تازه خبرونه
د ا.ا.ا تر چتر لاندې د کوچني اختر لومړۍ ورځ ولمانځل شوه
د افغانستان اسلامي امارت سترې محکمې د شنبې پر ورځ ناوخته (د غویی ۱۱) د کوچني اختر لومړۍ ورځ اعلان کړه، چې د کابل په ګډون د افغانستان په ټولو ولایتونو کې خلکو نن اختر ولمانځه.
د افغانستان اسلامي امارت لومړي وزیر ملا محمد حسن اخوند د کوچني اختر له لمانځه وروسته په ارګ کې وویل، هغه درې ورځنی یا څو ورځنی اوربند، چې به هر کال خلک ورته په تمه ول؛ سږ کال د الله پاک په نصرت اشغال پای ته رسېدلی او افغانستان ترې خوندي او امن دی.
د لومړي وزیر د څرګندونو له مخې؛ د افغانستان خلکو له کلونو جګړو وروسته د بریا له خواږه خونده برخمن شوي دي.
همدارنګه د لومړي وزیر دوه یم مرستیال د افغانستان خلکو ته د تلپاتې سولې او په هېواد کې د سوکالۍ هیله وکړه.
په قطر کې د اسلامي امارت د سیاسي دفتر ویاند محمد نعیم د یوه انځور له خپرولو سره ټویټ کړی، چې نن سهار په کندهار ولایت کې د اختر لمونځ د اسلامي امارت د مشرتابه ملا هبة الله اخوندزاده په مشرۍ ترسره شو.
د اسلامي امارت مشرتابه ملا هبة الله اخوندزاده نن د وینا پر مهال د کوچني اختر د رارسیدو او د اسلامي امارت د ځواکونو د بریا مبارکي وړاندې کړه.
د افغانستان د اسلامي امارت سترې محکمې د شنبې په ورځ ناوخته اعلان وکړ، چې سبا یکشنبه په افغانستان کې د کوچني اختر لومړۍ ورځ ده.
په همدې حال کې د ملي دفاع وزارت چارسمبالي مولوي محمد یعقوب مجاهد د اختر په مناسبت په خپل پیغام کې ویلي، چې په هېواد کې به د سولې د ګډوډولو مخه ونیسي.
هغه وایي: هیچا ته به اجازه ورنکړ شي، چې امنيت ګډوډ کړي.
په افغانستان کې د ملګرو ملتونو مرستندویه پلاوي (یوناما) د افغانستان خلکو ته د کوچني اختر مبارکي هم وویله. یوناما له افغانستان سره د مرستې او همکارۍ پر ژمنې یو ځل بیا ټینګار څرګند کړ.
د روژې د میاشتې د لیدنې د کمیټې مشر مولوي عبدالحکیم د شنبې پر ورځ رسنیو ته وویل، چې په کندهار، فراه، زابل، هلمند او غور ولایتونو کې ۲۷ کسانو د شوال میاشت لیدلې ده.
په همدې حال کې سعودي عربستان د شنبې پر ورځ اعلان وکړ، چې په سعودي عربستان کې د شوال میاشت نده لیدل شوې؛ نو، ځکه یکشنبه د روژې وروستۍ ورځ او دوشنبه د کوچني اختر لومړۍ ورځ اعلان شوې ده.
تازه خبرونه
ایران او پاکستان د افغانستان په اړه ګډه اعلامیه خپره کړه
ایران او پاکستان په یوه ګډه اعلامیه کې د یو سولهییز، متحد، خپلواک او له ترهګرۍ او نشهیي توکو قاچاق څخه د پاک افغانستان په اړه پخپلو ژمنو ټینګار څرګند کړی دی.
دواړو لوریو د ترهګریزو ډلو شتوالي ته په افغانستان کې نغوته کړې، چې سیمې او نړۍ ته امنیتي ګواښ دی؛ نو پر وړاندې یې پر مبارزه، همکارۍ او متحدې جبهې جوړولو ټینګار کړی دی.
دوی دغه راز د سیمې د امنیت او ثبات د ډاډمنولو لپاره د سیمهییزې او نړیوالې همغږۍ د اړتیاوو پر اهمیت خبرې کړې دي.
دواړه لوري د افغانستان حاکمیت او ځمکنۍ بشپړتیا ته د احترام کولو تر څنګ څرګندوي؛ د دې هېواد ټولې خواوې باید په بنسټیزو پرېکړو کې ونډه ولري، چې په هېواد کې د سولې او ثبات لامل شي.
تازه خبرونه
له ۱۰۰۰ ډېر افغان مهاجرین له پاکستان څخه جبري وایستل شول
د مهاجرینو چارو وزارت ویلي، چې د غویي پر څلورمه د سپین بولدک له فرضي کرښې څخه ۱۰۰۱ افغان مهاجرین پر جبري بڼه خپل هېواد ته راستانه شول.
د کندهار سپین بولدک سرحدي آمریت د راپور له مخې؛ ۱۹۱ کورنۍ، چې ۹۹۸ کسان دي او درې کسان نور، چې له بنده ازاد شوي؛ په جبري توګه له پاکستان څخه هېواد ته راستانه شول.
د مهاجرینو چارو وزارت د څرګندونو له مخې؛ د مهاجرینو چارو له ریاست سره له نوم لیکنې وروسته د نورو مرستو لپاره د ملګرو ملتونو عالي کمېشنرۍ، د مهاجرت او د خوړو نړیوالې ټولنې دفترونو ته ور وپېژندل شول.
دغه راز له ۱۸ کلونو کم عمره دوه کسان، چې بندیان ول د مرستې لپاره OMPO موسسې ته ور پېژندل شوي.
ویل کیږي، چې له هرې کورنۍ سره د حکومت له لوري لس – لس زره افغانۍ نغدي مرسته هم شوې ده.
تازه خبرونه
د ټرانسپورټ او هوايي چلند وزارت چارسمبالي د ازبکستان په شپږ اړخیزه غونډه کې ګډون وکړ
د ټرانسپورټ او هوايي چلند وزارت چارسمبالي حميدالله اخوندزاده پرون (سې شنبه د غویی څلورمه) د يوه پلاوي پر مشرۍ ازبکستان ته سفر کړی او د دې هېواد پر کوبتوب یې د افغانستان، روسيې، بېلاروس، پاکستان، قزاقستان او ازبکستان هېوادونو ترمنځ په شپږ اړخيزه غونډه کې ګډون وکړ.
د افغانستان پلاوي په دې کتنه کې د نورو هېوادونو له استازیو سره د افغانستان، روسيې، بېلاروس، پاکستان، قزاقستان او ازبکستان هېوادونو ترمنځ د شپږ اړخيز دهليز له لارې د راکړې ورکړې د پراختيا په اړه خبرې وکړې.
د ټرانسپورټ او هوايي چلند وزارت ويلي، چې د دې غونډې په څنډه کې د دغه وزارت چارسمبالي د روسیې او بلاروس د ټرانسپورټ له مرستیالانو سره هم وکتل.
دغه راز د ټرانسپورت او هوايي چلند وزارت چارسمبالي د روسيې او بېلاروس د ټرانسپورټ وزارتونو له مرستيالانو سره د افغانستان او روسيې، افغانستان او بېلاروس ترمنځ د ټرانزيټي لارو د پراختيا او د ټرانسپورټي اسانتياوو د برابرولو په اړه خبرې وکړې.
ویل کیږي، چې د ټرانسپورټ او هوايي چلند وزارت چارسمبالي د افغانستان په چارو کې د ازبکستان د ولسمشر ځانګړي استازي او د ټرانسپورټ له وزیر سره دوه اړخیزې ناستې کړي او د دواړو هېوادونو ترمنځ یې د ټرانزیټ پر پراختیا بحث او خبرې کړې دي.
-
تازه خبرونه2 days ago
وروستیو سیلابونو په افغانستان کې ۱۵۰۰ کورنیو ته زیانونه رسولي
-
نړۍ4 days ago
د جاپان دوه پوځي چورلکې بحر ته وغورځېدې
-
نړۍ2 days ago
د مالیزیا بحري ځواکونو د چورلکو په ټکر کې ۱۰ کسان مړه شول
-
تازه خبرونه4 days ago
د پاکستان سرحدونو وزیر د افغان کډوالو پر باعزته ستنېدا ټینګار وکړ
-
لوبی3 days ago
عینو مېنې، استقلال کابل او اټکانرژي فوټبال لوبډلې، خدیم افسي مات کړل
-
لوبی2 days ago
د موج ساحل لوبغاړي د جوانان واحدي لوبډلې پر وړاندې زړهراکښونکی ګول ترسره کړ
-
تازه خبرونه2 days ago
راشد خان د افغان بیسیم سوداګریز سفیر شو
-
سیمه ییز خبرونه3 days ago
د ایران ولسمشر پر درې ورځني سفر پاکستان ته ولاړ