د امریکا-اسلامي اړیکو شورا د افغانانو پر وړاندې اسلام ضد څرګندونې وغندلې

د امریکا-اسلامي اړیکو شورا (CAIR) او د هغې د کالیفورنیا څانګې د امریکا د کانګرس د فرعي کمیټې په ګډه غونډه کې اسلام ضد څرګندونې او د افغانانو ملامتول پر کلکه غندلي دي.

دې بنسټ په یوه خبرپانه کې ویلي، چې د افغان کډوالو د پروګرام په اړه د امریکا د سنا د قضايي کمیټې غونډه د سیاسي بریدونو، د ناسمو تورونو خپرولو او د مسلمانانو د خدمت کوونکو ټولنو پر نښه کولو لپاره یوه مرحله ګرځېدلې ده.

د دغې خبرپاڼې له مخې؛ د غونډې په بهیر کې د امریکا-اسلامي اړیکو شورا پر وړاندې “بې بنسټه او بدناموونکي” تورونه ولګول شول او د مسلمانانو ضد نظرونو لرونکی یوه افراطي څېره د شاهد په توګه غونډې ته بلل شوې ده.

د امریکا-اسلامي اړیکو شورا ټینګار کړی؛ دا ډول څرګندونې د امریکایي مسلمانانو، افغان کډوالو او هغو بنسټونو د بدنامولو لپاره د پراخ کمپاین یوه برخه ده، چې د کډوالو او بشري حقونو په ځانګړي توګه له فلسطیني حقونو څخه ملاتړ کوي.

د امریکا-اسلامي اړیکو شورا مرستیال اډوارډ احمد میچل ویلي، چې یو شمېر سناتورانو له غونډې څخه د مهاجرینو، کډوالو او امریکایي مسلمانانو پر وړاندې د نفرت د راپارولو لپاره کار واخیست.

دغه راز د امریکا-اسلامي اړیکو د کالیفورنیا شورا اجرائیوي رییس دا غونډه “شرموونکې سیاسي ننداره” وبلله او زیاتوي، چې پر اغېزمنې پالیسۍ جوړونې او عامه خوندیتوب د تمرکز کولو پرځای؛ دا د افغانانو او مدني ټولنې ادارو د بدنامولو لپاره کارول شوې.

دا په داسې حال کې ده، چې له افغانستان څخه د امریکایي ځواکونو له وتلو وروسته لسګونه زره افغانان د ځانګړو پروګرامونو له لارې امریکا ته داخل شوي او د دوی د قانوني حیثیت او بیا میشتېدنې په اړه بحثونه روان ساتل شوي دي.