تازه خبرونه
جوبایډن اشرف غني ته د روانو مرستو ډاډ څرګند کړ
(Last Updated On: زمری ۲, ۱۴۰۰)
ولسمشرۍ ماڼۍ ویلي، چې ولسمشر اشرف غني پرون د زمري پر لومړۍ ماښام مهال د امریکا له ولسمشر جوبایډن سره د دواړو هېوادونو پر اړیکو خبرې کړې دي.
د ولسمشرۍ د څرګندونو له مخې؛ جو بایډن د افغانستان له امنیتي ځواکونو څخه د خپل هېواد د ملاتړ ډاډ څرګند کړی دی.
سرچینې په دې اړه څرګنده کړې: نوموړي یوځل بیا ولسمشر غني ته د افغانستان له امنیتي او دفاعي ځواکونو څخه د خپل هېواد د روان ملاتړ په اړه ډاډ ورکړ او یادونه کوي، چې دوی افغانستان ژغوري او ترې ساتنه کوي.
ارګ زیاته کړې، چې دواړو لوریو د روان ګډون پر ټینګښت او اقتصادي مرستو ټینګار وکړ.
ویل کیږي، چې غني او بایډن د سولې او امنیت لپاره د افغانانو پر ګډ کار او د تېرو دوه لسیزو د لاسته راوړنو پر خوندي کولو ټینګار کړی دی.