د ارجنټاین فوټبال ملي لوبډلې د لوبې په وروستیو شېبو کې د دوه ګولونو پر وهلو انګلستان ته ۲ ـ ۱ ماتې ورکړه او د فوټبال نړیوال جام پایلوبې ته یې لار وموندله.

انګلستان د دوه‌یمې نیمایي په پیل کې د انټوني ګورډون پر ګول مخکې شو او داسې ښکارېده، چې له ۱۹۶۶ کال وروسته به د لومړي ځل لپاره د نړیوال جام پایلوبې ته لار ومومي؛ خو د اوسني اتل ارجنټاین لوبډلې په وروستیو دقیقو کې د لوبې حالت بدل کړ.

انزو فرنانډز په پېنځه‌اتیاومه دقیقه کې مساوي ګول وواهه او بدیل لوبغاړي لائوټارو مارټینز د اضافي وخت په دوه‌یمه دقیقه کې د لیونل مسي پر پاس د سر پر ضربه د بریا ګول وواهه.

ارجنټاین به د یکشنبې پر ورځ د نړیوال جام په پایلوبه کې د اروپا اتلې اسپانیا پر وړاندې لوبه وکړي. دغه لوبه به د نیوجرسي په «میټ‌لایف» لوبغالي کې ترسره شي. انګلستان به بیا د درېیم مقام د ګټلو لپاره د شنبې پر ورځ له فرانسې سره مخ شي.

د لوبې لومړۍ نیمایي په نږدې سیالۍ کې تېره شوه او دواړو لوبډلو ډېر خطرناک فرصتونه جوړ نه‌کړل؛ خو د دوه‌یمې نیمایي له پیل ۱۰ دقیقې وروسته انګلستان د هري کین په جوړ شوي برید کې د مورګن راجرز د پاس له لارې د انټوني ګورډون پر ګول مخکې شو.

له ګول وروسته ارجنټاین پرله‌پسې بریدونه وکړل؛ خو د انګلستان ګول ساتونکي جورډن پیکفورډ څو ځله ښه دفاع وکړه. نیکو ګونزالس یو ښه فرصت له لاسه ورکړ او د الکسیس مک‌الیسټر توپ د ګول له ستنې سره ولګېد.

بالاخره ارجنټاین په پېنخه‌ایاومه دقیقه کې د مسي د پاس پر مرسته د انزو فرنانډز له ډاډمنې هڅې سره مساوي ګول وواهه. وروسته هم ارجنټاین بریدونو ته دوام ورکړ او مک‌الیسټر یو ځل بیا توپ د ګول له ستنې سره ولګاوه.

وروسته مسي بېرته راغلی توپ ترلاسه کړ او په دقیق پاس یې لائوتارو مارټینز ته موقع برابره کړه، چې نوموړي د اضافي وخت په دوه‌یمه دقیقه کې د سر پر ضربه د بریا ګول وواهه.

ارجنټاین اوس د خپلې اتلولۍ د دفاع لپاره پایلوبې ته چمتو کېږي. په داسې حال کې، چې انګلستان یو ځل بیا د یوې سترې سیالۍ په وروستیو پړاوونو کې د مخکېوالي له لاسه ورکولو له کبله له پایلوبې پاتې شو.

اسپانیا او فرانسه به د سې‌شنبې پر ورځ د ۲۰۲۶ز کال فوټبال نړیوال جام پایلوبې ته د رسېدا لپاره سره ولوبېږي.

د اروپا دغو دوه پیاوړو لوبډلې په روان نړیوال جام کې د پام وړ ځلېدلي او اوس له پایلوبې یوازې یوه بریا لرې دي.

اسپانیا د خپلې یرغلیزې لوبې او پر توپ د واکمنۍ پر مټ نیمه‌پایلوبې ته رسېدلې ده. دې لوبډلې په ربع‌پایلوبه کې بلجیم ۲ – ۱ مات کړ او له هغې مخکې یې په نیمه‌پایلوبه کې پرتګال ته ۱ – ۰ ماتې ورکړې وه.

فرانسې هم یو ځل بیا ثابته کړه، چې د نړۍ له پیاوړو لوبډلو څخه ده. دې لوبډلې په ربع‌پایلوبه کې مراکش ۲ – ۰ او له هغه مخکې په نیمه‌پایلوبه کې پاراګوای ۱ -۰ مات کړي دي.

تمه ده، چې اسپانیا پر توپ له ډېرې واکمني برخمنه وي او یرغلونه پر حوصله ترسره کړي. دغه راز فرانسه به هم هڅه وکړي، چې پر چټکو ځوابي هڅو د خپلې بریدګرې کرښې له وړتیا ګټه واخلي.

اسپانیا د ۲۰۱۰ز.کال له اتلولۍ وروسته د نړیوال جام د دوه‌یمې اتلولۍ په لټه کې ده. په داسې حال کې، چې فرانسه غواړي د ۱۹۹۸ او ۲۰۱۸ کلونو له اتلولیو وروسته درېیم جام هم خپل کړي.

د دې لوبې ګټونکې لوبډله به په پایلوبه کې د انګلستان او ارجنټاین د دوه‌یمې نیمه‌پایلوبې له بریالۍ لوبډلې سره مخامخ شي.

په افغانستان کې د فوټبال مینه‌وال کولی شي د ۲۰۲۶ نړیوال جام ټولې سیالۍ پر ژوندۍ بڼه له آریانا ټلویزیون وګوري او د سیالیو د مهالوېش د پیل وختونو او نورو تازه معلوماتو لپاره هم د آریانا او آریانا نیوز ټولنیزې پاڼې وڅاري.

فرانسې او مراکش د ۲۰۲۶ز.کال د فوټبال نړیوال جام لومړنۍ لوبډلې شوې، چې د سیالیو اته غوره پړاو یا منځلوبو ته یې لار وموندله.

مراکش د دغو سیالیو په یوه ځلېدونکې لوبه کې کاناډا ته ۳ ـ ۰ ماتې ورکړه. فرانسې هم د کیلیان امباپه پر یوازني ګول پاراګوای ته د فیلادلفیا په ښار کې ۱ ـ ۰ ماتې ورکړه.

ټاکل شوې، چې فرانسه او مراکش د راتلونکې جمعې پر ورځ د ماساچوسټس ایالت د فاکسبورو د ښار د منځلوبې په لومړۍ لوبه کې سره مخامخ شي.

دا سیالۍ نن شپه د برازیل او ناروې له لوبې سره د نیوجرسي په ښار کې دوام کوي. ورپسې به د دوشنبې پر سهار انګلستان د یو اتم پړاو په یوه مهمه لوبه کې د مکسیکو ښار په لوبغالي کې د کوربه مکسیکو پر وړاندې ولوبېږي.

همداراز د دوشنبې پر ورځ پرتګال او اسپانیه د ارلینګټن په ښار کې یو ځل بیا سره مخامخ کېږي، چې د اروپا د فوټبال یوه پخوانۍ سیالي بیا تازه کړي.

د یو اتم پړاو درې وروستۍ لوبې به د سې‌شنبې پر ورځ ترسره شي. امریکا به په سیاټل کې له بلجیم سره، ارجنټاین به په اټلانټا کې له مصر سره او سویس به په ونکوور کې له کولمبیا سره ولوبېږي.

د اته غوره پړاو سیالۍ د جمعې پر ورځ پیلېږي او تر اوسه یوازې د فرانسې او مراکش ترمنځ لوبه رسمي شوې ده.

د برازیل او ناروې د لوبې ګټونکی به د مکسیکو او انګلستان د لوبې له ګټونکي سره مخامخ شي.

همدارنګه د پرتګال او اسپانیې د لوبې بریالي به د امریکا او بلجیم د لوبې له ګټونکي سره ولوبېږي.

د لښتیلیک یا جدول په بل لوري کې به د ارجنټاین او مصر د لوبې ګټونکي د سویس او کولمبیا د لوبې له بریالۍ لوبډلې سره د نیمه پایلوبې د پړاو د ځای خپلولو لپاره سیالي وکړي.