سیمه ییز خبرونه
د دریو ستونزو د شتون له امله تر اوسه د رایو بیا پلټنه نه ده پېل شوې
د ټاکنو خپلواک کمیسیون وایي، د دریو ستونزو د شتون له امله تر اوسه د رایو بیا پلټنه نه ده پېل شوې.
کمیسیون وایي، د رایو د بیا شمېرلو او پلټنو چاره ځکه ځنډنۍ شوې، چې نړیوال څارونکي تر اوسه نه دي راغلی، له ولایتونو څخه کابل ته د رایو صندوقونه نه دي لېږدول شوي او نوی لیست هم نه دی چمتو شوی.
ټاکل شوې وه، چې د رایو د پلټنې بهیر په رسمي توګه د ملي او نړیوالو څارونکو په حضور کې پېل شوی وای، خو دا ځل هم دې کار ته ټاکل شوې نېټه شاته وغورځول شوه.
د ټاکنو د خپلواک کمیسیون کمېشنر عزیز احمد بختیاري وایي، تر اوسه د رایو د پلټنو دوه ستونزې حل شوی او یواځې درې ستونزې پاتې دي څو ژر دا بهیر پېل شي.
که څه هم نوموړی نه وایي، چې کله به د رایو بیا پلټنه پېلېږي خو د رایو په تفتیش کې ځنډ د ملګرو ملتونو غوښتنه بولي.
د رایو بیا پلټنه یوه ستونزه وه، چې د ولسمشرۍ دویم پړاو ټاکنې یي ټکنۍ کړې، خو د امریکا د بهرنیو چارو وزیر په خپل منځګړیتوب سره وکړای شو، دا لانجې حل کړي.
اوس پاتې بهیر باید د ټاکنو خپلواک کمیسیون پر مخ یوسي، چې کله به پېلېږي.