د کډوالو او راستنېدونکیو چارو وزارت څرګنده کړی، چې په تېرو دوه ورځو کې ۳۲۵ افغان کډوال له ترکیې څخه جبري ویستل شول او بېرته افغانستان ته راستانه شوي دي.

د دغه وزارت د څرګندونو له مخې؛ دغه کډوال په استانبول کې مېشت ول او ځینو یې اسناد هم درلودل.

د مهاجرینو او راستنېدونکیو چارو وزارت مرستیال عبدالرحمن راشد په کابل هوايي ډګر کې د راستنېدونکیو کډوالو د ښه راغلاست پرمهال ویلي، چې دغه وزارت به د افغان مهاجرینو د ستونزو د حل لپاره د ترکیې له حکومت سره اړیکه ونیسي.

ویل کیږي، چې د مهاجرت نړیوالې ټولنې له هر راستانه شوي مهاجر سره ۱۵۰ یورو مرسته کړې ده.

د اسلامي امارت د صنایعو او سوداګرۍ وزارت ویاند په ایکس پاڼه کې لیکلي، چې د ۲۰۲۴ ز. کال په تېرو۱۰ میاشتو کې له هند سره د افغانستان سوداګري څه باندې ۶۵۰ میلیون ډالرو ته رسیدلې ده.

عبدالسلام جواد زیاته کړې: ۴۴۷ میلیون ډالر صادراتو او ۲۰۳ میلیون هغه وارداتو ته ځانګړې شوي دي.

هغه وایي؛ هند ته د افغانستان ټولیز صادراتي توکي وچ انځر، انجه، زعفران، مميز، شنه زیره او بادام دي او له هند څخه افغانستان ته بوره، صنعتي اومه توکي، نوې البسه او وریت شوي نخود راواردیيږي.

دغه احصائیه د افغانستان او هند ترمنځ مخ پر وده سوداګریزې اړیکې ښیي، چې د دواړو هېوادونو د اقتصاد له پیاوړتیا سره مرسته کولی شي.

دا په داسې حال کې ده، چې دوه ورځې مخکې د هند بهرنیو چارو وزارت مرستیال افغانستان ته د سفر پر مهال له یو شمېر دولتي چارواکو سره کتلي او د همکاریو پر پیاوړتیا یې ټینګار کړی دی. د هېواد د بهرنیو چارو وزارت چارسمبالي امیر خان متقي هم له دې هندي چارواکي غوښتي، چې افغان سوداګرو ته د ویزود ورکړې اسانتیاوو ته پاملرنه وکړي.

د پاکستان دفاع وزیر خواجه محمد اصف تېره ورځ په یوه مرکه کې ویلي، چې په کوټه کې ترهګري یوه نیابتي جګړه ده، چې هند د TTP او  BLA په څېر ډلو له لارې زمونږ پر وړاندې روانه کړې ده.

دا په پاکستان کې د چین د پرمختګ د هڅو د شنډولو لپاره یوه دسیسه ده.

خواجه اصف له جیو نیوز سره په مرکه کې ويلي، چې بلوڅ بیلتون پالي او ټي تي پي دواړه ډلې په افغانستان کې پټنځایونه لري او له هغه ځايه خپل بریدونه پلانوي.

نوموړي پر هندوستان د تور پورې کولو پر مهال ویلي، چې د دغو دواړو وسل‌والو ډلو مالي ملاتړ کوي او په افغانستان کې دوی ته د پاکستان د ناامنه کولو لپاره اسانتیاوې برابروي.

اسلامي امارت او هندي چارواکو په دې اړه رسمي غبرګونونه ندي ښودلي؛ خو له دې مخکې د پاکستان دا ډول ادعاوې بې بنسټه یادې شوې دي.

بلوڅ بیلتون پالو د بلوچستان په کويټه ښار کې د رېل په یوه تمځای کې د تیرې ورځې د ځانمرګې برید مسوولیت پر غاړه اخیستی، چې له کبله یې د ۱۹ پاکستانيو پوځيان په ګډون ۲۶ کسان ووژل شول او لږ تر لږه ۵۰ نور ټپیان دي.