امریکا له ترهګرۍ سره د مبارزې لپاره پر بېلابېلو پلانونو کار کوي

جنرال کنټ مکنزي د امریکايي ځواکونو د مرکزي قومندې لوی درستیز پرون ( سې شنبه د غويی۷ ) ویلي، چې هغه پر داسې پلانونو کار کوي، چې نه یوازې به د امریکا وړتیا خوندي کړي، بلکې د ترهګرو پر ځاله د افغلانستان له بدلېدو هم مخنیوی کوي.

جنرال ماکنزي زیاته کړې؛ دا پلانونه به له امریکا سره مرسته وکړي، چې خپلې وړتیاوې پیاوړې او په دې اړه له سیمه ییزو همکارانو سره پانګونه وکړي.

هغه زیاته کړې؛ په افغانستان کې د هغه تر قومندې لاندې له امریکایي او ناټو ځواکونو سره ګډ کار کوي، چې له افغانستان څخه همغږي او خوندي وتل ډاډمن کړي.

دغه امریکايي جنرال ویلي، چې امریکا به له افغان امنیتي او دفاعي ځواکونو سره خپلې مرستې روانې ساتي.

هغه وایي: دفاع وزارت کار کوي، چې څرنګه مونږ وکولی شو له شتون پرته یې اداره کړو. د امنیتی مرستو د اداره کولو لپاره مونږ په افغانستان کې د اوږدې مودې جګړې د پای ته رسولو لپاره له ډیپلوماټیکو هڅو ملاتړ کوو او له طالبانو هم غواړو، چې د دوحې تړون له مخې خپلې ژمنې پلې او له القاعده سره اړیکې پرې او د افغانستان له خاورې پر امریکا او متحدینو د بریدونو مخنیوی وکړي.

دا په داسې حال کې ده، چې یو شمېر امریکایي سناتورانو له افغانستان څخه د بهرنیو ځواکونو پر بیړه وتلو  اندېښنه څرګنده کړې ده.