Connect with us

تازه خبرونه

تولیدي شرکتونه دې خپل محصولات معیاري کړي – ملا عبدالغني برادر

خپور شوی

د

(Last Updated On: تله ۲۶, ۱۴۰۱)

د ریاست الوزراء اقتصادي مرستیال ویلي؛ د افغانستان اسلامي امارت د یو مسوول حکومت په توګه له ټولو صنعتکارانو او تجارانو څخه په کلکه ملاتړ کوي او هیله من دی، چې خپل فعالیتونه او خدمتونه پر معیارونو برابر کړي.

د ریاست الوزراء اقتصادي مرستیال ملا عبدالغني برادر نن (سې شنبه د تلې ۲۶) د نورم او ستندرد ادارې په اقتصادي غونډه کې د ملي اقتصاد د ودې لپاره د افغانستان د اوسپنې د استخراج له سکتور څخه د ملاتړ او هڅونې تر عنوان لاندې په جوړه شوې غونډه کې وویل، چې صنعتکاران د ملي اقتصاد په پیاوړتیا کې مهم رول لوبوي. له همدې کبله اسلامي امارت د کورنیو تولیدي شرکتونو د اړتیا وړ توکو د برابرولو لپاره د زاړو او داغمه اوسپنو صادرات او قاچاق بند کړي دي.

د ریاست الوزراء اقتصادي مرستیال ملا عبدالغني برادر وایي: زه د یو مسوول په صفت پر صنعتکارانو او تجارانو غږ کوم، چې خپل تولیدات د معیارونو مطابق برابر کړي؛ ځکه اسلامي امارت که د هېواد او هېوادوالو د سوکالۍ لپاره صنعت ته ترجیح ورکوي،خو کیفیت او معیار بیا ورته تر ټولو لومړیتوب لري.

ملا برادر وايي؛ اسلامي امارت هڅه کوي، چې صنعتکارانو ته د برښنا د برابرولو تر څنګ د مالي امنیت په تأمین کې هم ډېرې هڅې وکړي.

عبدالغني برادر زیاته کړې، چې له هېواد څخه د زړو اوسپنو د ایستل کېدو د مخنیوی هدف دا و، چې  د کورنيو  تولیدوونکيو د خامو موادو اړتیا پوره شي  او د خپلو کورنیو تولیداتو ملاتړ وشي.

نوموړی وایي: د افغانستان اسلامي امارت په پام کې لري، چې د رڼو او شفافو پروسو له لارې د اوسپنې کانونه داوطلبۍ ته وړاندې کړي، چې په راتلونکي کې زمونږ د اوسپنې ویلې کوونکې کارخونې د خامو موادو له کمښت سره مخ نشي. 

د افغانستان د نورم اوستندرد ادارې او د ښارجوړوني  وزارت هم د هېواد د اوسپنې ویلې کولو د کارخونو له  مسوولینو غوښتي، چې د خپلو تولیداتو په ستندرد کولو کې پوره هڅه وکړي او خپل ولس ته  باکیفیته تولیدات وړاندې کړي.

د ښار جوړونې وزیر مولوي حمدالله نعماني وایي: اړینه ده، چې په هېواد کې د ټولو اقتصادي فعالیتونو د ستندرد کیدو لپاره کار وشي. زه خوښ یم، چې د ستندرد ادارې له فعالیتونو سره مونږ د ستندر کیدو پر لوري حرکت پیل کړ.

د نورم او ستندرد ادارې رییس ملا فیض الله تمیم وایي: مونږ په ټوله معنا د هغه صنعتکارانو او سوداګرو ملاتړ کوو، چې په کارونو او فعالیتونو کې ستندردونه په نظر کې ونیسي او مونږه جدي یو، چې ستندر دونه په ټولوبرخو کې پیل کړو.

د افغانستان د اوسپنې د ویلې کولو ټولني غړي هم  وايي، چې اسلامي امارت ور سره همکاري کړې او زیاتوي، چې په دې سکتور کې ۵۰ فابریکې فعالیت کوي چې ۵۰۰ میلیون ډالر پانګونه پرې شوې او نږدې ۲۰ هېوادوال په کې کار کوي.

د اوسپنې ویلې کولو ټولنې رییس عصمت الله وردګ وایي: د افغانستان اسلامي امارت دې له مونږ سره همکاري وکړي، چې د اوسپنې قاچاق مخه ونیول شي، اړوند ستونزې راته حل کړي.

د هېواد اقتصادي مرستیال برادر وايي؛ د هېواد د اقتصادي  پیاوړتیا لپاره اړینه ده، چې له کورنيو تولیداتو ملاتړ وشي. د نړۍ  د پرمختللیو هېوادونو اقتصادي وده له صنعتي فعالیتونو پيل شوې ده.

هغه هیله څرګندوي، چې افغانستان به هم د صنعتي  کیدو بهیر په بریالیتوب سره تر سره کړي او په  راتلونکي کې به یو پياوړی اقتصاد ولري.

تازه خبرونه

د داعش خراسانی مشر د پاکستان په بلوچستان کې دی – رویټرز

Published

on

(Last Updated On: وری ۹, ۱۴۰۳)

رویټرز خبري اژانس راپور ورکړی، چې د داعش د خراسان څانګې مشر د پاکستان په بلوچستان ایالت کې ژوند کوي.

د دغه خبري آژانس د راپور له مخې: ۲۹ کلن ثناالله غفاري، چې شهاب المهاجر هم یاد شوی؛ دا ډله یې د داعش پر تر ټولو وېرونکې څانګې بدله کړې ده.

رویټرز دا هم څرګنده کړې، چې ثناالله غفاري په ۲۰۲۰ ز. کال کې د داعش خراسان څانګې مشري پر غاړه واخیسته او د ده د مشرۍ پر مهال دغې ډلې سخت بریدونه وکړل او یو شمېر کسان یې ځان ته جلب هم کړل.

رویټرز زیاته کړې، چې د غفاري په اړه د ۲۰۲۱ کال د کابل پر هوايي ډګر د داعش له وژونکي برید مخکې، چې ۱۷۰ افغان ملکي وګړي او ۱۳ امریکايي پوځیان ووژل شول؛ ډېر لږ معلومات خپاره شوي وه.

د داعش د خراسان څانګې بحث وروسته له هغې ګرم شو، چې د تېرې جمعې ورځ مسکو ته نږدې د کنسرت په یوه تالار کې خونړۍ ډزې وشوې او لږ تر لږه ۱۳۹ کسان په کې ووژل شول.

له دې مخکې پاکستانيو چارواکو اعلان کړی و، چې غفاري د تېر کال په جون میاشت کې د افغانستان په کونړ ولایت کې وژل شوی؛ خو اوس رویټرز خبر ورکوي، چې نوموړی پاکستان ته تښتېدلی او د بلوچستان په ایالت کې اوسېږي.

د افغانستان کورنیو چارو وزارت ویاند عبدالمتین قانع وايي، داعش له څه باندې دوه کلونو راپدیخوا په افغانستان کې ځپل شوی او خپلې عملیاتي وړتیاوې یې له لاسه ورکړي او ګواښ پېښولی نشي.

ویل کیږي، چې داعش په افغانستان کې وروستی برید د کندهار ولایت د کابل بانک پر دفتر وکړ، چې ۳ کسان یې ووژل او ۱۲ نور ټپیان دي.

Continue Reading

تازه خبرونه

د رښتر پر کچه ۵ اعشاریه ۲ درجې زلزلې افغانستان ولړزاوه

Published

on

(Last Updated On: وری ۹, ۱۴۰۳)

د هند د زلزلې ملي مرکز څرګنده کړې، چې نن (پنجشنبه د وري نهمه) له غرمې وروسته د رښتر پر کچه ۵.۲ درجې زلزلې افغانستان ولړزاوه.

دا زلزله د ځمکې په ۷۰ کیلومټره ژوروالي کې رامنځته شوې او مرکز یې د بدخشان ولایت د اشکاشم ولسوالۍ شمال ختیځه غرنۍ سیمه ده.

دغه زلزله پر افغانستان سربېره په تاجکستان، ازبکستان او قرغزستان کې هم احساس شوې ده.

تر اوسه د دې پېښې د ځاني او مالي زیان په اړه څه ندي ویل شوي.

تېر اکټوبر په هرات ولايت کې د رښتر پر کچه شپږ اعشاريه څلور درجې زلزلې له دوه زره زيات کسان مړه او ډېر کلي ویجاړ کړل.

Continue Reading

تازه خبرونه

د بیات بنیاد د روژې مرسته د بلخ ولایت اړمنو ته ورسېده

Published

on

(Last Updated On: وری ۹, ۱۴۰۳)

بیات بنیاد د روژې د مرستو په لړ کې د بلخ ولایت لسګونه اړمنو کورنیو ته خوراکي توکي ووېشل.

د بیات بنیاد د روژې د مرستو په لړ کې دا ځل د بلخ ولایت لسګونه اړمنې کورنۍ تر پوښښ لاندې راغلې. په بلخ ولایت کې د بیات بنیاد استازی یافث ثاقب وایي؛ په دې مرسته کې اوړه، غوړي او وريجې شته، چې پر اړمنو کسانو وېشل شوې دي.

نوموړي زیاته کړې؛ د هېواد په بېلابېلو سیمو کې د بیات بنیاد د روژې د مرستو لړۍ روانه ده.

هغو کورنیو، چې دغه مرستې ترلاسه کړې د دې بنسټ له مرستو خوښ دي او له نورو مرستندویه بنسټونو هم غواړي، چې له اړو کسانو سره مرستې وکړي.

بیات بنیاد یو له هغو خیریه بنسټونو څخه دی، چې په تېرو ۲۰ کلونو کې یې پر اړمنو کورنیو د مرستو د وېش ترڅنګ یې د هېواد په بېلابېلو برخو کې رغنیزې پروژې هم پلې کړې دي.

Continue Reading

Trending

Copyright © 2022 Ariana News. All rights reserved!