تازه خبرونه
د دوحې تړونوال دې پخپلو ژمنو عمل وکړي – د قطر امیر
د قطر امیر په افغانستان کې ملي پخلاینه او بشري حقونو ته درناوی یوه اړتیا بولي او ټینګار کوي، چې د افغانستان انزوا د سیمې د هېوادونو په ګټه نده
په نيويارک کې د ملګرو ملتونو د ۷۷ سرمشریزې په لومړۍ ورځ یو شمېر ویناوال د افغانستان پر سیاسي، امنیتي، اقتصادي او بشري وضعیت راوڅرخېدل.
د قطر امیر شیخ تمیم بن حمد بن خلیفه ال ثاني ته اړینه ده، چې د دوحې د تړون لاسلیک کوونکي باید پخپلو ژمنو عمل وکړي؛ ځکه، چې د افغانستان انزوا د سیمې د هېوادونو په ګټه نده.
د قطر امیر شیخ تمیم بن حمد بن خلیفه ال ثاني وایي: د سیمه ییز امنیت لپاره مونږ له ټولو خواوو څخه غواړو، چې د دوحې د سولې بهیر لاسته راوړنې وساتي او ورته ژمن پاتې شي. په هوکړه کې ویل شوي، چې افغانستان د ترهګرو په خوندي پټنځای بدل نشي، دا کار هله کیدی شي، چې افغانان سولې او سوکالۍ ته ورسيږي. مونږ په پرلپسې ډول د ښځو د حقونو او د نجونو د کار او زدکړې د حق په ګډون د بشري حقونو پر اهمیت ټینګار کړی؛ دا ارزښتونه په افغانستان کې د تلپاتې سوکالۍ او ثبات ضمانت کوي. د ټولو برخو ترمنځ ملي پخلاینه په افغان ټولنه کې مهمه ده؛ مونږ د افغانستان د انزوا د پایلو په اړه وار د مخه خبرداری ورکړی، چې پایلې به یې هر څه بدل کړي.
د آلمان لومړي وزیر له اسلامي امارت څخه غوښتي، چې ښځې او نجونې له خپلو بنسټیزو حقونو بې برخې نکړي.
د آلمان لومړی وزیر اولاف شولز وایي: کله، چې طالبان په افغانستان کې ښځې او نجونې له خپلو بنسټیزو حقونو بې برخې کوي، باید چوپ پاتې نشو. د افغانستان خلک له اوږدو جګړو وروسته د هوسا او سوله ییز ژوند حق لري. دا زمونږ مسوولیت دی، چې د افغانستان له خلکو ملاتړ وکړو.
د ترکیې ولسمشر په افغانستان کې د اسلامي امارت د واکمنۍ په وخت کې د مثبتو او هیله بښونکیو پرمختګونو د له رامنځته کیدو خبره کړې او ترې خوښ هم دی.
د ترکیې ولسمشر رجب طیب اردوغان وایي: په تېرو ۵۰ کلونو کې افغانستان له ترهګرۍ او بېوزلۍ سره په مبارزه کې ښکېل دی او اوس هم له سخت کړاوه تېریږي. سرپرست حکومت( د افغانستان اسلامي امارت) باید د خپلو وګړیو د بنسټیزو حقونو د خوندي کولو لپاره ګامونه پورته کړي. مونږ باور لرو، چې په افغانستان کې مثبت او هیله بښونکي پرمختګونه روان دي؛ مونږ به د خپلو افغان وروڼو او خویندو ملاتړ روان وساتو.
د قزاقستان ولسمشر ويلي؛ د افغانستان راتلونکې د یوه بې پرې او خپلواک هېواد په توګه له ګاونډیانو سره په سوله کې ویني.
د قزاقستان ولسمشر نورسلطان نظربایف وایي؛ په الماتا کې د مرکزي آسیا او افغانستان لپاره د ملګرو ملتونو سیمه ییز مرکز د افغانستان راتلونکی د یوه بې پرې ناپېیلي او خپلواک هېواد په توګه له خپلو ګاونډیانو سره په سوله کې ویني. مونږ له افغانستان سره د مرستو د دوام په ګډون په هغه هېواد کې د ملت جوړونې په پېچلي بهیر کې ملاتړ ته هم دوام ورکوو!
د ملګرو ملتونو په عمومي اسمبلۍ کې د نړۍ د څه باندې ۱۶۰ هېوادونو مشران د نړیوالو ستونزو او ننګونو او د هغوی د حل لارو په اړه خپل نظرونه څرګندوي.