د افغانستان اتلانو لیګ روشن د شپږم پړاو په پېنځه‌ویشتمه لوبه کې ابومسلم فراه لوبډلې خراسان فاریاب ته ۲-۰ ماتې ورکړه.

دا لوبه نن(شنبه) په کابل کې د افغانستان فوټبال فډراسیون په لوبغالي کې ترسره شوه.

د لوبې په لومړۍ نیمایي کې دواړو لوبډلو د سیالې لوبډلې د دروازې د پرانیستلو هڅې وکړې؛ خو له رامنځته شویو فرصتونو هیڅ یو هم پر ګول وهلو بریالی نه‌شو او دواړه لوبډلې له ګول پرته مساوي پایلې سره دمه‌ځای ته ولاړې.

د دوه‌یمې نیمایي له پیل یوازې دوه دقیقې وروسته ابومسلم فراه لومړی ګول وواهه او له سیالې لوبډلې مخکې شو.

وروسته علی‌رضا پناهي د ابومسلم فراه لپاره دوه‌یم ګول وواهه او خراسان فاریاب ته یې د دوه‌یم ګول اجازه ورکړه، چې په پایله کې لوبه د ابومسلم فراه پر بریا پای ته ورسېده.

په دې لوبه کې د ابومسلم فراه لوبغاړو ۱۳ فاولونه وکړل او دوه ژېړ کارتونه یې ترلاسه کړل. خراسان فاریاب هم اووه فاولونه وکړل او یو ژېړ کارت یې ترلاسه کړ.

د افغانستان اتلانو لیګ روشن د شپږم پړاو لوبې پر ژوندۍ او ځانګړې بڼه له آریانا ټلویزیون څخه خپرېږي.

د افغانستان اتلانو لیګ روشن د شپږم پړاو په څلیریشتمه لوبه کې عمر ځواک هرات لوبډلې طوفان هرات ته ۱- ۰ ماتې ورکړه.

دا لوبه نن( شنبه) د افغانستان فوټبال فډراسیون په لوبغالي کې ترسره شوه.

د لوبې په لومړۍ نیمایي کې دواړو لوبډلو د سیالې لوبډلې د دروازې د پرانیستلو لپاره ګڼې هڅې وکړې، خو رامنځته شوي فرصتونه پر ګول بدل نه‌شول.

د لوبې په دوه‌یمه نیمایي کې شاداب ملک‌زاده د لوبې پر شپږاتباومه دقیقه کې پر یوه ښکلي ګوزار د عمر ځواک هرات لپاره لومړی او یوازنی ګول وواهه.

په دې لوبه کې طوفان هرات اته فاولونه وکړل او دوه ژېړ کارتونه یې ترلاسه کړل. عمر ځواک هرات شپږ فاولونه وکړل، یو ژېړ او یو سور کارت یې هم ترلاسه کړ.

طوفان هرات به په خپله راتلونکې لوبه کې د سپټمبر پر نهه‌ویشتمه له عینو مېنه کندهار سره ولوبېږي او عمر ځواک هرات به د سپټمبر پر دېرشمه له ابومسلم فراه سره لوبه وکړي.

د افغانستان اتلانو لیګ روشن د شپږم پړاو لوبې پر ژوندۍ بڼه له آریانا ټلویزیون څخه خپرېږي.

د افغانستان ابدالیان کرکټ لوبډلې د آسیایي سیالۍ په لومړۍ لوبه کې د جاپان کوربه لوبډلې ته د ۴۸ منډو پر توپیر ماتې ورکړه.

په دې شل‌‌آوریزه لوبه کې، چې نن پنجشنبه ترسره شوه؛ افغانستان لومړی توپ‌وهنه وکړه او په ۲۰ آورونو کې یې د شپږ لوبغاړو پر له لاسه ورکولو ۱۲۹ منډې جوړې کړې.

د جاپان لوبډله د هدف په ترلاسه کولو کې د ۱۹.۳آورونو پر ۸۱ منډو وسوځېده او ونه‌توانېده، چې ټاکلی هدف پوره کړي.

د افغانستان له‌خوا عرب ګل څلور او ننګیال خروټي درې ویکټې واخیستې.

د لوبو بڼه

د نرینه‌وو کرکټ په سیالیو کې لس لوبډلې ګډون لري او لوبې د شل‌آوریزو سیالیو پر بڼه ترسره کیږي.

افغانستان، جاپان او نیپال په A ګروپ کې دي. په داسې حال کې، چې هانګ‌کانګ، چین، مالیزیا او عمان په B ګروپ کې لوبې کوي.

په ګروپي پړاو کې هره لوبډله له خپلې ډلې له نورو لوبډلو سره یوه لوبه کوي.

له هر ګروپ څخه دوه غوره لوبډلې د پای‌لوبو پړاو ته وځي او هلته له هند، پاکستان، بنګله‌دېش او سریلانکا سره یوځای کیږي؛ دغو څلور لوبډلو ته د پای‌لوبو پړاو ته مستقیمه لار ورکړ شوې ده.

د اتم‌پړاو پای‌لوبې سیالۍ د سپټمبر پر اته‌ویشتمه او نهه‌ویشتمه، نیمه‌پای‌لوبې د اوکټوبر پر لومړۍ او د برونزو او سرو زرو مډالونو سیالۍ د اوکټوبر پر درېیمه ترسره کیږي.

ټولې د نرینه‌وو د کرکټ لوبې د جاپان د آیچي ولایت په نیشین ښار کې د کورګي سپورټس پارک په لوبغالي کې ترسره کیږي.

افغانستان دغو لوبو ته د تېرو آسیایي لوبو د سپینو زرو مډال ګټونکي په توګه تللی دی. په تېرو لوبو کې هند د سرو زرو او بنګله‌دېش د برونزو مډال ګټلی و.

د افغانستان لوبډلمشري دروېش رسولي کوي او په لوبډله کې د کریم جنت او نجیب‌الله ځدراڼ ترڅنګ یو شمېر ځوان لوبغاړي هم لوبې کوي.

افغانستان به هڅه وکړي، چې د پنجشنبې ورځې له بریا وروسته د جمعې پر ورځ له نیپال سره هم بریا خپله کړي او د یوې‌څلورمې پای‌لوبې پړاو ته لار ومومي.