بی بی سی پښتو
افغانستان کې په کورونا ویروس اخته کسان نژدې ۱۰۰۰ ته ورسېدل
د افغانستان د روغتیا وزارت وايي، په تېرو ۲۴ ساعتونو کې د کورونا وېروس ۶۳ نوې مثبتې پېښې ثبت شوي دي چې له دې سره پردې وېروس د اخته کسانو ټولټال شمېر څه کم زرو (۹۹۶) ته ورسېد.
له دې ډلې په کابل کې ۳۱، بلخ کې ۱۶، کونړ کې ۶، هرات کې ۴ او بغلان کې ۳ پېښې ثبت شوي دي. د روغتیا وزارت ویاند وحیدالله مایار نن د یکشنبې په ورځ (د اپرېل ۱۹) په یوه خبري غونډه کې وویل چې په فاریاب، لغمان او جوزجان کې یوه یوه پېښه ثبت شوې ده.
د نوموړي په وینا په تېرو ۲۴ ساعتونو کې ۱۵ کسان بېرته روغ شوي چې ۱۳ په هرات کې او ۲ کابل کې دي.
د ښاغلي مایار په وینا د بېرته رغېدلو ۱۳۱ کسانو له ډلې ۷۱ په هرات کې او ۲۶ نور یې په کابل کې دي. د نوموړي په وینا له دې سره د بېرته روغو شویو کسانو سلنه له ۱۲ نه ۱۳ ته لوړه شوه.
د روغتیا وزارت وايي، له ټولو اخته کسانو تر اوسه ۳۳ تنو خپل ژوند بایللی چې درې تنه یې په تېرو ۲۴ ساعتونو کې مړه شوي دي.
پرون د افغانستان د روغتیا وزیر فیروزالدین فیروز په کابل کې د دارالامان ماڼۍ د کورونا وېروس د تجرید په مرکز بدله کړه، چې په وینا یې دا ماڼۍ ۲۰۰ بستریز مرکز دی او د هغو ناروغانو لپاره به کارول کېږي چې د کورونا وېروس کمې او یا منځنۍ نښې لري.
په ورته وخت کې د عامې روغتیا وزارت د کابل له ښاروالۍ هم مننه وکړه چې په دې ولایت کې ۱۰ زره بستره تجرید مرکز جوړوي.
عامې روغتیا وزارت پلان لري چې په ټول هېواد کې د دې مرکز په څېر نور هم جوړې کړي، چې د ده په ټکو که دا ناورین له کنټروله وځي، نو باید ورته چمتوالی نیول شوی وي.
افغان ولسمشر محمد اشرف غني هم د چارشنبې په ورځ ویلي و، له کورونا سره د مبارزې لپاره له پنجشنبې په ټول افغانستان کې د تجرید یا ګوښه توب مرکزونه جوړوي.
- د کورونا په اړه ځانګړې پاڼه
- کورونا وېروس؛ اروپا کې د میلیونونو وګړو پر تګ راتګ محدودیت لګېدلی
- کورونا وېروس ایټالیا کې په یوه ورځ کې ۳۶۸ کسان ووژل
- کورونا ويروس: څنګه ځان خوندي ساتلی شو
