د روسیې د لومړي وزیر مرستیال مارات خوسنولین ويلي، هېواد به یې د افغانستان له لارې هند سمندر ته د اوسپنې‌پټلۍ د یوې لارې د جوړولو امکان وڅېړي.

خوسنولین له ټاس خبري آژانس سره په خبرو کې ویلي؛ د دې لارې موخه دا ده، چې د هرمز او باسفور تنګیو لپاره بدیله لاره رامنځته شي او روسیه پر دغو تنګیو خپله تکیه راکمه کړي.

د روسیې د لومړي وزیر مرستیال زیاته کړې، د هرمز او باسفور تنګیو د امنیتي ګواښونو له کبله د ترکمنستان، ایران، افغانستان او پاکستان له لارې د نوي اوسپنې‌پټلۍ او ټرانزیټي لارې د جوړولو طرحه هم څېړل کېدی شي.

نوموړي ویلي؛ هره هغه لاره، چې هند ته د لاسرسي زمینه برابره کړي، د مسکو لپاره د منلو وړ ده.

دا وړاندیز په داسې حال کې وړاندې کېږي، چې د امریکا، اسرائیلو او ایران ترمنځ د کړکېچ له زیاتېدا وروسته د هرمز تنګي له لارې د سمندري لېږد د امنیت او باوري تګ راتګ په اړه اندېښنې زیاتې شوې دي.

هرمز تنګی د نړۍ د انرژۍ له مهمو سمندري لارو څخه دی، چې د نړۍ د تېلو او مایع طبیعي ګاز د پام وړ برخه یې له لارې لېږدول کېږي.

د افغانستان برښنا شرکت مسوولانو ويلي؛ د روسیې یو شمېر لوی شرکتونه په افغانستان کې د برښنايي وسایلو د تولید په برخه کې پانګونې ته لېوالتیا لري.

د دغه شرکت مسوولانو زیاته کړي، افغانستان د برښنايي وسایلو د تولید په برخه کې د میلیونونو ډالرو پانګونې د راجلبولو وړتیا لري.

د دوی د څرګندونو له مخې، د برښنا شرکت ډېره برخه اړین وسایل له ګاونډ او نورو هېوادونو څخه پېرودل کېږي او د کورني تولید زیاتېدا کولی شي تر یوه بریده پر وارداتو تکیه راکمه کړي.

د خصوصي سکټور غړيو هم ويلي، د برښنايي وسایلو د تولید په برخه کې پانګونه یوه جدي اړتیا ده.

دوی ټینګار کړی؛ په هېواد کې د برښنايي وسایلو د پراختیا او تولید په برخه کې د پانګونې بهیر باید چټک شي، چې د دغو وسایلو واردات کم او کورنی تولید زیات شي.

د خصوصي سکټور د څرګندونو له مخې؛ دا کار به د وارداتو پر کچه تکیه راکمه او د زرګونو کسانو لپاره د کار زمینه هم برابره کړي.

اقتصادي شنونکو ويلي؛ د برښنا د تولید ترڅنګ باید د برښنا د تولید او لېږد لپاره د کارېدونکو وسایلو د تولید په برخه کې د پانګونې کچه لوړه شي، چې په هېواد کې تولید شوي برښنايي وسایل د هېواد بازارونو ته وړاندې او د بهرنیو محصولاتو د واردولو مخه ونیول شي.

د یادونې ده، چې اوسمهال له چین، ایران، ترکیې او نورو هېوادونو څخه افغانستان ته برښنايي وسایل واردېږي.