د افغانستان کرکټ ملي لوبډلې د زیمبابوې پر وړاندې د لومړۍ ټسټ لوبې د درېیمې ورځې په پای کې د ‌۱۲۵‌آورونو پر لوبولو او د اووه لوبغاړو سوځېدا ۴۰۲ منډې جوړې کړې او له سیالې لوبډلې څخه د ۱۰۲ منډو پر توپیر شاته پاتې شوه.

دا لوبه هم په شارجه کرکټ لوبغالي کې تر سره شوه او د زیمبابوې ملي لوبډلې د لومړۍ پاڼۍ پر مهال د ۱۳۴.۳‌آورونو پر لوبولو او د ټولو لوبغاړو پر سوځېدا ۵۰۴ منډې جوړې کړې وې.

د افغانستان لوبډله د لوبې پر درېیمه ورځ د توپ‌وهنې په برخه کې نسبتاً ښه ولوبېده او د ۴۰۲ منډو پر جوړولو یې له زیمبابوې سره د منډو توپیر راکم کړ. او درې لوبغاړو یې لوبه روانه وساتله.

دا لوبه به پر څلورمه ورځ هم روانه وي او افغانستان به هڅه وکړي، چې له پاتې درې لوبغاړو څخه پر ګټه اخیستنه خپله لومړۍ پاڼۍ پر غوره پایلې پای ته ورسوي.

#آریانانیوز #افغانستان #کرکټ #ټسټ‌لوبې #افغانستان‌اوزیمبابوې #شارجه #سپورټي‌خبرونه

آریانا راډیو ټلویزیون(ATN)  او د افغانستان فوټبال فډراسیون د دوشنبې پر ورځ په کابل کې د افغانستان فوټسال غوره لیګ د پنځم او شپږم پړاو سیالیو د جوړولو، تولید او خپرولو تړون لاسلیک کړ.

ټاکل شوې، چې د دغو سیالیو د پنځم پړاو لومړۍ برخه د لیندۍ پر شپاړلسمه / د ډسمبر پر اوومه پیل او د مرغومې تر نهمې / د ډسمبر تر یودېرشمې دوام وکړي. د سیالیو دوه‌یمه برخه به د ۲۰۲۷ز.کال د جنورۍ پر لسمه پیل او د فبرورۍ تر شپږمې روانه وي.

تمه ده، چې په راتلونکي پړاو کې ۱۰ لوبډلې ګډون وکړي، چې تر اوسه یې د صداقت، نورزاد، امید، زیتون، ظاهر اسد، اتحاد، جوانان میهن او پیروزي پنجشېر نومې اته لوبډلې نوملړ ته شاملې شوې دي او د دوه نورو لوبډلو نومونه به وروسته اعلان شي.

د صداقت لوبډله، چې د تېر پړاو اتلولي یې ګټلې وه؛ په راتلونکي پړاو کې به د خپلې اتلولۍ د ساتلو لپاره سیالۍ وکړي؛ خو د تېر پړاو دوه لوبډلې، دیار صنعتي او آریا فورج، له غوره لیګ څخه دوه‌یمې درجې ته کښته شوې دي.

د افغانستان فوټسال کمیټې مرستیال تخنیکي رییس فرید احمد یوسفزي ویلي، چې په تېر پړاو کې د ویډیويي مرستیال(VAR)  سیسټم کارول یوه بریالۍ هڅه وه، چې په کور دننه او بهر یې هم مثبت غبرګونونه ترلاسه کړل.

د نوموړي د څرګندونو له مخې؛ هڅه کېږي، چې په روان پړاو کې د فوټسال د نویو قوانینو له مخې له دې ټکنالوژۍ بېله ګټه واخیستل شي.

هغه زیاته کړې، چې دغه قوانین تر اوسه د ایټالیا په سری ای لیګ او د ډاکار د ځوانانو په المپیکي سیالیو کې پلي شوي او د افغانستان فوټسال غوره لیګ به درېیمه رسمي سیالي وي، چې یاد قوانین په کې پلي کېږي.

دغه راز یوسفزي ویلي، چې د نویو قوانینو له پلي کېدا سره به د لوبڅارۍ په برخه کې د پام وړ بدلونونه راشي.

د نوموړي د څرګندونو له مخې؛ د استرالیا لوبڅار تمیم حسیني به د ډسمبر پر لومړۍ کابل ته راورسېږي او له نړیوال لوبڅار عتیق‌الله نیازي او خالق‌یار پیمان سره به یوځای د سیالیو قضاوت وکړي.

خالق‌یار پیمان په دې وروستیو کې د مالیزیا له یوې روزنیزې اکاډمۍ بېرته راستون شوی دی.

د آریانا ټلویزیون د خپرونو مدیر او د پروګرامونو د پېرلو برخې مشر حمیدالله شریفي ویلي، چې دا ټلویزیون تل هڅه کوي افغانانو ته د سپورټي سیالیو په برخه کې باکیفیته خپرونې وړاندې کړي.

نوموړي ډاډ څرګند کړی، چې د فوټسال د راتلونکي پړاو سیالۍ به د تولید او ټلوېزیوني خپرونو له پلوه ښه کیفیت ولري.

د افغانستان کرکټ ملي لوبډلې د یکشنبې پر ورځ په شارجه کې د شلآاوریزو سیالیو د لړۍ په درېیمه او وروستۍ لوبه کې زیمبابوی ته د اووه ویکټو پر توپیر ماتې ورکړه او د درې واړو لوبو پر ګټلو یې د سیالیو لړۍ پخپل نوم کړه.

د افغانستان چپ‌لاسي توپ‌اچوونکي نور احمد د لوبې په دې پړاو کې د پام وړ لوبه وکړه او په ۳.۳‌آورونو کې یې د ۱۳ منډو پر جوړولو د زیمبابوې پنځه لوبغاړي وسوځول. د نوموړي په دې غوره توپ‌اچونه کې زیمبابوی لوبډله په ‌‌۱۴.۳آورونو کې د ۷۹ منډو پر جوړولو وسوځېده.

افغانستان د ۸۰ منډو هدف په ۸.۱آورونو کې د درې ویکټو پر زیان پوره کړ او د اووه ویکټو پر توپیر یې بریا خپله کړه.

دا د زیمبابوی پر وړاندې په ۲۴ شل‌آوریزو نړیوالو سیالیو کې د افغانستان دوه‌ویشتمه بریا وه. دغه راز، د پاتې توپونو له مخې دا د افغانستان دوه‌یمه ستره بریا هم وه.

د لوبې په پیل کې د افغانستان چټکو توپ‌اچوونکو په شارجه لوبغالي کې د نوي توپ لپاره د خوځښت زمینه برابره کړه او د زیمبابوی پر لوبغاړو یې فشار راوړ.

فضل‌الحق فاروقي د لوبې په لومړي آور کې اینوسنټ کایا وسوځاوه او عظمت‌الله عمرزي، چې د لړۍ د غوره لوبغاړي جایزه یې هم ترلاسه کړه؛ په دوه‌یم آور کې براین بنیټ له ډګره بهر کړ او زیمبابوی د دوه ویکټو پر زیان یوازې اته منډې جوړې کړې.

د افغانستان نوي لوبغاړي عبدالله تره‌خېل هم په خپله لومړۍ نړیواله لوبه کې د زیمبابوی لوبډلمشر سکندر رضا وسوځاوه او د سیالې لوبډلې ستونزې یې نورې هم زیاتې کړې.

راین برل د زیمبابوی لپاره تر یوه بریده مقاومت وکړ او پر ۲۹ توپونو یې ۳۰ منډې جوړې کړې، چې څو څلوریزې یې هم وهلې وې؛ خو د عبدالله احمدزي له‌خوا د هغه سوځېدا د زیمبابوی د بېرته سیالۍ ته د راګرځېدا هیلې کمزورې کړې.

نور احمد په یوولسم‌آور کې د زیمبابوې د توپ‌وهونکو پر وړاندې واکمن شو او پر څلور توپونو یې درې لوبغاړي وسوځول، چې له دې سره یې د سیالې لوبډلې د توپ‌وهنې وروستۍ برخه له منځه یووړه.

نوموړي لومړی وېسلي ماډیویري د سټمپ پر مټ وسوځاوه، ورپسې تفاډزوا ټسیګا د سلیپ په سیمه کې توپ‌نیونکي ونیو. له دې وروسته ټاډیواناشي ماروماني د عمرزي پر ښکلې ټوپ‌وهونکې توپ‌نیونې وسوځېد او نور احمد د هیټریک له ترلاسه کولو لږ پاتې شو.

نور احمد په راتلونکو دوه‌آورونو کې دوه نور لوبغاړي هم وسوځول او خپله غوره لوبه یې د ۱۳ منډو په بدل کې د پنځه ویکټو پر ترلاسه کولو پای ته ورسوله او زیمبابوی لوبډله پر ۷۹ منډو وسوځېده.

دا په شل‌آوریزو نړیوالو سیالیو کې د نور احمد تر ټولو غوره لوبه وه.

نوموړي خپل پخوانی ریکارډ، چې په ۲۰۲۲ز. کال کې یې هم د زیمبابوی پر وړاندې په هرارې کې پر ۱۰ منډو د څلور ویکټو پر ترلاسه کولو جوړ کړی و؛ مات کړ.

افغانستان د هدف د ترلاسه کولو په هڅه کې محمد اکرم ژر له لاسه ورکړ، چې ۱۲ چټکې منډې یې کړې وې؛ خو دې چارې د کوربه لوبډلې پر چټکې لوبې اغېز ونه‌کړ.

صدیق‌الله اتل پر چټکه توپ‌وهنه څو څلوریزې ووهلې او افغانستان یې د هدف ترلاسه کولو ته نږدې کړ.

عظمت‌الله عمرزي او لوبډلمشر ابراهیم ځدراڼ هم خپلې بریدیزه توپ‌وهنې روانه وساتله.

ځدراڼ د ایرنسټ ماسکوکو په یوه آور کې څلور څلوریزې ووهلې او ورپسې عمرزي پر پیاوړې شپږیزې د افغانستان بریا بشپړه کړه.

افغانستان د درې ویکټو پر زیان په ۸.۱‌آورونو کې ۸۰ منډې جوړې کړې او زیمبابوی ته یې د اووه ویکټو پر توپیر ماتې ورکړه او افغانستان د شلآاوریزو نړیوالو سیالیو درې‌لوبیزه لړۍ ۳ پر ۰ وګټله.

د دغې لړۍ بریا یو ځل بیا په شل‌آوریزو سیالیو کې د افغانستان د ملي لوبډلې پیاوړې لوبه وښوده او د راتلونکو نړیوالو سیالیو لپاره یې د لوبډلې ښه چمتووالی څرګند کړ.