. افغانستان اوس یو سیاسي جوړښت لري، چې له رڼې تګلارې او متحدې  قومندې برخمن دی. مونږ د افغانستان لرونکي یو. نور د واک و ځواک ټاپوګان نلرو.

نوموړي له نړیوالې ټولنې وغوښتل، چې اسلامي امارت د یوه دولت ټول شرایط پوره کړي؛ د ملي حاکمیت لرونکی دی او باید پر رسمیت وپېژندل شي.

هغه د اسلامي امارت انزوا د نړۍ په ګټه نه بولي او وایي: د لومړي ځل لپاره زمونږ خلک ملي حکومت لري. دوی تمه لري، چې نړیواله ټولنه د دوی له حکومت سره رسمي تعامل ولري. د افغانستان انزوا په هیڅ ډول ګټوره نده او دا په تېرو وختونو کې ثابته شوې ده. افغانستان چمتو دی، چې د نړیوالې ټولنې ټولې اندېښنې په پوره وضاحت، رڼښت او آزادۍ حل کړي.

د مسکو دغونډې په څنډه کې مولوي حنفي د روسیې د بهرنیو چارو وزیر سرګي لاوروف سره هم ولیدل.

د افغانستان د بهرنیو چارو وزارت ویاند عبدالقهار بلخي په دې اړه ویلي، چې په دې ناسته کې د دواړو هېوادونو ترمنځ د اړیکو پر ثبات او د افغانستان د راتلونکې په اړه بحث او خبرې شوې دي.

دغه راز چین د مسکو په غونډه کې پر ګډونوالو غږ کړی، چې له افغانانو سره د افغانستان په بیارغونه او دوی ته د بشري مرستو په رسولو کې ډاډمن ګامونه واخلي.

چین دا هم ویلي، چې د افغانستان په کورنیو چارو کې به لاسوهنه نکوي.

د مسکو په کوربتوب، د چین او پاکستان درې اړخیزې غونډې ته امریکا له ورتګه ډډه وکړ او روسیې دا خواشینوونکی کار بللی، خو ایران، هندوستان او د مرکزي آسیا د هېوادونو استازي ورغلل.

د یادونې ده، چې د اسلامي امارت استازي د غوندې ګډونوالو ته د افغانستان امنیتي، اقتصادي او سیاسي دریځ روښانه کړ او هغوی ته یې ډاډ ورکړ، چې افغانستان هم د ملي ګټو پر بنسټ له نړۍ سره د اړیکو ټینګول غواړي.

تازه خبرونه

قطر د افغانستان او نړیوالې ټولنې ترمنځ د اړیکو په پراختیا کې رغنده رول لوبولی – امیرخان متقي

د بهرنیو چارو وزارت د خبرپاڼې له مخې؛ امیر خان متقي دغه څرګندونې نن( سې‌شنبه د چنګاښ نهمه ) په کابل کې د قطر دولت له سفیر مردف القاشوطي سره په لیدنه کې کړې دي.

Published

on

 

د افغانستان اسلامي امارت بهرنیو چارو وزیر امیرخان متقي ویلي؛ قطر د افغانستان او نړیوالې ټولنې ترمنځ د اړیکو د پراختیا په برخه کې رغنده رول لوبولی او خپلې هڅې یې پرله‌پسې روانې ساتلې دي.

د بهرنیو چارو وزارت د خبرپاڼې له مخې؛ امیر خان متقي دغه څرګندونې نن( سې‌شنبه د چنګاښ نهمه ) په کابل کې د قطر دولت له سفیر مردف القاشوطي سره په لیدنه کې کړې دي.

د بهرنیو چارو وزیر د افغانستان او قطر اړیکې مثبتې او مخ پر ودې وبللې او د دواړو هېوادونو ترمنځ یې د همکاریو پر پراختیا ټینګار څرګند کړ.

دغه راز د افغانستان او قطر ترمنځ د دوه‌اړخیزو اړیکو د پراختیا ترڅنګ د ګډو ګټو اړوند پر یو شمېر سیمه‌ییزو موضوعاتو هم د نظر تبادله شوې ده.

په دې خبرپاڼه کې راغلي؛ د قطر سفیر د خپل هېواد او افغانستان اړیکې تاریخي او ژورې وبللې او څرګندوي، چې قطر د خپل منځګړي بهرني سیاست په چوکاټ کې د افغانستان او نړیوالې ټولنې ترمنځ د رغنده تعامل او اړیکو له پراختیا ملاتړ ته ژمن پاتې دی.

Continue Reading

تازه خبرونه

هند د پاکستان وروستي بریدونه وغندل او د افغانستان د حاکمیت پر ملاتړ یې ټینګار وکړ

د یاد وزارت د دوشنبې د ورځې په خبرپاڼه کې راغلي، چې دا اقدام د افغانستان له حاکمیت ښکاره سرغړونه ده او د سیمې د سولې او ثبات پر وړاندې مستقیم ګواښ ګڼل دی.

Published

on

 

د هند بهرنیو چارو وزارت پر افغان خاوره د پاکستاني پوځي رژیم هوايي بریدونه غندلي او څرګندوي، چې دغو بریدونو د ښځو او ماشومانو په ګډون یو شمېر ملکي وګړو ته مرګ او ژوبله اړولې ده.

د یاد وزارت د دوشنبې د ورځې په خبرپاڼه کې راغلي، چې دا اقدام د افغانستان له حاکمیت ښکاره سرغړونه ده او د سیمې د سولې او ثبات پر وړاندې مستقیم ګواښ ګڼل دی.

د خبرپاڼې له مخي؛ دغه بریدونه د پاکستان د «بې‌پروا چلند» دوام ښيي او دا ښیي، چې اسلام‌آباد هڅه کوي خپلې کورنۍ ناکامۍ په افغانستان کې د تاوتریخوالي له لارې پټې کړي.

د هند بهرنیو چارو وزارت د قربانیانو له کورنیو سره خواخوږي څرګنده کړې؛ ټپیانو ته یې د بېړنۍ روغتیا هیله کړې او یو ځل بیا یې د افغانستان له حاکمیت، خپلواکۍ او ځمکني بشپړتیا څخه پخپل کلک ملاتړ ټینګار څرګند کړی دی.

د یادونې ده، چې د اسلامي امارت د څرګندونو له مخې؛ اوړمه شپه د پاکستاني پوځي رژیم په هوايي بریدونو کې یې د پکتیا، پکتیکا او کونړ ولایتونه ۳۶ ملکي وګړي «شهیدان» او ۱۶۳ نور ټپیان کړي دي.

Continue Reading

تازه خبرونه

پاکستان دې د ملګرو ملتونو غوښتنې ته غوږ ونیسي او ډیپلوماسۍ دې غوره کړي

خلیل‌زاد په ایکس‌پاڼه کې لیکلي، چې د ملګرو ملتونو سرمنشي له افغانستان او پاکستان غوښتي، چې تاوتریخوالي ته د پای ټکی کېدي او خپل اختلافات د ډیپلوماسۍ له لارې حل کړي.

Published

on

 

د افغانستان د سولې لپاره د امریکا پخواني ځانګړي استازي، زلمي خلیل‌زاد د ملګرو ملتونو د سرمنشي، انټونیو ګوټرش له هغې غوښتنې وروسته، چې د افغانستان او پاکستان ترمنځ یې د تاوتریخوالي د پای ته رسېدا غوښتنه کړې؛ له اسلام‌آباد وغوښتل، چې ډیپلوماټیکو حل‌لارو ته مخه کړي.

خلیل‌زاد په ایکس‌پاڼه کې لیکلي، چې د ملګرو ملتونو سرمنشي له افغانستان او پاکستان غوښتي، چې تاوتریخوالي ته د پای ټکی کېدي او خپل اختلافات د ډیپلوماسۍ له لارې حل کړي.

هغه زیاته کړې؛ افغانستان څو ځله ویلي، چې ډیپلوماټیکه حل‌لاره غوره بولي او د کړکېچ د کمولو لپاره یې څو وړاندیزونه هم کړي دي.

د امریکا پخواني ځانګړي استازي پوښتنه کړې:« آیا په پاکستان کې واکمن جوړښت به د ملګرو ملتونو د سرمنشي غوښتنې ته غوږ ونیسي؟»

خلیل‌زاد د خپلې څرګندونې په پای کې لیکلي: «هیله لرم همداسې وشي، خو په دې اړه ډېر خوش‌بین نه یم.»

د خلیل‌زاد دغه څرګندونې په داسې وخت کې راپورته کیږي، چې د پاکستاني پوځي رژیم له وروستیو بریدونو وروسته ملګرو ملتونو هم د تاوتریخوالي د سمدستي درېدا او د ملکي وګړو د خوندیتوب غوښتنه کړې ده.

Continue Reading
Advertisement

Trending

Copyright © 2025 Ariana News. All rights reserved!


Warning: Undefined array key "slug" in /var/www/vhosts/ariananews.af/httpdocs/wp-includes/class-wp-theme-json.php on line 2117

Warning: Undefined array key "slug" in /var/www/vhosts/ariananews.af/httpdocs/wp-includes/class-wp-theme-json.php on line 2117

Warning: Undefined array key "slug" in /var/www/vhosts/ariananews.af/httpdocs/wp-includes/class-wp-theme-json.php on line 2117