په مسکو کې د افغانستان اسلامي امارت سفیر ګل‌حسن حسن د« شمالي قفقاز؛ د خبرو، دودونو او پراختیا لپاره فضا» نومې نړیواله غونډه کې ګډون او وینا وکړه.

په مسکو کې د افغانستان سفارت د څرګندونو له مخې؛ نوموړي په خپله وینا کې د متقابل درناوي، خبرو اترو، اقتصادي همکاریو او د افغانستان او سیمې د هېوادونو ترمنځ د ګډې پراختیا پر اړتیا ټینګار وکړ.

د افغانستان سفیر د غونډې په څنډه کې د روسیې د ستاوراپول سیمې د اقتصادي پراختیا له وزیر انتون بوریسویچ دورونین سره هم وکتل.

دواړو لوریو د سوداګرۍ، پانګونې او اقتصادي همکاریو پر پراختیا خبرې وکړې.

ګل‌حسن حسن له یو شمېر افغان سوداګرو او په روسیه کې د افغان ټولنې له استازو سره هم وکتل او د هغوی ستونزې او وړاندیزونه یې واورېدل.

د افغانستان سفیر ډاډ څرګند کړ، چې د اسلامي امارت سفارت به د افغان وګړو د ستونزو د حل او د هغوی د ملاتړ لپاره اړینې همکارۍ وکړي.