Connect with us

نړۍ

د ایران پولې ته نږدې څلور پاکستاني پوځیان وژل شوي

خپور شوی

د

(Last Updated On: مرغومی ۲۹, ۱۴۰۱)

د پاکستان پوځ د چارشنبې پر ورځ ( د مرغومي ۲۸ ) څرګنده کړې، چې د ایران پولې ته څېرمه په یوه ترهګریز برید کې د دغه هېواد څلور امنیتي ځواکونه وژل شوي دي.

د پاکستان د پوځ د اعلامیې له مخې، دا پېښه د بلوچستان په پنجګور سیمه کې رامنځته شوې. دا هغه ایالت دی، چې تل د سرحدي ځواکونو او پاکستانيو پوځیانو پر ضد د بلوڅ بېلتون غوښتونکیو لخوا د بریدونو شاهد دی.

د پوځ په اعلاميه کې راغلي، چې افراطيانو د ايران له خاورې څخه د امنيتي ځواکونو پر کاروان، چې د پولې په اوږدو کې ګزمه کوله بريد وکړ.

په دې اعلاميه کې د پاکستان پوځ له ايراني چارواکو غوښتي، چې په خپله خاوره کې دې د ترهګرو ځالې له منځه يوسي؛ خو د ايران حکومت تر اوسه د دې پېښې په اړه غبرګون ندی ښودلی.

د پاکستان ولسمشر عارف علوي دغه برید غندلی او د دغې پېښې د قربانیانو د خدمتونو او قربانیو قدرداني یې کړې ده.

علوي ویلي، چې د پاکستان ټول ملت د ترهګرۍ پر ضد مبارزې ته کلک هوډ لري.

د پاکستان د بهرنیو چارو وزیر بلاول بوتو زرداري هم دغه برید غندلی او وژل شوي کسان یې اتلان نومولي دي.

زرداري بوتو ویلي: هغه افراطیان، چې دا برید یې ترسره کړی باید قیمت ادا کړي.

د پاکستان د سولې د مطالعاتو انستیتیوت، چې په اسلام‌آباد کې میشت یو خپلواک بنسټ دی، چې د افراطیانو فعالیتونه څاري.

دغه بنسټ په دې وروستیو کې یو راپور خپور کړی، چې ویلي یې دي؛ په افغانستان کې د اسلامي امارت له بیا واک ته له رسېدو وروسته په پاکستان کې افراطي بریدونه په سلو کې پنځوس زیات شوي دي.

پاکستان او ایران ۹۵۹ کیلومتره ګډه پوله لري او له دې مخکې هم ورته ګڼې امنیتي پېښې رامنځته شوې دي.

نړۍ

شمالي کوریا یو بالسټیک توغندی وتوغاوه

Published

on

(Last Updated On: کب ۲۸, ۱۴۰۲)

د رویټرز د څرګندونو له مخې؛ د سویلي کوریا پوځ په ډاګه کړې، چې څو لنډ واټن ویشتونکي بالسټیک توغندي د ټاپو وزمې ختیځ لوري ته وتوغول شول.

د جاپان ساحلي ګارد هم ویلي، چې شمالي کوریا دوه توغندي توغولي دي. دا په تېرو دوه میاشتو کې لومړی ځل دی، چې پیونګ یانګ بالسټیک توغندی توغوي.

شمالي کوریا وروستی ځل د مرغومي پر څلیریشتمه د سوپرسونیک منځني واټن ویشتونکي توغندي ازموینه ترسره کړه.

د شمالي کوریا د بالسټیک توغندي ازموینه په داسې حال کې ترسره کیږي، چې د امریکا بهرنیو چارو وزیر انټوني بلینکن د سویلي کوریا د ولسمشر یون سوک یول پر کوربه‌توب د “ډیموکراسۍ په غونډه” کې د ګډون لپاره سیول ته تللی دی.

په وروستیو اوونیو کې د شمالي کوریا پوځ د دودیزو وسلو پر کارولو پوځي روزنیزې هڅې ترسره کړې، چې د شمالي کوریا مشر کیم جونګ اون یې د ډېرو څارنه هم وکړه.

د شمالي کوریا د ځواک دا ننداره په داسې حال کې کیږي، چې امریکا او جنوبي کوریا هم په دې وروستیو کې ۱۰ ورځنۍ ګډې پوځي روزنیزې هڅې ترسره کړي دي.

سیول هم په ډاګه کړې، چې له امریکا سره په دغو کلنیو ګډو روزنیزو هڅو کې یې له سمندري ځواکونو، برید ګرو چورلکو او د ځمکې او اوبو جنګي موټر کارولي دي.

د جنوبي کوریا د چارواکو د څرګندونو له مخې؛ دغه هېواد هم له شمالي کوریا سره نږدې د دغه هېواد د لویدیځو ټاپوګانو د دفاعي پیاوړتیا لپاره ، چې په ۲۰۱۰ ز. کال کې پرې پیونګ یانګ بمبارد کړی و؛ خپل ځواکونه زیات کړي دي.

Continue Reading

نړۍ

د آیسلینډ اورشېندنې یو ځل بیا سرراپورته کړ

Published

on

(Last Updated On: کب ۲۷, ۱۴۰۲)

د آیسلینډ د هواپېژندنې ادارې څرګنده کړې، چې د شنبې پر ورځ په تېرو درې میاشتو کې د څلورم ځل لپاره د اور‌شېندنې له کبله لوګي او روښانه نارنجي لاوا د ځمکې سطحې ته راپورته شوه.

د رویټرز د څرګندونو له مخې؛ د ساحلي ساتونکيو له چورلکې څخه اخیستل شوې ویډیو ښیي، چې د ځمکې له یوه اوږده درزه راپورته شوې لاوا هر لوري ته خپریږي.

د آیسلینډ د هوا‌پېژندنې ادارې په خبرپاڼه کې اټکل شوی؛ د دې اورشېندنې سطحه دوه اعشاریه ۹ کیلومټره اوږدوالی لري، چې د دې وروستيۍ اورشیندنې کچه د فبرورۍ د هغې کچې ته رسېدلې ده.

چارواکو د اوونیو لپاره د آیسلینډ پلازمېنې ریکیاویک سویلي لوري ته په ریکیانس ټاپو وزمه کې له اورشېندنې خبرداری ورکړی و.

د نورډیک د اورشېندنې مرکز مشر ریکه پډرسن ویلي؛ په رښتیا هم د دې تمه کېده.

هغه زیاته کړې: البته د اورشېندنې د بشپړ وخت وړاندویېنه نشي کیدی؛ خو د ځمکې سطحې ته یې د لومړني حرکت نښې یوازې شاوخوا ۱۵ دقیقې مخکې رامنځته شوې.

د یادې سرچینې د څرګندونو له مخې؛ داسې ښکاري، چې لاوا سویل لوري ته چټکه غځیږي او د کب نیولو ښار رینډاویک پر لور راروانه ده. دا هغه ځای دی، چې له تېرې اورشیندنې څخه د شاوخوا ۴۰۰۰ اوسیدونکیو لږ شمېر یې بېرته راستانه شوي وه.

له ښار څخه د وتلو عملیات بیا پیل شوي او چارواکو په ښار کې بېړنی حالت اعلان کړی دی.

آیسلینډ د امریکا د کنټاکي ایالت پر کچه له ۳۰ څخه ډېر فعال اورشېندنې لري او په شمالي اروپا کې د ګرځندویانو یو مهم ځای ګرځیدلی دی.

په ۲۰۱۰ ز. کال کې د سویلي آیسلینډ له اورشېندنې څخه خړې ورېځې د اروپا پر لویو برخو خپرې شوې؛ شاوخوا ۱۰۰ زره الوتنې یې وځنډولې او په سلګونه آیسلینډیان یې د خپلو کورونو پرېښودو ته اړ کړل.

Continue Reading

نړۍ

د غزې پر یوه مرستندویه مرکز د اسرائیلو په هوايي برید کې ۲۷ کسانو ته مرګ و ژوبله اوښتې

Published

on

(Last Updated On: کب ۲۴, ۱۴۰۲)

د فلسطین روغتیايي چارواکو د چارشنبې پر ورځ ( د کب درویشتمه ) ویلي، چې د غزې په جنوبي ښار رفح کې د خوراکي توکو د وېش پر یوه مرکز پر اسرائیلي هوايي برید پېنځه کسان وژل شوي د غزې شمالي برخې ته، چې له قحطۍ سره مخ ده؛ د مرستو بندولو ګواښ هم شوی دی.

په پېښه کې د آنروا ( د فلسطیني بې ځایه شویو لپاره د مرستو رسونې او کار موندنې بنسټ ) یو کارکوونکی وژل شوی دی.

د آنروا مشر فیلیپ لازارینی ویلي؛ زمونږ د غزې د تړانګې د مرستو د وېش پر یوه مرکز په داسې حال کې هوایي برید وشو، چې د خوراکي توکو رسول پر ختمیدو دي، لوږه پراخه ده او ځینې سیمې لهه قحطۍ سره مخ شوې دي.

ملګرو ملتونو خبرداری ورکړی؛ په غزه کې لږ تر لږه ۵۷۶ زره کسان، چې د وګړیو څلورمه برخه جوړوي، د قحطۍ په څنډه کې دي.

د سې شنبې پ ورځ ملګرو ملتونو په درې اوونیو کې د لومړي ځل لپاره شمالي غزې ته د خوراکي توکو رسولو لپاره نوې ځمکنۍ لار وکاروله.

د اسرائیلو د حکومت ویاند تال هینریچ د چارشنبې پر ورځ خبریالانو ته ویلي: مونږ د غزې شمالي ته د ډېرو مرستو رسولو هڅې کړې دي.

آنروا بنسټ د اسرائیلو دا ادعا رد کړې او وایي، چې اسرائیل د فلسطینیانو د فشار لپاره له قحطۍ څخه کار اخلي.

د اسرائیلو لومړي وزیر بنیامین نتنیاهو د چارشنبې پر ورځ ویلي؛ هغه هوډ لري، چې د آنروا پرځای، چئ له حماس سره د اړیکو ادعا پرې شوې؛ د مرستو د وېش لپاره د ملګرو ملتونو ټولنه ځای پر ځای کړي

په داسې حال کې ده، چې د غزې جګړه شپږمې میاشتې ته داخلیږي، چې ورسره نه یوازې مرګ و ژوبله پراخه شوې، بلکې تر څنګ یې د مرستو رسولو غوښتنه هم ورځ تر بلې ډېریږي.

Continue Reading

Trending

Copyright © 2022 Ariana News. All rights reserved!