افغانستان د متحده عربي اماراتو د یو ورځنیو لوبو د درې‌اړخیزې سیالۍ په لړ کې د صدیق‌الله اتل د سلیزې او د راشد خان د څلور ویکټو پر مټ زمبابوې ته د ۱۵۸ منډو پر توپیر ماتې ورکړه.

افغان لوبډلې لومړی توپوهنه وکړه او د ټولو لوبغاړو پر سوځېدا یې ۲۹۴ منډې جوړې کړې.

صدیق‌الله اتل ۱۰۲ او ابراهیم ځدراڼ ۹۰ منډې وکړې.

دغو دوه لوبغاړو د دوه‌یمې ویکټې لپاره د ۱۴۰ منډو ملګرتیا جوړه کړه او افغانستان یې په پیاوړي دریځ کې ودراوه؛ خو د لوبډلې وروستي شپږ لوبغاړي یوازې د ۳۵ منډو پر جوړولو وسوځېدل.

زمبابوی لوبډله د هدف پوره کولو لپاره ښه ونه‌ځلېده او په ۳۸.۴آورونو کې یې د ټولو لوبغاړو پر سوځېدا یوازې ۱۳۶ منډې جوړې کړې.

راشد خان د افغانستان په توپ‌اچونه کې وځلېد او د ۱۷ منډو په بدل کې یې څلور ویکټې واخیستې.

رایان برل ۳۱ او سکندر رضا ۴۸ منډې وکړې. دا دواړه د زمبابوې له هغو مهمو لوبغاړو څخه ول، چې لوبډلې ته یې ۷۹ منډې جوړې کړې؛ خو وسوځېدل.

فضل‌الحق فاروقي او عظمت‌الله عمرزي هم په لومړیو کې ویکټې واخیستې او زمبابوې یې د ۴۳ منډو پر جوړولو د څلور لوبغاړو له سوځېدا سره مخ کړه.

افغان توپ‌اچوونکو تر پایه پر سیالې لوبډلې فشار وساته او د هغو د منډو جوړولو مخه یې ونیوله.

د صدیق‌الله اتل ۱۰۲ منډې وکړې، چې دا یې په یو ورځنیو نړیوالو سیالیو کې درېیمه سلیزه وه؛ خو ابراهیم ځدراڼ خپلې سلیزې ته ونه‌رسېد او پر ۹۰ منډو وسوځېد.

له دې بریا سره افغانستان د درې‌اړخیزې سیالۍ پایلوبې ته د لار موندلو په سیالۍ کې پاتې شو.

د افغانستان او زمبابوې لوبډلې هره یوه دوه نومرې لري. د چارشنبې پر ورځ به له بنګله‌دېش سره د افغانستان وروستۍ ډله‌ییزه لوبه پایلوبې ته د پاتې لارموندونکي لوبډلې برخلیک روښانه کړي.

د افغانستان فوټسال ملي لوبډلې د یکشنبې پر ورځ د برازیل د شپږ‌اړخیزو سیالیو په پایلوبه کې د کوربه لوبډلې پر وړاندې ۶ پر صفر ماتې وخوړه او د دغو سیالیو دوه‌یم مقام یې خپل کړ.

فابینیو دوه ګولونه او لئانډرو لینو، کلبر، سرجینیو او روفینو هر یوه یو ګول وواهه او د افغانستان د لوبډلې دروازه یې پرانیسته.

د افغانستان فوټسال ملي لوبډلې په نیمه‌پایلوبه کې کیپ‌ورډ ته د ۴ پر ۲ ماتې ورکړه او پایلوبې ته یې لار وموندله.

د افغانستان فوټسال ملي لوبډلې لوبغاړو له دې مخکې د ګروپي پړاو په سیالیو کې له جاپان سره پرته له ‌ګول وهلو مساوي شوه او پیرو ته یې د ۳ پر صفر پر ماتې ورکولو بریا خپله کړې وه. افغانستان د دغو پایلو له مخې، پایلوبې ته له رسېدا مخکې په خپلو ټولو سیالیو کې له ماتې پرته پایلوبې ته لار وموندله.

دغه راز برازیل له دې بریا سره د درېیم ځل لپاره د دغو سیالیو اتلولي وګټله.

دې لوبډلې له دې مخکې په ۲۰۲۳ او ۲۰۲۵ز.کلونو کې هم د دغو سیالیو اتلولي خپله کړې وه.

که څه هم افغانستان په پایلوبه کې ماتې وخوړه؛ خو د دغو سیالیو پایلوبې ته د هېواد د فوټسال ملي لوبډلې لار موندل په نړیواله کچه د پام وړ لاسته‌راوړنه ګڼل کېږي.