Connect with us

تازه خبرونه

افغانستان د کوچنیو بار وړونکیو او مسافر وړونکیو موترو تولید پیل کړ

خپور شوی

د

Reuters

افغانستان په لومړي ځل بریالی شو، چې  په کور دننه د کوچنیو بار وړونکیو او مسافر وړونکیو موترو تولید پیل کړي.

د هېواد په شمالي ولایت بلخ کې یو خصوصي شرکت بریالی شوی، چې خپل تولید شوی موتر په رسمي بڼه بازار ته وړاندې کړي.

د دې تولیدوونکې کارخونې مشر ویلي؛ د پېنځه میلیون دالرو په پانګونه بریالی شوی، چې دغه برښنايي موتر او بطرۍ تولید او بازار ته وړاندې کړي.

د نوموړي د څرګندونو له مخې؛ تولیدات یې د ګاونډ هېوادونو په پرتله له ښه کیفیته برخمن دي.

د اقتصاد وزارت مسوولینو ويلي؛ د کورنیو تولیداتو د ملاتړ لپاره د نړیوال بانک په مرسته پېنځه سوه ۶۹ میلیون دالر ځانګړي شوي او دا پیسې به د کورني تولید د هڅونې په موخه  خصوصي سکتور ته ورکړ شي.

پانګوال محمد امین نور وایي: مونږ د سیمي او ګاونډ هېوادونو په کچه په لوړ کیفیت تولید لرو. له حکومته موهیله ده، چې د کورني تولید ملاتړ وکړي.

د سوداګرۍ او پانګونې خوني غړی خانجان الکوزی وایي، چې حکومت باید له دغو تولیداتو څخه په لیلیو، روغتونونو او وزارتونو کې ګټه پورته کړي، چې د کورني تولیدي توکو وړتیا نوره هم لوړه شي.

د اقتصاد وزیر د یادې کارخونې د تولیداتو د پېژندنې په غونډه کې وویل، چې حکومت هڅه کوي د کورني تولیداتو د هڅونې لپاره د نړیوال بانک په همکارۍ ۵۶۹ میلیون دالر خصوصي سکټور ته په واک کې ورکړي.

د اقتصاد وزیر مصطفی مستور وایي: مونږ د کورنیو تولیداتو او صنعت د پراختیا لپاره تدابیر نیولي او د هڅونې لپاره یې نړیوال بانک ۵۶۹ میلیون دالر ورکوي، چې ۳۴۸ میلیون يي له ګټي پرته دي.

د صنعت او سوداګرۍ وزارت مرستیال عبدالکریم ملکیار څرګنده کړې: مونږ د کورني تولیداتو د پراختیا  لپاره پالیسۍ او قوانین آسانه کړي، چې بېخبناوو ته د خصوصي سکتور لاسراسي پراخ کړي.

د ولسي جرګې غړي بیا پر سکتوري وزارتونو تورلګوي، چې دوی د کورني صنعت د ملاتړ لپاره لازم اقدامات نکوي.

د ولسي جرګي غړی خان محمد وردګ ویلي، چې حکومت په لومړۍ درجه برخه کې د صنعت او تولید د ملاتړ روهیه شته؛ خو د وزارتونو په کچه دا روحیه وجود نلري.

د اقتصادي چارو کارپوهان هم بیا وايي، چې افغان حکومت باید د تولید د پراختیا لپاره خصوصي سکتور ته د امنیت ترڅنګه ، ځمکې، برښنا او د پور د تر لاسه کولو په برخه کې سهولیتونه رامنځته کړي.

تازه خبرونه

افغانستان او ایران د ګمرکي همکاریو پر پراختیا هوکړه وکړه

دا هوکړې د افغانستان مالیې وزیر محمد ناصر آخوند او د ایران د اقتصاد او مالیې وزیر ډاکټر مدني‌زاده ترمنځ په تهران کې د لیدنې پر مهال شوې دي.

Published

on

 

د افغانستان او ایران چارواکو د دواړو هېوادونو د ګمرکي نظامونو پر نښلولو، د ګمرکي فعالیتونو پر ۲۴ ساعته کولو، په بندرونو کې د موټرو د تګ راتګ پر زیاتولو او د سوداګرۍ د پراختیا لپاره د آسانتیاوو پر رامنځته کولو هوکړه کړې ده.

دا هوکړې د افغانستان مالیې وزیر محمد ناصر آخوند او د ایران د اقتصاد او مالیې وزیر ډاکټر مدني‌زاده ترمنځ په تهران کې د لیدنې پر مهال شوې دي.

د مالیې وزارت د څرګندونو له مخې، د اسلام‌کلا بندر ګمرکي فعالیتونه به د راتلونکې شنبې له ورځې ۲۴ ساعته شي.

دواړو لوریو په بندرونو کې د موټرو د ځنډېدا او د د ګمرکي محصولاتو د ورکړې ستونزې(خاک‌پولي) پر اواري، د قاچاقي توکو پر مخنیوي او ایران ته د افغان صادراتو لپاره د آسانتیاوو پر برابرولو خبرې کړې دي.

په دې لیدنه کې د پانګونې، سوداګرۍ، ټرانزیټ، سرحدي او ګمرکي مسایلو او د دوه‌اړخیزو اقتصادي همکاریو د ګډ کمیسیون پر فعالیتونو هم خبرې شوې دي.

Continue Reading

تازه خبرونه

د افغانستان اقتصادي وده روانه ده؛ خو د کورنیو عواید او د اوبو کمښت د اندېښنې وړ دي– نړیوال بانک

د نړیوال بانک په تازه راپور کې راغلي، چې په روان کال کې د افغانستان سرانه اقتصادي تولید ۳.۳ سلنه کم شوی او دا پرله‌پسې درېیم کال دی، چې سرانه تولید په کې راټیټېږي.

Published

on

 

نړیوال بانک ويلي؛ د افغانستان اقتصاد به په ۲۰۲۶ز.کال کې د کرنیزو حاصلاتو د ښه‌والي له کبله درې سلنه وده وکړي؛ خو د سرانه عوایدو کمښت، د خوراکي توکو د بیو لوړوالی او د اوبو د کمښت زیاتېدا پر کورنیو فشارونه ډېر کړي دي.

د نړیوال بانک په تازه راپور کې راغلي، چې په روان کال کې د افغانستان سرانه اقتصادي تولید ۳.۳ سلنه کم شوی او دا پرله‌پسې درېیم کال دی، چې سرانه تولید په کې راټیټېږي.

راپور زیاته کړې، چې د کاري فرصتونو کمښت او د خوراکي توکو د بیو لوړوالي د کورنیو د پېر ځواک کم کړی او شاوخوا ۱۵.۹ میلیون افغانان د ۲۰۲۶ز.کال په سپټمبر او اوکټوبر کې د خوړو له سختې ناامنۍ سره مخ ول.

نړیوال بانک همداراز ویلي، چې افغانستان له ۲۰۰۳زږکال راپدېخوا هر کال په منځني ډول شاوخوا ۴.۹ میلیارډ مټرمکعبه د خوږو اوبو زېرمې له لاسه ورکوي او په کابل کې د ځمکې لاندې اوبو ایستل د دغو زېرمو د طبیعي بیارغېدا له کچې نږدې څلور برابره زیات دي.

د دې بنسټ د اټکل له مخې؛ د افغانستان اقتصادي وده به په ۲۰۲۷ز.کال کې ۳.۳ او په ۲۰۲۸ز.کال کې ۳.۵ سلنې ته ورسېږي؛ خو له دې سره- سره به په ۲۰۲۸ز.کال کې سرانه تولید د ۲۰۲۴ز.کال پر پرتله شاوخوا اووه سلنه ټیټ وي.

د دولتي عوایدو په برخه کې، نړیوال بانک ویلي، چې د افغانستان کورني عواید د ۲۰۲۶ز. کال په لومړۍ نیمایي کې ۱۰.۲ سلنه زیات شوي دي. د کورنیو مالیاتو او غیرمالیاتي عوایدو زیاتوالي د ګمرکي عوایدو کموالی جبران کړی؛ خو له دې سره- سره عامه پانګونه اوس هم ټیټه ده او اټکل کېږي، چې په روان مالي کال کې د دولت پراختیايي لګښتونه د ناخالص کورني تولید شاوخوا ۱.۳ سلنې ته ورسېږي.

دغه راز له پاکستان سره د لارې د تړل کېدا له کبله اوس د افغانستان شاوخوا ۹۷ سلنه واردات د منځنۍ آسیا او ایران له لارې هېواد ته راوړل کېږي. همداراز د ۲۰۲۶ز. کال له اپریل څخه تر سپټمبر پورې د افغانستان صادرات د تېر کال د همدې وخت پر پرتله ۱۵.۱ سلنه کم شوي دي.

د نړیوال بانک د څرګندونو له مخې، د اوبو کمښت د کلیوالو سیمو د اوسېدونکو معیشت هم له خطر سره مخ کړی دی. کرنه د هېواد ۴۶ سلنه کاري ځواک په ځان کې ځایوي او په افغانستان کې د اوبو د ټولو ایستلو ۹۵ سلنه برخه دې برخې ته ځانګړې شوې ده.

نړیوال بانک خبرداری ورکړی، چې د کرنیزو حاصلاتو کمښت، د سوداګریزو لارو د لا زیات ګډوډېدا، د افغان کډوالو د پراخې راستنېدنې او د نړیوالو مرستو د کمېدا له کبله رامنځته کېدونکي وضعیت کولی شي د افغانستان اقتصادي لیدلوری کمزوری کړي.

په دې راپور کې د سوداګریزو خوندي لارو جوړول، هغو ولایتونو کې د کاري فرصتونو پراخول، چې ډېر راستنېدونکي کډوال مني او ښځو او نجونو ته د زده‌کړو او کار د بیا لاسرسي زمینه برابرول، په افغانستان کې د ژوند د کچې د ښه کېدا له لومړیتوبونو بلل شوي دي.

نړیوال بانک د اوبو د سرچینو د مدیریت په برخه کې هم د اوبو رسولو او حفظ‌الصحې د بنسټیزو خدمتونو پر بیا رغولو، د اوبو لګولو د سیسټمونو پر رغونې او د اوبو د زیرمو او ځمکې لاندې اوبو د زېرمو پر ساتنې ټینګار کړی دی.

د« افغانستان پراختیايي وضعیت تازه‌کتنه» راپور د افغانستان د اقتصاد او ټولنې په اړه د نړیوال بانک د دوامداره څېړنیزو، څارنیزو او شننیزو فعالیتونو یوه برخه ده، چې موخه یې د شواهدو پر بنسټ د پالیسۍ جوړونې ملاتړ او نړیوالې ټولنې ته د افغانستان د اقتصادي بدلونونو په اړه معلومات ورکول دي.

Continue Reading

تازه خبرونه

د افغانستان او آذربایجان سټراټیژیکو مطالعاتو استازو پر کاري همکاریو ټینګار وکړ

د آذربایجان د نړیوالو او څو‌کلتوري اړیکو د تحلیل مرکز د مدیره پلاوي رییس فرید شفی‌یوف د افغانستان د سټراټیژیکو مطالعاتو د مرکز له رییس عبدالحی قانت سره په ګډه غونډه کې ویلي، چې په دې ناسته کې به د دواړو هېوادونو پر اړیکو او د سیمې پر اوسني وضعیت خبرې وشي.

Published

on

 

د افغانستان بهرنیو چارو وزارت د سټراټیژیکو مطالعاتو مرکز استازي د لومړي ځل لپاره آذربایجان ته سفر کړی، چې موخه یې د دواړو هېوادونو د کارپوهانو ترمنځ د همکاریو پراختیا او د دواړو هېوادونو د اړیکو پیاوړتیا بلل شوې ده.

د آذربایجان د نړیوالو او څو‌کلتوري اړیکو د تحلیل مرکز د مدیره پلاوي رییس فرید شفی‌یوف د افغانستان د سټراټیژیکو مطالعاتو د مرکز له رییس عبدالحی قانت سره په ګډه غونډه کې ویلي، چې په دې ناسته کې به د دواړو هېوادونو پر اړیکو او د سیمې پر اوسني وضعیت خبرې وشي.

دغه غونډه د« د یوریشیا د لېږد او سوداګرۍ د ټرانسپورټي لارو سټراټیژیک پیوستون؛ سیمه‌ییز اتصال او دوامداره پراختیا» تر سرلیک لاندې د دواړو مرکزونو له‌خوا جوړه شوې وه.

شفی‌یوف د سیمې په ځانګړي بڼه د کسپین بحیرې د حوزې پېچلي جیوپولیټیک وضعیت ته په نغوته کې ویلي، چې آذربایجان تل د هېوادونو د ملي حاکمیت، خپلواکۍ او خپلواکې پرېکړې له حق ملاتړ کړی دی.

هغه د آذربایجان او افغانستان د اړیکو تاریخي ریښو ته نغوته کړی او وایي، چې د درېیمګړو هېوادونو له لیدلوریو څخه د خپلواک اقتصادي همکاریو پر پراختیا او د دوه‌اړخیزو اړیکو پر پیاوړتیا هم ټینګار کړی دی.

د آذربایجان د نړیوالو او څو‌کلتوري اړیکو د تحلیل مرکز رییس زیاته کړې، چې د دغه مرکز او د افغانستان د سټراټیژیکو مطالعاتو مرکز ترمنځ همکاري کولی شي په راتلونکي کې د پراخو پروژو د پلي کېدا، د کارپوهانو ترمنځ د اړیکو د پراختیا او د نظرونو د تبادلې زمینه برابره کړي.

Continue Reading
Advertisement

Trending

Copyright © 2026 Ariana News. All rights reserved!