د افغانستان بانک او د افغانستان نړیوال اعتباري بنسټ ترمنځ په کابل کې د همکارۍ هوکړه‌لیک لاسلیک شو، چې موخه یې د کوچنیو او منځنیو کاروبارونو پیاوړتیا او مالي سرچینو ته د لاسرسي پراخول دي.

د افغانستان بانک لومړي مرستیال صدیق‌الله خالد ویلي، د دغه ډول هوکړه‌لیکونو له لارې هېوادوالو ته د مناسبو او بېلابېلو اسلامي مالي خدمتونو د وړاندې کولو زمینه برابره او مالي سرچینو ته د کاروبارونو د لاسرسي فرصتونه پراخېږي.

هغه زیاته کړې، په لومړي پړاو کې به بانکونو او مالي بنسټونو ته تخنیکي او مسلکي ملاتړ برابر شي. همدارنګه د افغانستان نړیوال اعتباري بنسټ له‌خوا پېنځه بانکونو او یوه کوچني تمویلوونکي بنسټ ته د شاوخوا یو میلیون امریکايي ډالرو پر ارزښت بلاعوضه مرستې ورکول کېږي، چې د کوچنیو او منځنیو کاروبارونو د تمویل په برخه کې به ترې کار واخیستل شي.

خالد ویلي، په راتلونکو پړاوونو کې به وړ بانکونه او تمویلوونکي بنسټونه هم له دغو مرستو او آسانتیاوو برخمن شي.

د نوموړي د څرګندونو له مخې، راستنېدونکو هېوادوالو ته به هم د کوچنیو کاروبارونو د جوړولو او مالي سرچینو ته د لاسرسي په برخه کې پاملرنه وشي.

د افغانستان بانک لومړي مرستیال ویلي؛ د هېواد بانکدارۍ او مالي سکټور په وروستیو کلونو کې د پام وړ وده کړې او دغه بانک هڅه کوي هېوادوالو ته د تمویل مناسب فرصتونه برابر کړي، چې د اقتصادي فعالیتونو د پراختیا او د ډېرو کاري فرصتونو د رامنځته کېدا زمینه برابره شي.

د دغه هوکړه‌لیک له مخې؛ دواړه لوري به د مالي سکټور د پیاوړتیا، کوچنیو، وړو، منځنیو او لویو کاروبارونو لپاره مالي سرچینو ته د لاسرسي د پراختیا، د اسلامي مالي خدمتونو د پراختیا او د مالي بنسټونو د ظرفیت لوړولو په برخو کې همکاري کوي.

همدارنګه مالي بنسټونو ته به تخنیکي او مسلکي ملاتړ، روزنیز پروګرامونه او د ظرفیت لوړولو فرصتونه برابر شي.

په هوکړه‌لیک کې د مالي سکټور د روڼتیا، حساب‌ورکولو او سالمې ادارې پر پیاوړتیا او د اسلامي مالي محصولاتو پر بنسټ د تضمیني میکانیزمونو د اغېزمنتیا پر زیاتولو هم ټینګار شوی دی.

د افغانستان نړیوال اعتباري بنسټ د مدیره پلاوي مشر راجر ټوماس پیلټر هم په دې غونډه کې د هوکړه‌لیک له لاسلیک څخه هرکلی کړی او د دغه بنسټ او د افغانستان بانک ترمنځ یې د همکاریو پر دوام او پراختیا ټینګار کړی دی.

د دغه هوکړه‌لیک د لاسلیک موخه د افغانستان د مالي سکټور د پیاوړتیا، اسلامي مالي خدمتونو ته د لاسرسي د پراختیا او کوچنیو، وړو او منځنیو کاروبارونو لپاره د مالي سرچینو د برابرولو لپاره د دواړو لوریو ترمنځ د منظمې همکارۍ د چوکاټ رامنځته کول بلل شوي دي.

د آلمان د بېلابېلو ایالتونو چارواکو د ۴۸۸ افغانانو د ایستلو چارې د دغه هېواد فډرالي پولیسو ته سپارلې دي. په دې کسانو کې ۲۶۷ کسان هیڅ ډول جزايي محکومیت نه‌لري.

د دې کسانو شمېر د آلمان د حکومت په لیکلي ځواب کې د دغه هېواد د پارلمان د چپ ګوند د استازې کلارا بونګر د پوښتنې په ځواب کې خپور شوې دی. دا معلومات له هغو غوښتنو سره تړاو لري، چې د ۲۰۲۶ز.کال د جولای له اتمې څخه د سپټمبر تر اته‌لسمې پورې فډرالي پولیسو ته سپارل شوي دي.

د اړوند معلوماتو له مخې: د برېمن او مکلنبورګ-فورپومرن له ایالتونو پرته د آلمان ټولو ایالتونو د افغانانو هغه دوسیې، چې افغانستان ته د ستنولو لپاره دي؛ فدرالي پولیسو ته سپارلې دي.

همداراز اووه افغانان له ایستلو مخکې په بند کې ساتل کېږي او یو بل افغان آلمان ته د ننوتلو د مخنیوي له بهیر سره تړلي بند کې دی.

دا بدلونونه په داسې حال کې راپورته کیږي، چې د آلمان حکومت د افغان وګړو د بېرته ستنولو تګلاره پراخوي.

د آلمان کورنیو چارو وزیر الکسانډر ډوبرینډټ له دې مخکې ویلي وه؛ د افغانانو ایستل به یوازې پر هغو کسانو محدود نه‌وي، چې جزايي محکومیت لري یا امنیتي ګواښ بلل کېږي.

په آلمان کې د اوسني ائتلافي حکومت له جوړېدا راپدېخوا شاوخوا ۲۵۰ افغانان افغانستان ته ستانه کړ شوي دي؛ خو وروستي راپورونه ښيي، چې تر اوسه د ایستلو په الوتنو کې ډېری هغه کسان شمېرل شوي، چې جرمي سابقه یې لرله. په سپټمبر کې هم ۱۳ افغانان کابل ته ستانه شول، چې ټولو یې جرمي سابقه لرله.

د دې تګلارې پراخېدا د یو شمېر مخالفو سیاستوالو او د پناه‌غوښتونکو د حقونو د دفاع بنسټونو غبرګونونه هم راپارولي دي.

منتقدانو له جزايي محکومیت پرته د کسانو د بېرته ستنولو په اړه اندېښنه څرګنده کړې ده.

د ۴۸۸ کسانو دوسیې فډرالي پولیسو ته سپارل په دې معنا نه‌دي، چې ټول به یې حتمي له آلمان وایستل شي؛ بلکې دا شمېر د هغو کسانو ښودنه کوي، چې ایالتونو یې دوسیې د ایستلو د بهیر د تعقیب لپاره فډرالي پولیسو ته سپارلې دي.

د افغانستان دفاع وزارت ويلي، افغان امنیتي او دفاعي ځواکونو د نورستان ولایت په کامدېش ولسوالۍ کې د هغو وسلوالو ډلو پر وړاندې عملیات کړي، چې دغه وزارت یې «دښمن عناصر» بولي.

د دفاع وزارت په خپره شوې خبرپاڼه کې راغللي: پرون د نورستان ولایت د کامدېش ولسوالۍ په اړوند سیمو کې د «داعشي فتنه‌ګرو» او د وسلوالو عناصرو څو وسلوالې ډلې د پاکستاني ملیشو پر ملاتړ او هڅونه؛ د ډیورنډ کرښې له هغې غاړې د افغانستان خاورې ته رالېږل شوې وې، چې «شرارت» جوړ او ناامني رامنځته کړي.

د خبرپاڼې له مخې؛ افغان ځواکونو د دغو ډلو د خوځښتونو له پېژندلو وروسته عملیات پیل کړل، چې په پایله کې یې ۲۸ وسلوال ووژل شول او ۳۲ نور ونیول شول.

دفاع وزارت زیاته کړې، چې یو شمېر پاتې وسلوال له نښتې پرته د ډیورنډ فرضي کرښې هغې غاړې ته تښتېدلي دي.

دغه وزارت څرګنده کړې، چې په دغو کسانو کې پاکستاني وسله‌وال، د وسله‌والو ډلو پخواني غړي او داعشیان هم ول؛ خو د نښتې له پیل وروسته یې له جګړې شاتګ کړی دی.

د افغانستان دفاع وزارت زیاته کړې؛ په دې پېښه کې یو شمېر ښکېل کسان د افغانستان د تېر نظام د امنیتي ځواکونو پخواني غړي وه.

د دغه وزارت د څرګندونو له مخې؛ هغوی له پاکستان څخه د پناه ورکولو او کاري فرصتونو ژمنې ترلاسه کړې وې، خو روزنیزو مرکزونو ته له لېږدولو پوځي روزنې وروسته نورستان ته واستول شول.

دغه راز دفاع وزارت پاکستان په افغانستان کې د ناامنۍ د رامنځته کولو لپاره د هڅو پر ملاتړ تورن کړی او څرګندوي، چې افغان امنیتي او دفاعي ځواکونه به د هېواد او خلکو د ژغورنې د هر ډول ګواښ پر وړاندې ودرېږي.

دغه وزارت له هغو افغان ځوانانو او پخوانیو سرتېرو، چې د پاکستان د وسله‌والو ډلو او استخباراتي کړیو په لومو کې لوېدلي؛ غوښتي، چې« له دغو ډلو سره له همکارۍ ډډه وکړي او له بدو پایلو سره له مخ کېدا مخکې ځانونه امنیتي ځواکونو ته وسپاري.»