د افغانستان غېږنیونې غوره لیګ د لومړي پړاو سیالیو پر درېیمه ورځ د فتح او قوش‌تېپه لوبډلو زړه‌راکښونکې لوبې وړاندې او بریاوې یې خپلې کړې. دغه سیالۍ د چارشنبې پر ورځ په کابل کې روانې وې او د هېواد مخکښو غېږنیوونکو خپل مهارتونه نندارې ته وړاندې کړل.

په لومړۍ لوبډله‌ییزې سیالۍ کې د سپین‌غر لوبډلې فرزاد چیله‌باغ د ۵۷ کیلوګرام په وزن کې فتح لوبډلې قریب الله کاظمي ته ماتې ورکړه؛ خو فتح لوبډلې په راتلونکو دوه سیالیو کې پیاوړې لوبه وکړه او پایله یې د خپلې ګټې پر لوري راواړوله. محمدعلي ترکمن‌وال په ۶۱ کیلوګرام وزن کې سهیل میرزایي او سیاوش ساماني په ۶۵ کیلوګرام وزن کې عبدالستار علمیار ته ماتې ورکړه او خپلې لوبډلې ته یې بریا ورپه برخه کړه.

په دوه‌یمه لوبډله‌ییزه سیالۍ کې کهکشان او قوش‌تېپه لوبډلې مخامخ شوې. کهکشان لوبډلې سیالي په ۵۷ کیلوګرام وزن کې د محمد رامز احمدي پر بریا پیل کړه، چې بلال حکیمي ته یې ماتې ورکړه.

قوش‌تېپه لوبډلې وروسته پر سیالیو بشپړ برلاسی وموند او پرله‌پسې پېنځه سیالۍ یې وګټلې.

مسیح الله نظري په ۶۱ کیلوګرام وزن کې مرتضی رستمي، نجیب حسنی په ۶۵ کیلوګرام وزن کې جواد، شمس قریشي په ۷۰ کیلوګرام وزن کې شېرحسین، رومل رجبي په ۷۴ کیلوګرام وزن کې محمدهادي او عثمان عظیمي په ۷۹ کیلوګرام وزن کې فرهاد حیدري ته ماتې ورکړه.

د افغانستان غېږنیونې غوره لیګ سیالۍ اوس هم په کابل کې روانې دي او د هېواد له بېلابېلو سیمو څخه لوبډلې د لومړي پړاو د اتلولۍ د خپلولو لپاره سیالي کوي. دا سیالۍ د غېږنیونې د ودې او د هېواد د غوره غېږنیوونکو د ښې پېژندنې لپاره ترسره کېږي.

آریانا ټلوېزیون د افغانستان غېږنیونې غوره لیګ ټولې سیالۍ پر ژوندۍ او ځانګړې بڼه خپروي. د دغو سیالیو ورځنی پوښښ د ماښام له ۶ بجو پیلېږي او مینه‌وال یې په ټول افغانستان کې ننداره کولی شي.

فیفا د ۲۰۲۶ز.کال نړیوال جام له پای ته رسېدا وروسته د نرینه فوټبال تازه نړیوال نوملړ خپور کړ، چې له مخې یې د نړیوال جام اتله اسپانیا د نړۍ د غوره لوبډلو په سر کې راغلې ده.

اسپانیا د نړیوال جام دې اتلولۍ دا اروپايي لوبډله د نړیوال نوملړ لومړي مقام ته ورسوله او پخواني مخکښان یې له دې ځایه کښته کړل.

نوی نوملړ د نړیوال جام او نورو رسمي نړیوالو سیالیو د پایلو پر بنسټ جوړه شوی دی. لوبډلو ته د سیالانو د ځواک او د سیالیو د ارزښت له مخې نمرې زیاتې یا کمې شوې دي.

د تازه نوملړ له مخې، افغانستان په یو سلو یواویاوم ځای کې راغلی او اوس هم د آسیا د ټیټې درجې لرونکو لوبډلو په ډله کې دی؛ خو هڅه کوي پر نړیواله کچه خپل ځای ښه کړي.

په همدې حال کې پاکستان د فیفا د ۲۱۰ غړو ټولنو ترمنځ په یو سل او اته‌نوي‌وم ځای کې دی.

د فیفا نړیوال نوملړ د نمرو پر یوه ځانګړي سیسټم ولاړ دی، چې د رسمي نړیوالو سیالیو پایلې، د سیالانو ځواک او د هرې سیالۍ اهمیت په کې په پام کې نیول کېږي.

د نړیوال جام سیالۍ تر ټولو ډېر ارزښت لري؛ له همدې کبله په دې سیالیو کې ښې پایلې د لوبډلو پر نړیوال مقام د پام وړ اغېز کوي.

دغه نوملړ په نړیوال فوټبال کې مهم رول لري؛ ځکه د فیفا او سیمه‌ییزو سیالیو لپاره د لوبډلو د ډلبندۍ او پچې له مهمو معیارونو څخه ګڼل کېږي. لوړ مقام لرونکې لوبډلې معمولاً په پچه‌اچونه او ډل‌وېش کې غوره موقعیت ترلاسه کوي.

د ۲۰۲۶ز.کال نړیوال جام له پای ته رسېدا وروسته به ملي لوبډلې خپلې پاملرنې قاره‌ییزو اتلولیو، د نړیوال جام غوراوي پړاوونو او دوستانه سیالیو ته واړوي، چې پایلې به یې د فیفا په راتلونکي نوملړ کې اغېز ولري.

د افغانستان د غېږنیونې غوره لیګ(ای‌ډبلیو‌پي‌ال) لومړی پړاو د دوشنبې ماښام مهال په کابل کې پیل شو، چې د مینه‌والو پراخ هرکلی یې ترلاسه کړ.

د پرانیستې مراسمو ته ګڼ شمېر مینه‌وال ورغلي وه؛ د پلرونو او زامنو پر ګډون ډېر شمېر لېوال ورغلي وه او د افغانستان د لومړي غوره غېږنیونې لیګ د پیل ننداره یې وکړه.

د سیالیو لومړۍ لوبه د ۵۷ کیلوګرامه وزن په کټه‌ګورۍ کې د کهکشان لوبډلې د ام‌ار احدي او د قلعه بست لوبډلې د محمد اکبري ترمنځ ترسره شوه.

په دې سیالیو کې د هېواد ۱۰ لوبډلې او ۱۰۰ مخکښ غېږنیوونکي ګډون لري، چې د سیالیو په اوږدو کې به یو له بل سره سیالي وکړي. تنظیموونکي هیله لري، چې دا لیګ به د افغانستان د ورزشونو له مهمو سیالیو څخه وګرځي.

ګډونوالې لوبډلې یې دا دي:

اخوت

بالاحصار

دوستي

سپین غر

ستاره‌ها (ستوري)

سوله

قلعه بست

فتح

قوش‌تېپه

کهکشان

هره لوبډله ۱۰ غېږنیوونکي لري، چې پر ټولیزه بڼه ۱۰۰ لوبغاړي د هېواد له بېلابېلو سیمو سره راټولوي.

د افغانستان د غېږنیونې غوره لیګ سیالۍ پر ژوندۍ بڼه د آریانا راډیو او ټلوېزیون او د هغې د ټولنیزو رسنیو له رسمي پاڼو خپرېږي، چې د هېواد دننه او بهر مینه‌وال وکولی شي د خپلې خوښې دا سیالۍ نه یوازې وڅاري، بلکې  کولی شي هره ورځ د کابل پر وخت د ماښام له شپږو بجو څخه یې پر ژوندۍ هم بڼه وګوري.

د لیګ تنظیموونکي وایي، له دې سیالیو موخه د افغانستان د غېږنیونې وړتیاوو راڅرګندول، د سالمې سیالۍ دودول او لوبغاړو ته د مسلکي سیالیو د یوه مناسب ډګر برابرول دي، څو خپل مهارتونه وښيي او د غېږنیوونکو نوي نسل ته الهام ورکړي.

له مینه‌والو غوښتل شوي، چې د سیالیو د مهالوېش، پایلو، مهمو خبرونو او غوره شېبو د ترلاسه کولو لپاره د آریانا راډیو او ټلوېزیون رسمي ټولنیزې پاڼې وڅاري.

د افغانستان د غېږنیونې غوره لیګ پیل په هېواد کې د مسلکي سپورټ د ودې په لړ کې یو بل مهم ګام ګڼل کېږي، چې هم مینه‌والو ته نوې او په زړه پورې سیالۍ وړاندې کوي او هم غېږنیوونکو ته د کورنیو لوړې کچې سیالیو فرصت برابروي.