افغانستان به د ریاض ۲۰۲۵ اسلامي پیوستون هېوادونو لوبو ته ۶۹ لوبغاړي واستوي

افغانستان د ۲۰۲۵ سعودي عربستان ریاض اسلامي پیوستون هېوادونو په لوبو کې ګډون کوي؛ ۶۹ لوبغاړي به یې ۱۳ لوبې ترسره کړي.

دا لوبې د اسلامي پیوستون سپورټ ټولنې تنظیم کړي او د اسلامي همکاریو ټولنې د غړو هېوادونو لوبغاړي سره راټولوي.

د آریانا راډیو او ټلویزیون له‌خوا د ترلاسه شويو توضیحاتو له مخې، چې د لوبو رسمي خپرونکی دی؛ د افغانستان په پلاوي کې د منډې وهلو (۲) بواکس(۲) فوټسال (۱۴) جوجیټسو (۷)، کراټې (۳) موی تای (۲) لامبو وهلو (۴) میز ټینس (۲) تکوانډو (۵)، والیبال (۱۲)، وزن پورته کولو (۴) غېږ‌نیونې (۹) او ووشو (۳) لوبغاړي برخه لري.

دا تر دې دمه د اسلامي پیوستون هېوادونو په لوبو کې د افغانستان ترټولو لویه لوبډله ده، چې د سپورټ او نړیوالو سیالیو په پراختیا کې نوې ملي پانګونه منعکسوي.

د افغانستان المپیک ملي کمیټې ټینګار کړی، چې لوبغاړي په کابل او بهر کې پراخه کچه روزنه تر لاسه کوي. په دې هیله، چې د تکواندو او غېږې نیولو په څیر اړوند برخو کې د هېواد لپاره د سرو زرو لومړني مډالونه وګټي. دا هغه څانګې دي، چې لوبغاړو یې په وروستیو سیمه‌ییزو سیالیو کې ښې هڅې ترسره کړې دي.

د لوبو ۲۰۲۵ پړاو به د اسلامي پیوستون سپورټ ټولنې پېنځه‌ویشتمه کلیزه هم ولمانځي او د مسلمانو هېوادونو ترمنځ به د یووالي، کلتوري تبادلې او سولې په وده کې د دې پېښې رول روښانه کړي.

آریانا راډیو ټلویزیون، چې په افغانستان کې د لوبو رسمي خپرونکی دی؛ څرګندوي، چې د افغان لوبغاړو د فعالیتونو بشپړ پوښښ به وړاندې کړي.

د ۲۰۲۵ اسلامي پیوستون هېوادونو لوبې به د لړم له شپاړلسمې څخه تر دېرشمې / د نومبر له اوومې څخه تر یوویشتمې پورې په ریاض کې ترسره شي، چې د دې پېښې شپږم پړاو دی.

دا لوبې به د اسلامي همکاریو ټولنې (OIC) د ۵۷ غړو هېوادونو څخه شاوخوا ۳۵۰۰ لوبغاړي په ۲۱ سپورتي څانګو او دوه پارا سپورټي برخو کې سیالي وکړي. دا سیالۍ له ۲۰ کلونو وروسته سعودي عربستان ته پر برخه شوي دي. د دې لوبو لومړی پړاو پر ۲۰۰۵ کال په دې هېواد کې ترسره شوی و.