امریکا د سولې په خبرو کې د ښځو پر معنا لرونکي ګډون ټینګار کوي ـ خلیلزاد

د افغانستان د سولې لپاره د امریکا ځانګړي استازي زلمي خلیلزاد د سې شنبې پر ورځ ویلي، چې د ولسمشر جو بایډن اداره به د سولې په خبرو کې د ښځو او اقلیتونو لپاره د معنا لرونکي ګډون لپاره پر ښکېلو لوریو فشار راوړي.

دا په داسې حال کې ده، چې بایډن د سپټمبر پر ۱۱ نېټه د امریکایي ځواکونو ایستلو ته چمتووالی نیسي او خلیلزاد د مشرانو جرګې د بهرنیو اړیکو کمېټې ته په چمتو شویو څرګندونو کې په ډاګه کوې، چې حکومت د مدني حقونو د ساتلو لپاره له ګاونډ هېوادونو او متحدینو سره ګډ کار کوي او پر طالبانو فشار راوړي، چې د کورنۍ جګړې پایلو ته پام راواړوي.

د افغانستان د سولې لپاره د امریکا ځانګړي استازي زلمي خلیلزاد دوه اوونۍ مخکې کابل ته د څلور ورځني سفر له غځولو وروسته څرګنده کړې وه، چې هغه د افغان ټولنې له یوې پراخې برخې سره کتلي او د سولې بهیر په اړه یې د دوی نظریات واورېدل.

خلیلزاد په خپل یوه ټویټ کې څرګنده کړې: مخکې له دې، چې زه کابل پریږدم؛ د ښځو د حقونو له یو شمېر استازیو او دیني عالمانو سره مې ولیدل؛ په جمهوري نظام کې مې د افغان میرمنو د مقام، کار، هڅو او چارو په اړه د دوی رښتیني نظرونه واورېدل.

خلیلزاد په ډاګه کړې: مونږ له بنسټیز نظره برخمن یو او غواړو، چې د سولې په تر سره کېدونکیو خبرو کې د ښځو غږ واوریدل شي او ټول اغېزمن خلک ( ښځې او نرینه ) او عالمان د یوې اغیزمنې او تلپاتې سولې په هڅولو کې برخه او ونډه واخلي.