بی بی سی پښتو
ایران سیند ته د کډوالو اچولو په هکله د افغانستان سندونه ونه منل
د افغانستان د بهرنیو چارو وزارت وايي، د ایران کمېشنرۍ د ایراني پوله ساتو په لاس سیند ته د افغان کډوالو اچولو په هکله د افغانستان شواهد او سندونه ونه منل.
د افغانستان او ایران سرحدي کمېشنرۍ په ګډه د ۱۳۳۵ لمریز کال د تړون له مخې د دې پېښې پلټنې کوي.
د افغانستان د بهرنیو چارو وزارت ویاند ګران هېواد زیاتوي، که څه هم دواړو لورو مناسبه فضا کې ناسته درلوده، خو دې وضعیت ته په پام د دواړو هېوادونو د تړون د مادو له مخې دا څېړنه ډیپلوماټیکو لورو ته سپارل کېږي.
* ایران سیند ته د افغان کډوالو اچول بیا سخت درواغ وبلل
* ایران پر ګډه پوله د افغانستان ډېر کنټرول غواړي
ښاغلی هېواد وایي، افغان کمېشنرانو د تړون له مخې خپل سندونه ډيپلوماټیکو مراجعو ته سپارلي دي.
د څو افغان چارواکو او عیني شاهدانو د ادعا له مخې، ایراني پوله ساتو نږدې درې اونۍ وړاندې لسګونه افغانان اول شکنجه او بیا مجبور کړل چې افغانستان ته د ستنېدو لپاره پر سیند واوړي.
د ایران د بهرنیو چارو وزارت دا پېښه رد کړې او ویلي یې دي: په ټاکلي تاریخ او د پېښې د ادعا سیمه کې دا ډول پېښه نه ده شوې او نه هم له افغان وګړو سره د اسلامي جمهوریت د ځواکونو کوم ټکر رپوټ شوی دی.
خو وروسته ایران وویل چې دې برخه کې د څېړنو لپاره همکارۍ ته تیار دی او ورپسې د دواړو هېوادونو د پلاوو په ګډه پلټنه هوکړه وشوه، چې تېره پنجشنبه یې په ایران کې لومړنۍ غونډه درلوده.
د دې پېښې لپاره د افغانستان د حقیقت موندونکي پلاوي مشر ویلي، لومړنۍ موندنې یې ښيي چې دې پېښه کې ۱۲ کسان وژل شوي، ۱۷ ورک شوي او ۱۷ نور هم ژغورل شوي دي.
